INDABA 97
UJesu Ubuya NjengeNkosi
UJESU ubuya emzini omncane oseduze laseJerusalema ngemva nje kokusilisa iziphofu ezimbili ezazicela uncedo. Utshela abafundi bakhe ababili ukuthi: ‘Hambani emzini, lizabona idonki encane. Liyithukulule libuye layo kimi.’
UJesu ugada idonki le elethwe kuye. Uhamba eyigadile esiya eJerusalema. IJerusalema iseduze lalapho akhona. Uthi esefika eduze ledolobho lelo, ahlangabezwe ngabantu abanengi kakhulu. Abanengi babo bakhipha amajazi abo bawafake emgwaqweni. Abanye bathatha amagatsha elala. Bawafaka emgwaqweni besebememeza: ‘Nkulunkulu busisa inkosi eza ngegama likaJehova!’
Kudala e-Israyeli inkosi entsha yayigada idonki encane iye eJerusalema ukuze abantu bayibone. Yikho okwenziwa nguJesu. Abantu laba abasemfanekisweni batshengisa ukuthi bafuna uJesu abe yinkosi yabo. Kodwa ayisibo bonke abamfunayo. Lokhu sikubona ngokwenzakalayo lapho uJesu esiya ethempelini.
Ethempelini, uJesu usilisa abantu abangaboniyo labayizigoga. Abantwana bayakubona lokhu besebememeza bedumisa uJesu. Kodwa abaphristi kuyabazondisa lokhu, besebetshela uJesu ukuthi: ‘Uyabezwa nje abantwana laba ukuthi bathini?’
UJesu uphendula esithi: ‘Ye, ngiyabezwa. Kalizake lifunde yini eBhayibhilini ukuthi: “Emilonyeni yabantwana abancane uNkulunkulu uzamisa indumiso?” ’ Abantwana baqhubeka bedumisa inkosi ebekwe nguNkulunkulu. Asifuni yini ukuba njengabantwana laba? Abanye abantu bangazama ukusiyekelisa ukukhuluma ngombuso kaNkulunkulu. Kodwa kasisoze siyekele ukutshela abanye ngezinto ezinhle uJesu azazenzela abantu.
UJesu esesemhlabeni sasingakafiki isikhathi sokuthi abuse njengenkosi. Sizafika nini leso sikhathi? Abafundi bakaJesu bafuna ukwazi. Sizabala ngakho esihlokweni esilandelayo.