Endlini Ephezulu

KUNGOLWESINE ebusuku njalo sekudlule amalanga amabili. UJesu labaphostoli bakhe abangu-12 baze endlini le enkulu, ephezulu ukuze bazokudla ukudla kwePhasika. Indoda oyibona iphuma emnyango nguJudasi Isikariyothi. Usesiyatshela abaphristi ukuthi bangambamba njani uJesu.

Izolo, uJudasi uhambe kibo wababuza ukuthi: ‘Lizangiphani nxa ngingalincedisa ukubamba uJesu?’ Bathi: ‘Inhlamvu zesiliva ezingu-30.’ Yikho ke uJudasi khathesi usesiyahlangana lamadoda la ukuze ayewatshengisa uJesu. Akukubi yini lokhu?

Isidlo sePhasika sesiphelile. Kodwa khathesi uJesu uqalisa esinye isidlo esiqakathekileyo. Uthatha isinkwa abesesipha abaphostoli bakhe esithi: ‘Thathani lidle, ngoba lokhu kutsho umzimba wami ozanikelwa ngenxa yenu.’ Ubanika futhi inkomitsho elewayini abesesithi: ‘Nathani, ngoba lokhu kutsho igazi lami, elizachithwa ngenxa yenu.’ IBhayibhili libiza lokhu ngokuthi ‘isidlo seNkosi santambama,’ kumbe ‘isidlo seNkosi.’

Ama-Israyeli ayesidla iPhasika ngoba lalibakhumbuza isikhathi lapho ingilosi kaNkulunkulu ‘eyadlula’ izindlu zabo eGibhithe kodwa yabulala amazibulo ezindlini zamaGibhithe. Kodwa khathesi uJesu ufuna abalandeli bakhe bamkhumbule njalo bakhumbule ukuthi wanikela njani ngokuphila kwakhe esenzela bona. Yikho ebatshela ukuthi babe lesidlo lesi esiqakathekileyo umnyaka ngamunye.

Sebeqedile ukudla iSidlo seNkosi Santambama, uJesu utshela abaphostoli bakhe ukuthi babe lesibindi njalo babe lokholo oluqinileyo. Bacina ngokuhlabelela uNkulunkulu izingoma besebesuka. Isikhathi sesihambile khathesi, kungaba phakathi kobusuku. Ake sibone ukuthi bayangaphi.