UJesu Esivandeni

UJESU labaphostoli bakhe basuka endlini ephezulu besebesiya esivandeni saseGetsemane. Sebake babuya lapha kanengi. UJesu khathesi ubatshela ukuthi bahlale belindile njalo bakhuleke. Uhamba khatshana mbijana, abesezilahla phansi ngobuso ukuze akhuleke.

UJesu uhlala isikhathi, abesephenduka lapho atshiye khona abaphostoli bakhe. Ubona angani abaphostoli benzani? Balele! UJesu ubatshela kathathu ukuthi kumele bahlale belindile kodwa lapho esephenduka ubathola belele. UJesu ubuya okokucina abesesithi: ‘Lingalala njani ngalesisikhathi? Sesifikile isikhathi sokuthi nginikelwe ezandleni zezoni.’

Esakhuluma, kuzwakala umsindo wabantu abanengi. Khangela emfanekisweni! Amadoda akhona abuya lezinkemba lezinduku! Athwele lezibane ukuze akhanyise. Sebefikile, omunye phakathi kwabantu laba usondela kuJesu. Uyamqabuja njengoba ubona. Indoda leyo nguJudasi Isikariyothi! Umqabujelani uJesu?

UJesu uyabuza: ‘Judasi, unginikela ngokungiqabuja yini?’ Ukuqabuja lokhu kuluphawu. Kwenza amadoda aloJudasi ayazi indoda abayifunayo, uJesu. Yikho-ke izitha zikaJesu ziyasondela ukuze zimbambe. Kodwa uPhethro kasoze ayekele uJesu ehamba engazange azame ukumvikela. Ukhipha inkemba abuye layo efuna ukugwaza indoda eseduze kwakhe. Inkemba ikhutha ikhanda lendoda leyo ibisikhipha indlebe yayo yokudla. Kodwa uJesu uthatha indlebe yendoda le, ayibisele. UJesu utshela uPhethro: ‘Buyisela inkemba yakho endaweni yayo. Ubona angani angingeke ngicele uBaba wami ukuthi athumele ingilosi zakhe ezinengi ukuthi zizongisindisa?’ Angakwenza! Kodwa uJesu kamceli uNkulunkulu ukuthi athumele izingilosi ngoba uyakwazi ukuthi sekuyisikhathi sokuthi izitha zakhe zimthathe. Ngakho uyabekela bamthathe. Ake sibone ukuthi kwenzakalani kuJesu khathesi.