UJesu Ubuyela Ezulwini

AMALANGA ayahamba uJesu elokhe esiya kubalandeli bakhe kanengi. Kulesikhathi lapho abonwa ngabalandeli bakhe abangu-500. Uyakwazi yini ukuthi uJesu ukhuluma ngani nxa ebonakala kibo? Ukhuluma ngombuso kaNkulunkulu. UJehova wathuma uJesu emhlabeni ukuze afundise ngoMbuso. UJesu uqhubeka esenza lokhu lalapho esevusiwe kwabafileyo.

Usakhumbula ukuthi umbuso kaNkulunkulu uyini? UMbuso unguhulumende kaNkulunkulu ongokoqobo osezulwini njalo uJesu nguye owakhethwa nguNkulunkulu ukuthi abe yinkosi yawo. Njengoba sesifundile, uJesu watshengisa ukuthi wayezaba yinkosi enhle ngokunika abalambileyo ukudla, ngokusilisa abagulayo langokuvusa abafileyo!

Nxa uJesu esebusa njengenkosi ezulwini okweminyaka engu-1000 kuzabe kunjani emhlabeni? Umhlaba wonke uzantshintshwa ube lipharadayisi elihle. Kuyabe kungasela zimpi, ubugebengu, ukugula lokufa. Siyakwazi ukuthi lokhu kuliqiniso ngoba uNkulunkulu wadala umhlaba ukuthi ube lipharadayisi ukuze abantu bakholise. Yikho uNkulunkulu wayeyenze isivande sase-Edeni ekuqaliseni. UJesu uzaba leqiniso lokuthi okufunwa nguNkulunkulu kuzakwenzakala.

Siyafika isikhathi sokuthi uJesu abuyele ezulwini. UJesu ubeziveza kubalandeli bakhe okwamalanga angu-40. Ngakho bayakwazi sibili ukuthi usephila futhi. Kodwa engakatshiyi abalandeli bakhe uyabatshela: ‘Lingasuki eJerusalema lize lithole umoya ongcwele.’ Umoya ongcwele ungamandla kaNkulunkulu awasebenzisayo. Unjengomoya ovunguzayo njalo uzanceda abalandeli bakhe ukuthi benze intando kaNkulunkulu. Ekucineni uJesu uthi: ‘Kumele litshumayele ngami kuze kube sekucineni komhlaba.’

UJesu esekhulume lokhu, kwenzakala into emangalisayo. Uqalisa ukuya phezulu ezulwini, njengoba umbona lapha. Abafundi bakhe abasamboni ngenxa yokuthi usevalwe liyezi. UJesu uya ezulwini abeseqalisa ukubusa abalandeli bakhe abasemhlabeni.