UStefane Ukhandwa Ngamatshe

INDODA eguqe lapha nguStefane. Ungumfundi kaJesu othembekileyo. Kodwa khangela okwenzakala kuye khathesi! Amadoda la amjikijela ngamatshe amakhulu. Kungani bemzonda kangaka uStefane baze benze into le embi kangaka? Ake sibone.

UNkulunkulu ubesenza ukuthi uStefane enze izimangaliso. Amadoda la kawakuthandi lokhu, ngakho aqalisa ukuphikisana laye ngokutshela kwakhe abantu iqiniso. Kodwa uNkulunkulu unika uStefane inhlakanipho enkulu njalo uStefane utshengisa ukuthi amadoda la abefundisa izinto ezingamanga. Lokhu kubenza bazonde kakhulu. Ngakho bayambamba besebebiza abantu ukuthi bazokhuluma amanga ngaye.

Umphristi omkhulu ubuza uStefane: ‘Izinto lezi ziliqiniso yini?’ UStefane uphendula ngokukhuluma inkulumo enhle kakhulu evela eBhayibhilini. Ekucineni, ukhuluma ngokuthi kudala amadoda amabi ayebazonda kakhulu abaphrofethi bakaJehova. Abesesithi: ‘Linjengalawo madoda. Labulala inceku kaNkulunkulu uJesu, njalo kalizange lilalele imithetho kaNkulunkulu.’

Lokhu kwenza abakhokheli benkolo bazonde kakhulu! Bagedla amazinyo ngenxa yokuzonda. Kodwa uStefane ukhangela phezulu, abesesithi: ‘Khangelani! Ngibona uJesu emi esandleni sikaNkulunkulu sokunene ezulwini.’ Esizwa lokhu, amadoda la avala indlebe zawo abesedumela uStefane. Bayambamba besebemhudulela ngaphandle kwedolobho.

Sebephandle kwedolobho, amanye amadoda akhipha amajazi awo abesewagcinisa indoda esakhulayo okuthiwa nguSawuli. Uyambona yini uSawuli? Amadoda la aqalisa ukujikijela uStefane ngamatshe. UStefane uyaguqa, njengoba umbona, abesekhuleka kuNkulunkulu: ‘Jehova, ungabajeziseli into le embi abayenzayo.’ UStefane uyakwazi ukuthi abanye babo baqilwe ngabakhokheli benkolo. Esetsho njalo, uStefane uyafa.

Nxa omunye umuntu ekwenzela into embi, uyazama ukumzwisa ubuhlungu laye yini kumbe ucele ukuthi uNkulunkulu amzwise ubuhlungu? UStefane loJesu kabazange benzenjalo. Babelomusa lakulabo ababebenzela izinto ezimbi. Kasizameni ukwenza njengabo.