Endleleni Eya eDamaseko

UYAKWAZI yini ukuthi ngubani lo olele phansi? NguSawuli. Khumbula ukuthi nguye owayegcine amajazi abantu ababekhanda uStefane ngamatshe. Khangela ukukhanya okusemfanekisweni! Kwenzakalani?

UStefane esefile, uSawuli ukhokhela ekudingeni abalandeli bakaJesu ukuze abalimaze. Uhamba indlu ngayinye ebahudulela phandle njalo ebafaka emajele. Abafundi abanengi babaleka besiya kwamanye amadolobho, besebeqalisa ukutshumayela “izindaba ezinhle” khonale. Kodwa uSawuli uya kwamanye amadolobho ukuze ayedinga abalandeli bakaJesu. Khathesi uya eDamaseko. Kodwa endleleni kwenzakala into le emangalisayo:

Esahamba kuba lokukhanya okuvela ezulwini inxa zonke kuye. Uwela phansi njengoba sibona lapha. Besekusiba lelizwi elithi: ‘Sawuli, Sawuli! Ungilimazelani na?’ Amadoda aloSawuli ayakubona ukukhanya lokhu njalo ayalizwa ilizwi leli, kodwa kabakuzwisisi okutshiwoyo.

USawuli uyabuza: ‘Ungubani Nkosi?’

Ilizwi lithi: ‘NginguJesu lowo omlimazayo.’ UJesu utsho njalo ngoba nxa uSawuli elimaza abalandeli bakaJesu, uJesu uzwa angani kulinyazwa yena.

USawuli uyabuza: ‘Kumele ngenzeni Nkosi?’

UJesu uthi: ‘Sukuma ungene eDamaseko, khonangale uzatshelwa okumele ukwenze.’ Lapho uSawuli esukuma njalo evula amehlo kaboni lutho. Useyisiphofu! Ngakho amadoda ahamba laye ambamba ngesandla abesengena laye eDamaseko.

UJesu ukhuluma lomunye umfundi wakhe oseDamaseko, esithi: ‘Ananiya, hamba uye endleleni okuthiwa iqondile. Ufike ucele indoda okuthiwa nguSawuli endlini kaJuda. Ngimkhethile ukuthi abe yinceku yami eqakathekileyo.’

U-Ananiya uyalalela. Lapho ehlangana loSawuli, ubeka izandla zakhe phezu kwakhe abesesithi: ‘INkosi ingithume kuwe ukuze uphinde ubone njalo ugcwale umoya ongcwele.’ Masinyane, okunjengenkwethu kukhithika emehlweni kaSawuli abesesenelisa ukubona.

USawuli usetshenziswa ngendlela enkulu ukuthi atshumayele ebantwini bezizwe ezinengi. Ucina esesaziwa ngokuthi ngumphostoli uPhawuli. Sizafunda okunengi ngaye. Kodwa ake siqale sibone ukuthi uNkulunkulu uthuma uPhethro ukuthi ayekwenzani.