Umfana Owajumekayo

KWENZAKALANI lapha? Ulimele kakhulu yini umfana lo olele phansi? Khangela! Omunye wamadoda ophuma endlini nguPhawuli! Uyambona yini uThimothi? Umfana lo olele phansi uwe ewindini yini?

Ye, yikho kanye okwenzakeleyo. UPhawuli ubekhuluma inkulumo kubafundi lapha eThrowa. Uyakwazi ukuthi ngeke aphinde ababone okwesikhathi eside ngoba kumele asuke ngomkhumbi ngelanga elilandelayo. Ukhuluma kuze kube phakathi kobusuku.

Umfana lo okuthiwa nguYuthikhu kade ehlezi ewindini wasejumeka. Uthe ehlezi ewindini, wawa esuka esitezi sesithathu esiya phansi! Yikho ubona abantu laba bedanile. Amadoda la esemphakamisa abona kwenzakele abakwesabayo. Umfana usefile!

UPhawuli uyakubona ukuthi umfana lo usefile abesezilahla phezu kwakhe amgone. Uthi: ‘Lingabi lendaba. Uyaphila!’ Lakanye uyaphila! Yisimangaliso! UPhawuli usemvusile, usephila! Abantu bonke bathaba kakhulu.

Bonke bayabuyela esitezi besebesidla. UPhawuli uqhubeka ekhuluma kuze kube sekuseni. Kodwa khathesi uYuthikhu ngeke ajumeke futhi! Khathesi uPhawuli loThimothi labanye abahamba labo bangena emkhunjini. Uyakwazi yini ukuthi bayangaphi?

UPhawuli usanda kuqedisa uhambo lwakhe lokutshumayela olwesithathu njalo usebuyela ekhaya. Kuhambo lolu, uPhawuli wayehlale yedwa okweminyaka emithathu edolobheni lase-Efesu. Uhambo lolu lude kulolwesibili.

Ngemva kokusuka eThrowa umkhumbi uyama eMilethu okwesikhathi esifitshane. Indawo le iseduze lase-Efesu, ngakho uPhawuli ucela amadoda amadala asebandleni ukuthi abuye eMilethu ukuze akhulume labo okokucina. Esekhulume labo, umkhumbi uyasuka. Amadoda la amadala asedane kakhulu ngoba uPhawuli usehamba!

Ekucineni, umkhumbi uyabuyela eKhesariya. UPhawuli esendlini yomfundi uFiliphi, umphrofethi u-Agabhu uyamxwayisa. Uthi uPhawuli uzabotshwa engahamba eJerusalema. Lakanye lokhu yikho okwenzakalayo. Esengenile ejele okweminyaka emibili eKhesariya, uPhawuli uhanjiswa eRoma ukuze ayethonisiswa ngumbusi weRoma uKhesari. Ake sibone ukuthi kwenzakalani ohambweni lwaseRoma.