IPharadayisi Elitsha Emhlabeni

KHANGELA izihlahla ezinde, amaluba amahle lezintaba ezinde. Yindawo enhle kakhulu leyo. Khangela impala edlela esandleni somfana lowo omncane. Khangela lezilwane lamabhiza angale endaweni elotshani. Awufuni yini ukuhlala endlini esendaweni enhle kangaka?

UNkulunkulu ufuna uhlale kuze kube nininini emhlabeni oyipharadayisi. Kafuni ukuthi uzwe ubuhlungu abantu abanengi ababuzwayo lamuhla. EBhayibhilini kulesithembiso salabo abazahlala epharadayisi elitsha esithi: ‘UNkulunkulu uzakuba labo. Akusayikuba khona ukufa loba ukukhala loba ubuhlungu. Izinto zakudala sezidlulile.’

UJesu uzakuba leqiniso lokuthi untshintsho lolu olumangalisayo luzakwenzakala. Ubona angani untshintsho lolu luzakwenzakala nini? Ye, ngemva kokukhipha bonke ububi kanye labantu ababi emhlabeni. Khumbula ukuthi esesemhlabeni, uJesu wasilisa abantu ababegula imikhuhlane etshiyeneyo njalo wavusa abantu abafileyo. UJesu wenza lokhu ukuze atshengise lokho azakwenza emhlabeni wonke eseyiNkosi yombuso kaNkulunkulu.

Cabanga ukuthi kuzabe kukuhle kangakanani epharadayisi elitsha emhlabeni! UJesu uzabe ebusa ezulwini labanye abantu abakhethayo. Ababusi laba bazanakekela wonke umuntu emhlabeni njalo babe leqiniso lokuthi wonke umuntu uyajabula. Ake sibone ukuthi kumele senzeni ukuze uNkulunkulu asinike ukuphila okungapheliyo epharadayisi lakhe elitsha.