Zamani Ukuthi Ngekhaya Kuhlale Kulokuthula

1. Yiziphi izinto ezingabangela ukuthi abantu baxabane ezimulini?

KUBA kuhle emulini nxa lithandana, lizwisisana futhi lilokuthula. Ngakini kunjalo yini? Kuyadanisa ukuthi ezimulini ezinengi akula ntokozo njalo kuhlala kuliwa ngenxa yezizatho ezitshiyeneyo. Kuyini okuxabanisa abantu ezimulini? Esihlokweni lesi, sizaxoxa ngezinto ezintathu. Ezinye izimuli zilamalunga angena amansonto atshiyeneyo. Ezinye zilobaba kumbe umama owatshada evele elabantwabakhe. Kanti njalo ezinye izimuli zikuthola nzima okokuziphilisa kuze kucine kuxatshanwa ngezindaba zemali. Kodwa izinto ezingaxabanisa abantu kwenye imuli zingaba yinto encane kwenye. Umehluko lo ubangelwa kuyini?

2. Abanye bawadinga ngaphi amacebo okulungisa inhlupho abalazo emulini, kodwa kumele bawadinge ngaphi?

² Okokuqala okungalixabanisa loba okungenza lizwanane yindlela obona ngayo izinto. Nxa ungazama ngenhliziyo yonke ukuzwisisa ukuthi abanye bacabangani, ungakuthola okungenza ukuthi imuli yenu imanyane. Okwesibili yikuthi uwathatha ngaphi amacebo. Abantu abanengi badinga amacebo kwabasebenza labo, kubomakhelwana, kumaphephandaba kumbe kwabanye abantu nje. Kodwa abanye bayakhangela ukuthi iLizwi likaNkulunkulu lithini ngodaba lwabo besebesenza khonokho abayabe bekubalile. Lokhu kungayinceda njani imuli ukuthi ihlale ilokuthula?​—2 KuThimothi 3:16, 17.

NXA INDODA INGAKHONZI NDAWONYE LOMKAYO

3. (a) IBhayibhili lithini ngokutshada lomuntu ongakhonzi laye? (b) Nxa umkakho engakhonzi, ungakulandela njani okutshiwo yiLizwi likaNkulunkulu?

³ IBhayibhili likubeka kucace ukuthi akuqondanga ukutshada lomuntu ongakhonzi laye. (UDutheronomi 7:3, 4; 1 KwabaseKhorinte 7:39) Kodwa ungenzani nxa kuyikuthi wafunda iBhayibhili uvele usutshadile? Lanxa umkakho engazange alamukele iqiniso, khumbula ukuthi izifungo elazenza litshada kazintshintshi. (1 KwabaseKhorinte 7:10) IBhayibhili likhuthaza abatshadileyo ukuthi bangehlukani kanye lokuthi bazame ukulungisa izinto ezibaxabanisayo kulokuthi bazibalekele. (Kwabase-Efesu 5:28-31; KuThithusi 2:4, 5) Kodwa nxa umkakho engafuni lakuzwa ngokholo lwakho-ke? Kungenzakala ukuthi azame ukukwalisa ukuthi uye emihlanganweni yebandla kumbe athi kafuni ukuthi uhambe ungena ezindlini zabantu ubatshumayeza. Ungenzani nxa sekunjalo?

4. Kuyini okunganceda inkosikazi ukuthi imzwisise umkayo?

⁴ Zibuze ukuthi kuyini okwenza umkakho akuthwalise nzima futhi akhathazeke ngawe. (IZaga 16:20, 23) Mhlawumbe yikuthi kaqedisisi ukuthi vele wenzani. Engxenye angabe etshotshozelwa yizihlobo ezihlutshwa yikuthi kawusazenzi ezinye izinto eziqakathekileyo kuzo. Omunye ubaba wathi, “Ngangisithi nxa ngingasala ngedwa ngibone angani sengilahlelwe iganga.” Wayecabanga ukuthi insonto yayisimthathela umkakhe. Kodwa kwakunzima ukuthi amtshele ukuthi wayesiba lesizungu. Ngakho-ke umkakho engabe efuna umtshengise ukuthi ulokhu umthanda njengakuqala lanxa usukhonza uJehova. Zama ukuthola isikhathi sokukwejisa laye.

5. Amazwi athi “njengokufanele iNkosi” atshengisa ukuthi inkosikazi engakhonzi lomkayo kumele yenzeni?

⁵ Kodwa kulokunye okuqakatheke kakhulu okumele ukwenze nxa ufuna izinto zibe ngcono. ILizwi likaNkulunkulu lithi: “Bafazi, zehliseleni phansi kwamadoda enu, njengokufanele iNkosi.” (KwabaseKholose 3:18) Lokhu kutshengisa ukuthi inkosikazi akumelanga izenzele umathanda. Nxa umbhalo lo usithi “njengokufanele iNkosi” utshengisa ukuthi lanxa izehlisa kumkayo akumelanga yephule umthetho weNkosi.

6. Yiwaphi amavesi okumele inkosikazi engumKhristu ihlale iwakhumbula?

⁶ Ukungena imihlangano yebandla lokutshela abanye ngokholo lwethu kuqakatheke kakhulu. Yikho-ke umKhristu akumelanga ayekele ukuzenza izinto lezi. (KwabaseRoma 10:9, 10, 14; KumaHebheru 10:24, 25) Pho kumele wenzeni nxa omunye umuntu efuna ukuthi wephule umthetho kaNkulunkulu? Abaphostoli bakaJesu bona bathi: “Simele silalele uNkulunkulu kulokulalela abantu!” (ImiSebenzi 5:29) Lathi kumele sibalingisele nxa sesifikelwe zinhlupho ezitshiyeneyo. Nxa umthanda uJehova, uzakuba lesibindi sokumkhonza ngendlela ayifunayo. Kodwa umkakho laye uyabe umthanda njalo umhlonipha. Manje kungenzakala yini ukuthi zonke izikhathi wenze inkonzo yakho ngendlela engasoze imcaphule?​—UMathewu 4:10; 1 UJohane 5:3.

7. Inkosikazi engumKhristu kumele izimisele ukwenzani?

⁷ UJesu watsho ukuthi lokhu kwakuzakuba nzima kwezinye izikhathi. Watshela abafundi bakhe ukuthi abanye babo babezahlukuluzwa ngabangakibo ngenxa yokukhetha ukukhonza uNkulunkulu, baze bazwe angathi kulomhedla oqume ubuhlobo babo. (UMathewu 10:34-36) Lokhu kwenzakala komunye udadewethu waseJapan. Kwadlula iminyaka engu-11 umkakhe engafuni ukuthi akhonze. Wayemhlukuluza okuzwisa usizi futhi wayejayele ukumkhiyela phandle. Kodwa udade lo waqinisela. Abangane bakhe ayekhonza labo babemncedisa. Wayehlala ethandaza njalo u-1 Phetro 2:20 wayemduduza kakhulu. Wayengathandabuzi ukuthi nxa wayengaqhubeka ekhonza uJehova, ngelinye ilanga umkakhe laye wayezacina engumKhristu. Lakanye kwaba njalo.

8, 9. Inkosikazi ingenzani nxa ifuna ukuthi umkayo angasoli indlela ekhonza ngayo?

⁸ Kunengi ongakwenza nxa ufuna ukuthi umkakho angakudlisi luklubhu. Ngokwesibonelo, nxa lingazwanani endabeni zokukhonza, woba leqiniso lokuthi kawenzi izinto ezizakwenza ukuthi asole indlela okhonza ngayo. Endlini akuhlale kuhlanzekile. Thandana lamanzi futhi uzilungise kuhle. Mbonge zikhathi zonke njalo uhlale utshengisa ukuthi uyamthanda. Ungamchothozi kodwa mncedise. Mhloniphe, ungazenzeli umathanda. Ungakhwitshizi nxa ekucaphulile. (1 UPhetro 2:21, 23) Kanti njalo ungakhohlwa ukuthi wonke umuntu uyaphambanisa. Nxa lingaxabana, zithobe ube ngowokuqala ukuxolisa.​—Kwabase-Efesu 4:26.

⁹ Mlungisele ukudla kwakhe ngesikhathi lanxa usiya emihlanganweni yebandla. Nxa engekho ngekhaya kungaba lithuba elihle lokuthi uye ekutshumayeleni. Myekele nxa ubona ukuthi kafuni ukuthi umtshumayeze. Kodwa landela okwatshiwo ngumphostoli uPhetro. Wathi: “Ngokunjalo, bafazi zehliseleni kubomkenu ukuze kuthi uma abanye babo bengalikholwa ilizwi, bahugeke ngokuziphatha kwabomkabo kungekho kukhuluma, lapho bebona ukuhlanzeka lenhlonipho yokuphila kwenu.” (1 UPhetro 3:1, 2) Inkosikazi engumKhristu kumele izame ngamandla wonke ukuthi ibe lezithelo zomoya kaNkulunkulu.​—KwabaseGalathiya 5:22, 23.

NXA INKOSIKAZI INGAKHONZI NDAWONYE LOMKAYO

10. Indoda kumele yenzeni nxa yona lomkayo bengakhonzi ndawonye?

¹⁰ Indoda ingenzani nxa yona lomkayo bengakhonzi ndawonye? IBhayibhili lithi: “Uma umzalwane elomfazi ongasilokholwa ovumayo ukuhlala laye, akumelanga amlahle.” (1 KwabaseKhorinte 7:12) Liphinda lithi emadodeni: “Thandani omkenu.”​—KwabaseKholose 3:19.

11. Nxa lingakhonzi ndawonye lenkosikazi yakho kufanele ukhulume njani layo, futhi kuyini okumele ukwenze?

¹¹ Lanxa lingakhonzi ndawonye lenkosikazi yakho, kuqakatheke kakhulu ukuthi umhloniphe futhi uzame ukumzwisisa. Khumbula ukuthi lanxa lingavumelani, laye ungumuntu omdala olelungelo lokuzikhethela afuna ukukukholwa. Nxa uqalisa ukukhuluma laye ngalokho okukholwayo, ungakhangeleli ukuthi uzahle alahle izinto akhula ezikholwa abesevumelana lawe. Kanti njalo akumelanga uhle umtshele ukuthi akukholwayo akuqondanga ngoba kuyabe kuqakatheke kakhulu kuye lakwabangakibo. Bekezela, uzame ukubonisana laye ngeMibhalo. Engxenye uyabe uthatha isikhathi eside usenza imisebenzi yebandla, aze acine esebona angathi kawulandaba laye. Angakhanya angani kafuni sibili ukuthi ukhonze uJehova, kodwa into engabe imkhathaza yikuthi sekukhanuka. Yikho-ke woba lesineke. Nxa uqhubeka utshengisa ukuthi uyamkhathalela, laye angacina eselwamukela ukholo lweqiniso.​—KwabaseKholose 3:12-14; 1 UPhetro 3:8, 9.

NGUBANI OKUFANELE AFUNDISE ABANTWANA?

12. IBhayibhili lithi abantwana kumele bafundiswe ngubani kungelani lokuthi abazali kabakhonzi ndawonye?

¹² Nxa lingakhonzi ndawonye emulini, kwezinye izikhathi kuba lohlupho lokuthi ngubani okumele afundise abantwana ngoNkulunkulu. IBhayibhili lona lithini? Lithi lo ngumsebenzi kababa, kodwa umama laye kumele amncedise. (IZaga 1:8; UGenesisi 18:19; UDutheronomi 11:18, 19) Indoda iyinhloko yemuli kungelani lokuthi iyakhonza kumbe kayikhonzi.

13, 14. Inkosikazi ingenzani nxa umkayo engavumi ukuthi ihambe labantwana emihlanganweni lokuthi ifunde labo?

¹³ Abanye obaba abangakhonziyo bayawavumela amakhosikazi abo ukuthi afundise abantwana ngoNkulunkulu. Kodwa abanye kabafuni lakuzwa. Kumele wenzeni pho nxa umkakho ekwalisa ukuthi uhambe labantwabakho emihlanganweni yebandla njalo engafuni ukuthi ufunde labo iBhayibhili ngekhaya? Lapho-ke kuyabe sekumele ubone ukuthi ungayiphatha njani indaba enjalo, ngoba phela uyabe ufuna ukulalela uJehova uNkulunkulu, ukuzithoba kumkakho oyinhloko kanye lokusiza abantwabakho. Pho ungenzani?

¹⁴ Into yokuqala okumele uyenze yikukhuleka. (KwabaseFiliphi 4:6, 7; 1 UJohane 5:14) Kodwa khumbula ukuthi nguwe okumele uzenzele isinqumo. Zama ukuthi ungamcaphuli futhi ukucacise ukuthi umbona eyinhloko yemuli. Mhlawumbe angacina engasakuhluphi. Ungenelisa ukubafundisa abantwabakho lanxa umkakho ekwalisa ukuthi uhambe labo emihlanganweni kumbe ukuthi ufunde labo iBhayibhili. Indlela okhuluma ngayo nsuku zonke lendlela oziphatha ngayo ingabanceda ukuthi bamthande uJehova futhi balikholwe iLizwi lakhe. Ingabasiza lokuthi bakuhloniphe wena lomkakho, babe lendaba labanye abantu njalo bafunde ukusebenza gadalala. Ngokuya kwesikhathi umkakho angayinanzelela imisebenzi yakho emihle akubone lokuthi uyazama sibili ukuthuthukisa imuli.​—IZaga 23:24.

15. Ubaba okhonzayo ulawuphi umsebenzi?

¹⁵ Nxa kuyikuthi inkosikazi yakho kayikhonzi, nguwe baba olomsebenzi wokondla abantwabakho “ngokufundisa langokulaya kweNkosi.” (Kwabase-Efesu 6:4) Kodwa qhubeka uyiphatha kuhle inkosikazi yakho, uyithande, ube lomusa njalo uzame ukuyizwisisa.

NXA UNGAKHONZI NDAWONYE LABAZALI BAKHO

16, 17. Yiziphi izimiso eziseBhayibhilini okumele zikhunjulwe ngumntwana nxa kuyikuthi kakhonzi labazali bakhe?

¹⁶ Khathesi akusamangalisi ukuthola umntwana engasakhonzi labazali bakhe. Nxa kuyikuthi kawukhonzi labazali bakho, kuleseluleko esiseBhayibhilini esingakunceda.

¹⁷ ILizwi likaNkulunkulu lithi: “Lalelani abazali benu eNkosini, ngoba lokhu kulungile. ‘Hlonipha uyihlo lonyoko.’” (Kwabase-Efesu 6:1, 2) Lokhu kutsho ukuthi kumele ubahloniphe sibili abazali bakho. Lanxa kuqakathekile ukuthi ubalalele, kumele ulalele loNkulunkulu weqiniso. Nxa kuyikuthi umntwana usekhulile okokuthi angazenzela izinqumo, kuyabe sekumele akwazi ukuthi uzavuna akuhlanyelayo. Uyagwetshwa nxa angephula umthetho kahulumende, njalo angephula okaNkulunkulu iBhayibhili lithi: “Omunye lomunye wethu uzabika akwenzayo kuNkulunkulu.”​—KwabaseRoma 14:12.

18, 19. Umntwana ongakhonzi labazali bakhe angenzani ukuze bamzwisise?

¹⁸ Abazali bakho bangakhathazeka nxa ukholo lwakho selusenza ukuthi untshintshe ezinye izinto empilweni yakho. Ngakho-ke zama ukubazwisisa. Akuthandabuzwa ukuthi bazathaba nxa bebona ukuthi ukusebenzisa izimiso eziseBhayibhilini sekusenza ukuthi ubahloniphe kakhulu lokuthi usungumntwana olalelayo futhi osukumela phezulu nxa ethunywa. Kodwa nxa ungasayilandeli eminye imikhuba abayiqakathekisayo kumbe izinto abazikholwayo, bangabona angani usulahla amasiko abo lalokho abakufundisa khona. Mhlawumbe uyabe ususenza izinto ezitshiyene lezenziwa ngabanengi futhi ungasela sifiso sokugijimisana lemali. Ngakho-ke bangesaba ukuthi uzakuba yini emphakathini. Kanti njalo bangacabanga lokuthi usuzibona ungcono kulabo, angani uthi bona balahlekile wena uqondile.

¹⁹ Yikho-ke, zama ukuhlela masinyane ukuthi abazali bakho babonane labadala bebandla kumbe labanye abazalwane okhonza labo abathanda uJehova. Nxusa abazali bakho eWolu yoMbuso ukuze bazizwele ngezabo ukuthi kufundwani njalo bazibonele ukuthi oFakazi bakaJehova ngabantu abanjani. Lokhu kungenza ukuthi bacine sebezwisisa. Abazali bakho bangakwalisa ukuthi ukhonze, batshise amabhuku akho njalo bakwalise lokuya emihlanganweni yebandla. Kodwa nxa ungekho ngekhaya ungalithola ithuba lokubala, elokuxoxa lamanye amaKhristu lelokutshumayela. Ungayekeli ukuthandaza kuJehova. Abanye baze bakhululeke sebekhulile, sebezihlalela bodwa. Lanxa kungaze kube nzima njani, hlala ‘uhlonipha uyihlo lonyoko.’ Yenza okusemandleni akho ukuthi kube lokuthula ngekhaya. (KwabaseRoma 12:17, 18) Kanti njalo okuqakatheke kulakho konke yikuthi uhlale ulobuhlobo obuhle loNkulunkulu.

NXA UBABA KUMBE UMAMA ELABANTWABAKHE

20. Abantwana bangezwa njani nxa kuyikuthi sebesondliwa ngomunye umzali?

²⁰ Ukholo kayisilo lodwa oluxabanisa abantu ezimulini. Minengi kakhulu imizi lapho othola khona ubaba owathatha evele elabantwabakhe kumbe umama owenda elabantwana. Ezimulini ezinjalo abantwana bangaba lomhawu, bamzonde umzali asebelaye, mhlawumbe belokhu besakhumbula obazalayo. Lanxa ezama ukubaphatha kuhle, bangaqhubeka bemzonda. Manje kuyini okunganceda izimuli lezi ukuthi zihlalisane kuhle?

21. Kungani kuqakathekile ukusebenzisa izimiso eziseBhayibhilini lanxa kunzima ukukhulisa abantwana bomkakho?

²¹ Lanxa kunzima ukukhulisa abantwana bomkakho, nanzelela ukuthi izimiso eziseBhayibhilini ezenza ukuthi ezinye izimuli zithokoze ziyasebenza lasemulini yakho. Kwezinye izikhathi ungabona angani kungcono ukungazisebenzisi, kodwa kungakuhlupha phambili. (IHubo 127:1; IZaga 29:15) Zama ngamandla wonke ukuthi uqedisise futhi ube lenhlakanipho. Inhlakanipho izakwenza ukuthi usebenzise izimiso zikaNkulunkulu, usazi ukuthi zizakunceda lakusasa. Ukuqedisisa khona kuzakunceda ukuthi uzwisise ukuthi kungani abantu ngekhaya bekhuluma loba besenza okuthile. Kufanele uzame sibili ukuba lesihawu.​—IZaga 16:21; 24:3; 1 UPhetro 3:8.

22. Kuyini okungenza ukuthi abantwana bangamthandi ubaba loba umama ongabazaliyo?

²² Mhlawumbe ngesikhathi lingakatshadi, abantwana bomkakho babekuthanda. Kodwa engxenye lathi selitshadile izinto zantshintsha. Bangabe belokhu besamkhumbula umzali wabo abangasahlali laye, baze bacabange lokuthi ufuna bathande wena esikhundleni sakhe. Kwezinye izikhathi bangakutshela lokuthi kawusiye baba wabo kumbe kawusiye mama wabo. Amazwi la angakuzwisa ubuhlungu sibili. Lanxa kunjalo, “ungaphangisi ukufuthelana ngaphakathi.” (UmTshumayeli 7:9) Nxa ufuna ukuthi wena labantwana bomkakho lizwanane, kuqakathekile ukuthi ube lokuqedisisa kanye lozwelo.

23. Lingabalaya njani abantwana?

²³ Ukuba ngumuntu oqedisisayo kanye lolozwelo kuqakatheke kakhulu nxa ulaya abantwana. Ungantshintshantshintshi indlela obalaya ngayo. (IZaga 6:20; 13:1) Kodwa awusoze ubalaye ngendlela efananayo ngoba phela abantwana batshiyene. Abanye abazali babona kungcono ukuthi ekuqaliseni omunye lomunye alaye abakhe abantwana. Lanxa kunjalo, kuyabe kumele bavumelane futhi benze abakuvumeleneyo, kungelani lokuthi umntwana ngozalwa ngubaba kumbe ngumama. (IZaga 24:23) Kuqakathekile ukuthi abantwana balalele, kodwa ungakhangeleli ukuthi bazahlala besenza okuqondileyo ngoba phela sonke sazalwa silesono. Ngakho-ke nxa ubalaya ungabajeziseli ugodo, kodwa woba lothando.​—KwabaseKholose 3:21.

24. Kuyini okunganceda ukuthi kungabi lokuziphatha okubi emulini?

²⁴ Ukuhlala phansi likhulume kunganciphisa izinhlupho emulini yenu. Kungalinceda ukuthi lingazikhohlwa izinto eziqakatheke kakhulu empilweni. (Qathanisa loFiliphi 1:9-11.) Kungasiza lokuthi ngamunye abone okufanele akwenze ukuze elikuhlosileyo kuphumelele. Ukuphumelana egcekeni nxa lixoxa lakho kunganceda ukuthi kungabi lokuziphatha okubi emulini. Abantwana abangamankazana kufanele bafundiswe ukuthi kumele bagqoke njani lokuthi baziphathe njani nxa beloyise ongabazaliyo loba belabanewabo abangazalwa labo. Abangabafana bona bangafundiswa ukuthi kumele bamphathe njani unina kanye labodadewabo abangazalwa labo.​—1 KwabaseThesalonika 4:3-8.

25. Kufanele ube ngumuntu onjani nxa ufuna ukuhlalisana kuhle labantwana bomkakho?

²⁵ Kumele ubekezele ukuze ubakhulise kuhle abantwana bomkakho. Kungathatha isikhathi ukuthi lize licine selizwanana. Kungaba nzima kakhulu lokuthi bakuthande njalo bakuhloniphe. Kodwa kungenzakala. Okuqakathekileyo okunganceda ukuthi libe lokuthula emulini yenu yikuthi uhlakaniphe, ube ngumuntu oqedisisayo futhi uzimisele ukuthokozisa uJehova. (IZaga 16:20) Lokhu kungakuphathisa lanxa sekuvuka ezinye izinhlupho.

NXA LIXATSHANISWA YIMALI

26. Ukuthanda imali lokufuna ukunotha kungayiphambanisa njani imuli?

²⁶ Indaba zemali zingenza ukuthi kungabi lokuthula emulini. Kuyadanisa ukuthi ukuthanda imali kanye lokufuna ukunotha kuxabanisa abantu kwezinye izimuli. Nxa kuyikuthi indoda lomkayo bayasebenza kodwa lowo lalowo ufuna ukuzisebenzisela eyakhe imali, kungavuka uthuli. Lanxa kungenzakala ukuthi bengaxabani, imisebenzi yabo ingacina isenza ukuthi baswele lesikhathi sokukwejisa ndawonye. Sekujayelekile ukuthi obaba bayesebenzela khatshana lezimuli zabo okwezinyanga kumbe okweminyaka ukuze bathole imali enengi ukwedlula abangayithola nxa besebenza bengekhaya. Lokhu kungadala izinhlupho ezinengi.

27. Imuli elohlupho lwemali ingenzani?

²⁷ Asingeke sibeke imithetho yokuthi izinhlupho zemali zingalungiswa njani ngoba phela izinswelo zezimuli zitshiyene. Kodwa iBhayibhili linganceda. Ngokwesibonelo uZaga 13:10 utshengisa ukuthi nxa ‘lingemukela ukwelulekwa’ kalisoze lixatshaniswe yizinto ezincane. Lokhu kutsho ukuthi lanxa kuqakathekile ukukhuluma umbono wakho, kumele udinge ukuthi umkakho yena uthini futhi libonisane. Okunye okungalenza lizwanane yikubhala phansi ukuthi imali lingayisebenzisa njani. Kwezinye izikhathi kungadingeka ukuthi wena lomkakho lisebenze, mhlawumbe okwesikhatshana, ukuze lithole imali eyeneleyo yokondla abantwana labanye elibanakekelayo. Nxa lonke selisebenza, indoda kumele ibe leqiniso lokuthi iyasithola isikhathi sokuba lenkosikazi yayo. Yona kanye labantwana bangancedisa ngokwenza eminye imisebenzi yangekhaya ebijayele ukwenziwa ngumkayo.​—KwabaseFiliphi 2:1-4.

28. Kuyini okufanele kwenziwe yimuli ukuze kube lokuthula ngekhaya?

28 Imali iqakathekile sibili, kodwa kufanele likhumbule ukuthi kayisiyo ezalenza lithokoze. Kayisiyo ebambe impilo zenu. (UmTshumayeli 7:12) Ukuyiqakathekisa kakhulu kungenza licine lingasakhonzi kuhle loba selisona. (1 KuThimothi 6:9-12) Ngakho-ke okungcono yikuthi lifune kuqala uMbuso kaNkulunkulu lokulunga kwakhe. Usithembisa ukuthi nxa singenza njalo uzasibusisa asinike esikuswelayo. (UMathewu 6:25-33; KumaHebheru 13:5) Nxa lingaqakathekisa ukukhonza ukwedlula zonke ezinye izinto njalo lenze okufunwa nguNkulunkulu, lizahlalisana kuhle ngekhaya kungelani lokuthi kwezinye izikhathi liyake lihitshane.