Abafileyo Bangaphinda Baphile Yini?

LOKHO OKUTSHIWO LIBHAYIBHILI

“Kuzakuba lokuvuka kwabafileyo..”​—ImiSebenzi 24:15, Holy Bible in Ndebele.

UKUKHOLWA LOKHU KUZAKUNCEDA NGANI?

Kuzakududuza nxa ufelwe yisihlobo sakho.​—2 KwabaseKhorinte 1:3, 4.

Uzakhululeka, ungabe usakwesaba ukufa.​—KumaHebheru 2:15.

Uzakuba lethemba eliqinileyo lokuthi uzaphinda uhlangane lezihlobo zakho ezafayo.​—UJohane 5:​28, 29.

KUMELE SIKUKHOLWE YINI OKUFUNDISWA LIBHAYIBHILI?

Ye, silezizathu ezingaba zintathu zokwenza lokho:

• UNkulunkulu nguye uMdali wezinto eziphilayo. IBhayibhili lithi uJehova uNkulunkulu ‘ngumthombo wokuphila.’ (IHubo 36:9; ImiSebenzi 17:24, 25.) Ulamandla okwenza ukuthi umuntu ofileyo aphinde aphile ngenxa yokuthi nguye owadala konke okuphilayo emhlabeni.

• Endulo, uNkulunkulu wavusa abantu. IBhayibhili likhuluma ngabantu abangu-8 abafayo baphinda bavuswa emhlabeni. Laba bagoqela abadala, abancane, amadoda labesifazana. Abanye babengela sikhathi eside befile kodwa oyedwa wayeselamalanga amane esethuneni.​—UJohane 11:39-44.

• UNkulunkulu uzimisele ukukwenza futhi lokhu. UJehova uyakuzonda ukufa njalo ukubona njengesitha. (1 KwabaseKhorinte 15:26) ‘Ulesifiso’ sokunqoba isitha lesi, aqede ukufa ngesikhathi esevusa abafileyo. Ufisa ukuvusa labo abasenkumbulweni yakhe njalo ababone bephila futhi emhlabeni.​—UJobe 14:14, 15.