Kubonga Oyedwa Obelobulephero

Amacebo eSanihedrini okuthi uJesu abulawe kawaphumeleli ngenxa yokuthi uJesu uyasuka aye edolobheni lako-Efrayimi elingabe lisenyakatho mpumalanga kweJerusalema. Uhlala lapho labafundi bakhe njalo ukhatshana lezitha zakhe. (UJohane 11:54) Kodwa iPhasika lika-33 C.E. seliseduze yikho ngesikhatshana uJesu uyaqhubeka ngohambo. Udabula eSamariya elubangise enyakatho aze ayefika eGalile njalo lolu luhambo lwakhe lokucina endaweni le njengoba esezakufa.

UJesu uhamba edabula phakathi kwezigaba ezitshiyeneyo futhi uthi esendleleni ahlangane lamadoda alitshumi alobulephero. Kwesinye isikhathi umkhuhlane lo ungabangela ukuthi inyama eseminweni lemazwaneni kanye lasendlebeni idleke kancane kancane. (AmaNani 12:10-12) UMthetho kaNkulunkulu uthi umuntu olobulephero kumele amemeze esithi “Ngingcolile! Ngingcolile!” njalo ahlale khatshana labantu.​—ULevi 13:45, 46.

Amadoda alitshumi alobulephero alandela okutshiwo nguMthetho, kawasondeli kuJesu. Amemeza esithi: “Jesu, Mfundisi, sizwele isihawu!” UJesu uthi ebona amadoda la, athi kuwo: “Hambani liyeziveza kubaphristi.” (ULukha 17:13, 14) Lokhu kutshengisa ukuthi uJesu uyawuhlonipha uMthetho kaNkulunkulu ngoba wona uthi umphristi nguye okumele atsho ukuthi umuntu obelobulephero usesilile yini. Ngemva kwalokhu umuntu lo usengabuyela ayehlala labanye abantu.​—ULevi 13:9-17.

Amadoda la ayakholwa ukuthi uJesu ulawo amandla okuwelapha. Ahle aye kubaphristi lanxa engakasili. Athi esendleleni ananzelele ukuthi asesilisiwe. Ukholo lwawo kuJesu lwenze asiliswa.

Amadoda ayisitshiyagalolunye ayaqhubeka ngohambo lwawo kodwa eyodwa engumSamariya iyaphenduka iyedinga uJesu. Indoda le ifuna ukumbonga ngenxa yokuthi uyisilisile. “Idumisa uNkulunkulu ngelizwi elikhulu” ngoba iyananzelela ukuthi ngamandla kaNkulunkulu enze yasila. (ULukha 17:15) Ifika izilahle phansi phambi kukaJesu imbonge.

UJesu ukhuluma labantu abakhonapho athi: “Bonke abalitshumi bahlanjululiwe angithi? Pho bangaphi abayisitshiyagalolunye? Litsho ukuthi kakho loyedwa ophenduke wazodumisa uNkulunkulu ngaphandle kwendoda le evela kwesinye isizwe?” Ngemva kwalokhu uJesu utshela indoda engumSamariya athi: “Sukuma uzihambele; ukholo lwakho lukusilisile.”​—ULukha 17:17-19.

Isimangaliso uJesu asenzileyo sokusilisa amadoda alitshumi abelobulephero sitshengisa ukuthi uNkulunkulu lokhu eqhubeka emnika amandla okwenza izimangaliso. Kanti njalo kungenzeka ukuthi indoda ephenduke yazobonga isisendleleni eya ekuphileni okuphakade. Esikhathini esiphila kuso uNkulunkulu kasazenzi izimangaliso ezinjalo. Lanxa kunjalo, ukukholwa kuJesu kungenza sibe sendleleni eya ekuphileni okuphakade. Siyatshengisa yini ukuthi siyabonga njengendoda engumSamariya?