Izindawo Zethu Zokukhonzela

AMAKHRISTU eqiniso alalela umlayo wokuhlangana ndawonye ukuze afundiswe njalo akhuthazane. (Heb. 10:23-25) Indawo yokuqala yokukhonzela eyasetshenziswa ngabako-Israyeli kwakuthiwa ‘yithabanikeli’ loba ‘ithente lokuhlanganela.’ (Eks. 39:32, 40) Ngokuya kwesikhathi, uSolomoni indodana kaDavida wakha indlu loba ithempeli elalizakwenza uNkulunkulu adunyiswe. (1 AmaKho. 9:3) Ngemva kokudilizwa kwethempeli leli ngo-607 B.C.E., amaJuda aqalisa ukukhonzela ezindaweni ezazibizwa ngokuthi ngamasinagogi. Ngokuhamba kwesikhathi ithempeli leli lakhiwa kutsha laphinda laba yindawo yokukhonzela. UJesu wayefundisela emasinagogi lasethempelini. (Luk. 4:16; Joh. 18:20) Kwesinye isikhathi wayehlangana labantu entabeni.—Mat. 5:1–7:29.

² Ngemva kokufa kukaJesu, amaKhristu ayehlangana ezindaweni zomphakathi lasezindlini zabazalwane ukuze axoxe ngeMibhalo futhi akhuthazane. (ImiSeb. 19:8, 9; Rom. 16:3, 5; Kol. 4:15; Filim. 2) Kwezinye izikhathi ayehlangana ezindaweni ezicatshileyo ukuze angahlaselwa yizitha. Kuyakhanya-ke ukuthi izinceku zikaNkulunkulu ezaphila endulo zazikuqakathekisa ukuhlangana ndawonye ukuze ‘zifundiswe nguJehova.’—Isaya. 54:13.

³ Lalamuhla imihlangano yethu yenzelwa ezindaweni zomphakathi lasezindlini zabazalwane. Izikhathi ezinengi imihlangano yokuya ekutshumayeleni yenzelwa ezindlini zabazalwane. Abazalwane laba bakubona kuyisibusiso ukuthi izindlu zabo zisetshenziswe ngalindlela futhi lokhu kuyabanceda ukuthi babe seduze loJehova.

IWOLU YOMBUSO

⁴ Izikhathi ezinengi oFakazi bakaJehova bahlangana ezindaweni ezibizwa ngokuthi ngamaWolu oMbuso. Kuyathengwa indawo besekusakhiwa iWolu yoMbuso kumbe kuthengwe isakhiwo besesilungiswa. Ukuze kongiwe imali njalo izakhiwo zethu zisetshenziswe ngokugcweleyo, amabandla athile angacelwa ukuthi asebenzise iwolu eyodwa nxa izimo zivuma. Kwezinye indawo kusetshenziswa amawolu omphakathi. Amawolu asanda kwakhiwa loba lawo alezinto ezinengi kakhulu ezilungisiweyo ayanikelwa kuJehova engakaqalisi ukusetshenziswa. Kodwa nxa kulungiswe izinto ezincane asikho isidingo sokuyinikela.

⁵ IWolu yoMbuso akumelanga ibe yisakhiwo esenzelwe ukubukisa kumbe ukuzibonakalisa. Lanxa indlela amawolu akhiwa ngayo itshiyana kusiya ngendawo, okuqakathekileyo yikuthi sikhonzela kuwo. (ImiSeb. 17:24) IWolu yoMbuso kumele ibe yisakhiwo esifaneleyo ukwenzela imihlangano yobuKhristu.

⁶ Ibandla ngalinye liyanikela ukuze kubhadalwe izindleko zokunakekela iWolu yoMbuso eliyisebenzisayo. Akucelwa nkongozelo kodwa ewolu ngayinye kulamabhokisi eminikelo lapho wonke umuntu angaphosela khona imali ezasetshenziswa ukunakekela iwolu. Abanikelayo benza ngokuzithandela langokusuka enhliziyweni.—2 Khor. 9:7.

⁷ Bonke ebandleni bakubona kuyisibusiso ukunikela ukuze kunakekelwe iWolu yoMbuso kanye lokuncedisa ukuyiklina lokuyilungisa. Kukhethwa umdala loba inceku ekhonzayo ezahlela ukuthi kuzabe kuklinwa njani. Okujayelekileyo yikuthi amaqembu ayatshintshana ukuklina iWolu yoMbuso ekhokhelwa ngababonisi bamaqembu kumbe abasekeli babo. IWolu yoMbuso kumele ihlale ihlanzekile phakathi laphandle ukuze imele kuhle ibizo likaJehova kanye lenhlanganiso yakhe.

⁸ Nxa iwolu isetshenziswa ngamabandla amanengi, abadala bamabandla la kumele bahlangane ukuze babumbe IKhomithi Ebona Ngokunakekelwa KweWolu YoMbuso eyiyo ezabe ikhangele konke okuphathelane lewolu kanye lezinto ezikuyo. Kufanele bakhethe lomzalwane ozakuba ngumhleli wayo. Ikhomithi le ikhangela umsebenzi wokuklina lokulungisa iwolu lokuba leqiniso lokuthi zonke izinto ezifunakalayo zihlala zikhona. Yikho kuqakathekile ukuthi amabandla asebenzisa iwolu abambisane.

⁹ Kwezinye izikhathi amabandla ayatshintshana izikhathi zokungena imihlangano nxa esebenzisa iwolu eyodwa. Abadala kufanele batshengise ukuthi balothando lobuzalwane lokuthi bangqondonye nxa bexoxa ngendaba le. (Flp. 2:2-4; 1 Phet. 3:8) Akulabandla okumele lenzele abanye izinqumo endabeni le. Nxa kulebandla elivakatshelwe ngumbonisi wesiqinti, amanye amabandla angatshintsha izikhathi zawo zokungena imihlangano ngaleyoviki.

¹⁰ Inkulumo yomtshado loba eyomngcwabo ingenzelwa eWolu yoMbuso nxa iKhomithi Yenkonzo Yebandla ivumile. Abadala abakukhomithi le kumele baqale bahlolisise isicelo esifakiweyo besebesenza isinqumo belandela iziqondiso ezivela egatsheni.

¹¹ Abavunyelwa ukuthi basebenzise iWolu yoMbuso kumele baziphathe ngendlela etshengisa ukuthi bangamaKhristu eqiniso. Akumelanga benze loba yini engakhuba abanye ebandleni kumbe yenze abantu bakhulume kubi ngoJehova langebandla. (Flp. 2:14, 15) AmaWolu oMbuso angasetshenziswa ukwenzela ezinye inhlelo eziphathelane lokukhonza ezinjengeSikolo Senkonzo SoMbuso leSikolo Senkonzo SamaPhayona.

¹² Bonke ebandleni kufanele batshengise ukuthi bayayihlonipha indawo abakhonzela kuyo. Ngokwesibonelo indlela esiziphatha ngayo, esigqoka ngayo, lesizilungisa ngayo kumele ibe lesithunzi njalo itshengise ukuthi sikhonza uJehova. (UmTshu. 5:1; 1 Tim. 2:9, 10) Singenza njalo kuzakhanya ukuthi siyayiqakathekisa imihlangano yethu.

¹³ Kuqakathekile ukuthi kube lokuhleleka ngesikhathi semihlangano. Kuhle ukuthi abantwana bahlale labazali babo. Kwesinye isikhathi kungadingakala ukuthi abalabantwana abancane baphume labo phandle, yikho kumele bahlalele lapho okuzakuba lula khona ukuthi baphume bengaphambanisanga abanye kakhulu.

¹⁴ Kukhethwa abazalwane abafaneleyo ukuthi babe ngama-asha emihlanganweni yebandla. Kufanele bananzelele izinto ezenzakalayo, babe lomusa futhi batshengise ukuthi bayazwisisa. Imisebenzi eyenziwa ngama-asha igoqela ukwemukela abantu abaqalisa ukufika ewolu lokubenza bakhululeke, ukudingela abaphuzileyo indawo yokuhlala, ukubala abantu, ukuvula kanye lokuvala amawindi. Kanti njalo nxa kulesidingo, ama-asha angacela abazali ukuthi bakhangele abantwababo bangagijigijimi ewolu njalo bangadlaleli eplathifomu. Kufanele amcele ngomusa umzali olomntwana ohluphayo ukuthi aphume laye phandle ukuze angaphambanisi abanye. Umsebenzi wama-asha wenza wonke umuntu ebandleni ayikholise imihlangano. Kuhle ukuthi ama-asha kube ngabadala kanye lezinceku ezikhonzayo.

UKWAKHIWA KWAMAWOLU OMBUSO

¹⁵ Ngesikhathi sabaphostoli, amanye amaKhristu ayenothile ukwedlula amanye, yikho uPhawuli wabhala wathi: “Ngifuna kube lokulingana, inala elilayo khathesi ivale ukuswela kwabo, lenala yabo ivale ukuswela kwenu, besekusiba lokulingana.” (2 Khor. 8:14) Lalamuhla ‘kulokulingana’ okunjalo. Iminikelo ekhitshwa ngamabandla emhlabeni wonke iyahlanganiswa ibisisetshenziswa ekwakheni amaWolu oMbuso lasekulungiseni amanye. Inhlanganiso kanye labafowethu abancediswa yiminikelo le bayayibonga kakhulu indlela abafowethu labodadewethu abazimisele ngayo ukuncedisa ngeminikelo yabo.

¹⁶ Iwofisi yegatsha yiyo ehlelayo ukuthi amabandla azangenela kuwaphi amaWolu oMbuso kusiya ngendawo akuyo. Yiyo futhi ekhangela ukuthi yiziphi indawo ezidinga amaWolu oMbuso lokuthi yiwaphi afuna ukulungiswa. Nxa kungaba lomonakalo obangelwe yimvelo endaweni ethile, igatsha liyalungisa amaWolu oMbuso njalo kwezinye izikhathi liyalungisa lezindlu zabazalwane.

¹⁷ Iwofisi yegatsha iyakhetha amavolontiya atshiyeneyo azancedisa ekudingeni indawo zokwakha amaWolu oMbuso, ekudwebeni amapulani lasekuceleni imvumo yokwakha kuziphathamandla. Amanye njalo amavolontiya ancedisa ekwakhiweni kwamawolu lasekulungiseni lawo adinga ukulungiswa. Kwamanye amazwe kufunakala amavolontiya amanengi ngoba kulesidingo esikhulu samaWolu oMbuso. Yikho bonke abamemezeli ababhabhathiziweyo abalesifiso sokuncedisa emsebenzini lo bangafila amafomu besebewanika abazalwane abakuKhomithi Yenkonzo emabandleni abakuwo. Abamemezeli abangabhabhathizwanga labo bangancedisa nxa kulungiswa iWolu yoMbuso abangenela kuyo.

AMAWOLU EMIHLANGANO EMIKHULU

¹⁸ AmaKhristu akuqala ayejayele ukuhlangana engamaqembu amancane kodwa ngezinye izikhathi ayehlangana ‘elixuku elikhulu.’ (ImiSeb. 11:26) Lalamuhla abantu bakaJehova bayahlangana bebanengi emihlanganweni yeziqinti leyezabelo. Imihlangano le ijayele ukwenzelwa ezindaweni ezibhadalelwayo kodwa kwezinye indawo kuyakhiwa iwolu yokukhonzela ebizwa ngokuthi yiWolu yeMihlangano Emikhulu.

¹⁹ Kwezinye izikhathi kuyathengwa isakhiwo besesilungiswa sibe yiWolu yeMihlangano Emikhulu. Kodwa izikhathi ezinengi kuyathengwa indawo besekusakhiwa. AmaWolu eMihlangano Emikhulu ayatshiyana ubukhulu kusiya ngendawo. Iwofisi yegatsha iqala ihlolisise izindleko lokuthi iwolu leyo izabe isetshenziswa kangaki ingakathengi indawo loba isakhiwo esizakuba yiWolu yeMihlangano Emikhulu.

²⁰ Abazalwane abakhangela ngokusetshenziswa kweWolu yeMihlangano Emikhulu lokunakekelwa kwayo bakhethwa yiwofisi yegatsha. Kuyahlelwa lokuthi iziqinti zibe lengxenye ekuklineni indawo le maviki wonke, kabili ngomnyaka langesikhathi kusenziwa i-maintainance. Kuqakathekile ukuthi abazalwane bazinikele ngenhliziyo yonke ukuze basekele uhlelo lolu.—Hubo. 110:3; Mal. 1:10.

²¹ Kwezinye izikhathi iWolu yeMihlangano Emikhulu ingasetshenziswa nxa kulenhlelo ezinjengezikolo zenhlanganiso kanye lemihlangano yabadala lababonisi beziqinti. IWolu yeMihlangano Emikhulu layo yindawo yokukhonzela enikelwe kuJehova njengeWolu yoMbuso. Yikho indlela esiziphatha ngayo, esigqoka ngayo, lesizilungisa ngayo nxa sisendaweni le kumele ibe lesithunzi.

²² Kulezinsuku zokucina zomumo lo wezinto, abantu abanengi baba yingxenye yenhlanganiso kaNkulunkulu. Lokhu kuyibufakazi bokuthi uJehova uyawubusisa umsebenzi esiwenzayo. (Isaya. 60:8, 10, 11, 22) Yikho kumele sisekele ukwakhiwa lokunakekelwa kwezindawo zethu zokukhonzela njalo sizigcine zihlanzekile. Singenza njalo, kuzakhanya ukuthi siyaziqakathekisa indawo lezi esihlangana kuzo ukuze sikhuthazane njengoba usuku lukaJehova lusondela.