Ukusekela Umsebenzi WoMbuso Elizweni Lakithi Lasemhlabeni Wonke

OFAKAZI BAKAJEHOVA bagcwalisa isiphrofetho esakhulunywa nguJesu esimayelana lensuku zokucina ngokutshumayela izindaba ezinhle “kuze kuyefika emaphethelweni omhlaba.” (ImiSeb. 1:8; Mat. 24:14) Basebenzisa isikhathi lamandla abo ukuze benze imisebenzi enceda abanye. Kanti njalo babeka uMbuso kuqala ngoba bayamthemba uJehova ukuthi uzabanakekela ngakho konke abakudingayo. (Mat. 6:25-34; 1 Khor. 3:5-9) Impumela eba khona itshengisa ukuthi uJehova uyawubusisa umsebenzi abawenzayo.

UKUSEKELA UMSEBENZI WOMBUSO EMHLABENI WONKE

² Abantu bajayele ukubuza ukuthi siyithatha ngaphi imali nxa besibona sitshumayela njalo sinika abantu amaBhayibhili lamabhuku ethu mahala. Kuliqiniso sibili ukuthi ukuhumutsha lokuprinta amaBhayibhili lamabhuku kudinga imali enengi. Okunye okudulayo yikwakha kanye lokunakekela amaBhetheli lapho okusebenzela khona labo abadindayo labakhangele umsebenzi wokutshumayela leminye imisebenzi etshiyeneyo. Kanti njalo ababonisi beziqinti, abanali, amaphayona aqakathekileyo labanye abasenkonzweni eqakathekileyo yesikhathi sonke labo kumele banakekelwe ngemadlana ethile ukuze baqhubeke ngomsebenzi abawenzayo. Yikho umsebenzi wokutshumayela izindaba ezinhle owenziwa emhlabeni wonke udinga imali enengi sibili. Ivela ngaphi leyomali?

³ Abanye abantu abangayisibo oFakazi bayanikela ukuze batshengise ukuthi bayawuqakathekisa umsebenzi wokutshumayela esiwenza emhlabeni wonke. Kodwa abawusekela kakhulu ngoFakazi bakaJehova njalo abanye bakhona bahle bayithumele ewofisini yegatsha iminikelo yabo. Bakwenza ngenhliziyo yonke belingisela izinceku zikaNkulunkulu zasendulo ezancedisa ngesikhathi kusakhiwa indawo yokukhonzela uJehova. (Eks. 35:20-29; 1 ImiLan. 29:9) Abanye babhala amawili benikela ngempahla yabo ikanti eminye iminikelo ivela emabandleni laseziqintini. Iminikelo yonke le yenza kube lula ukuthi umsebenzi uqhubekele phambili.

⁴ OFakazi bakaJehova bakubona kuyisibusiso ukusebenzisa imali kanye lempahla yabo ukuze bancedise ekuthuthukiseni umsebenzi wokutshumayela. UJesu labafundi bakhe babelebhokisi ababegcina kulo imali yokubhadala izindleko. (Joh. 13:29) IBhayibhili lisitshela ngabesifazana ababencedisa uJesu labafundi bakhe ngezinto ababelazo. (Mak. 15:40, 41; Luk. 8:3) Umphostoli uPhawuli laye wemukela iminikelo eyayivela kubazalwane ababezimisele ukumncedisa ukuze izindaba ezinhle ziqhubekele phambili. (Flp. 4:14-16; 1 Thes. 2:9) Lalamuhla oFakazi bakaJehova balingisela indlela izinceku zikaNkulunkulu zakudala ezazizimisele ngayo ukunikela. Lokhu kwenza kube lula ukuthi abantu abafuna ukwazi iqiniso benelise ukuthola “amanzi okuphila kungelambadalo.”—Isam. 22:17.

UKUBHADALA IZINDLEKO ZEBANDLA

⁵ Iminikelo ekhitshwa ngabafowethu labodadewethu ebandleni isetshenziswa ukubhadala izindleko zebandla. Akucelwa nkongozelo njalo akulamthetho otshoyo ukuthi umuntu ngamunye kumele akhiphe malini. Kulamabhokisi eminikelo endaweni esikhonzela kuzo ukuze ngamunye enelise ukunikela ‘ngalokho akukhethileyo enhliziyweni yakhe.’—2 Khor. 9:7.

⁶ Imali ephoselwa ebhokisini lezidingo zebandla kufanele iqale isetshenziswe ukubhadala yonke imithelo yeWolu yoMbuso kanye lezindleko zokuyilungisa. Ngemva kwalokho iqula labadala selingahlela ukuthi eyinye imali ithunyezwe ewofisini yegatsha ukuze incedise emsebenzini wokutshumayela. Ibandla kumele lenze isinqumo sokuthi kuzahanjiswa malini. Iminikelo le evela emabandleni isetshenziswa ukuncedisa emsebenzini owenziwa emhlabeni wonke. Nxa abantu benikela ebandleni, akusoze kube lesizatho sokuthi kuhlale kulezaziso ezikhuluma ngeminikelo.

INDLELA IMINIKELO EGCINWA NGAYO

⁷ Ngemva kwemihlangano, abazalwane ababili bayakhipha imali emabhokisini eminikelo besebebhala phansi ukuthi kutholakale malini. (2 AmaKho. 12:9, 10; 2 Khor. 8:20) Iqula labadala kufanele libone ukuthi imali le igcinwa kuhle ize ithunyezwe ewofisini yegatsha kumbe isetshenziswe kokunye okudingakalayo ebandleni. Umzalwane obekwe ukuthi akhangele izimali uyabhala nyanga zonke ukuthi imali engenileyo isetshenziswe njani ukuze ibandla lihlale likwazi. Ngemva kwenyanga ezintathu, umhleli wequla labadala kumele ahlele ukuthi wonke amabhuku ezimali ahlolisiswe.

UKUBHADALA IZINDLEKO ZESIQINTI

⁸ Imali esetshenziswa ukubhadala izindleko zomhlangano wesiqinti lokunye okudingakalayo kulesosiqinti isuka emabandleni akulesosiqinti. Emihlanganweni yesiqinti kuba lamabhokisi eminikelo ukuze abafowethu labodadewethu banikele ngokuzithandela. Kanti njalo abamemezeli banganikela loba nini ukuze kubhadalwe izindleko zesiqinti.

⁹ Kukhangelelwe ukuthi isiqinti senelise ukuzibhadalela izindleko zaso njalo nxa kulemali eseleyo ingathunyelwa ewofisini yegatsha ukuze incedise emsebenzini womhlaba wonke. Nxa kungelamali eyeneleyo yokubhadala izindleko zomhlangano wesiqinti kumbe eyokubhadalela indawo okuzangenelwa kuyo umhlangano olandelayo, umbonisi wesiqinti kumele acele amabandla ukuthi anikele. Iqula ngalinye labadala abakulesosiqinti kumele lixoxe ngayo indaba le beselibona ukuthi kungakhitshwa malini. Ngemva kwalokho ibandla lingenza isinqumo sokuthi lizahambisa malini.

¹⁰ Nxa kungadingakala ukuthi kuxoxwe ngezimali zesiqinti, abadala kumele bahlangane ngelanga lomhlangano wesiqinti. Kufanele batsho ukuthi bazakhipha malini ukuze kubhadalwe ezinye izindleko zesiqinti ezingaphathelananga lomhlangano. Izinqumo lezi kumele zibhalwe phansi njalo kufanele abadala batshelwe sonke isikhathi nxa kuzathengwa loba kubhadalwe izindleko ezingayisizo zomhlangano.

¹¹ Amabhuku ezimali zesiqinti ayahlolisiswa ngemva kwesikhathi esithile.

UKUNCEDISA ABASWELAYO

¹² Eyinye indlela uJesu labafundi bakhe ababesebenzisa ngayo imali ababeyigcina ebhokisini yikuncedisa abaswelayo. (Mak. 14:3-5; Joh. 13:29) AmaKhristu alokhu elomlandu ofananayo ngoba uJesu wathi: ‘Abayanga lizahlala lilabo.’ (Mak. 14:7) OFakazi bakaJehova bakwenza njani lokhu lamuhla?

¹³ Kwesinye isikhathi abanye ebandleni bangadinga ukuncediswa ngenxa yokugula, ukuguga kumbe ezinye izimo eziphezu kwamandla abo. Kuhle ukuthi izihlobo labanye ebandleni babancedise abantu abanjalo. Bangenza njalo bayabe belandela lokho okwatshiwo ngumphostoli uJohane owathi: “Loba ngubani olezinto zomhlaba lo zokuziphilisa obona umfowabo eswela kodwa ale ukumenzela isihawu, uyabe emthanda yini uNkulunkulu? Bantwanyana, akumelanga lithande ngelizwi kumbe ngomlomo kuphela, kodwa ngezenzo langeqiniso.” (1 Joh. 3:17, 18; 2 Thes. 3:6-12) Ukukhonza kweqiniso kugoqela ukuncedisa esikhonza labo abadinga usizo.—Jak. 1:27; 2:14-17.

¹⁴ Encwadini yokuqala ayibhalela uThimothi, umphostoli uPhawuli wakhuluma ngokuthi abaswelayo bangancediswa njani. Iseluleko sakhe sitholakala ku-1 Thimothi 5:3-21. UmKhristu ngamunye ulomlandu wokunakekela imuli yakhe. Abagulayo loba abagugileyo kufanele bancediswe ngabantwababo, abazukulu loba ezinye izihlobo eziseduze. Kwezinye izikhathi uhulumende angaba lenhlelo zokuncedisa abantu abanjalo, yikho izihlobo zabo zingabasiza ukuthi bayebhalisa. Zingabakhona sibili izimo lapho ibandla okumele lincedise khona abafowethu labodadewethu abathile asebelesikhathi eside besenza kuhle ebandleni. Nxa labobantu bengelazihlobo ezingabancedisa njalo lohulumende engelanhlelo ezingabaphathisa, iqula labadala lingahlela ukuthi bancediswe. AmaKhristu akubona kuyisibusiso ukuncedisa abanye.

¹⁵ Okunye okungenza abafowethu labodadewethu baswele yikuzamazama komhlaba, izikhukhula, indlala, ukuhlukuluzwa loba ezinye nje inhlupho ezingabavelela kulezinsuku zokucina. (Mat. 24:7-9) Kungenzakala ukuthi amabandla akulezondawo angabi lakho angancedisa ngakho abanye, yikho iQula Elibusayo lingacela abafowethu abahlala kwamanye amazwe ukuthi bancedise. Lokhu yikho kanye okwenziwa ngamaKhristu ase-Asia Minor ngesikhathi encedisa amaKhristu aseJudiya ayephakathi kwendlala enzima. (1 Khor. 16:1-4; 2 Khor. 9:1-5) Nxa singalingisela isibonelo samaKhristu la, kuzakhanya ukuthi siyabathanda abafowethu labodadewethu lokuthi singabalandeli bakaJesu Khristu beqiniso.—Joh. 13:35.

UKUHANJISWA KWAMABHUKU ETHU

¹⁶ AmaBhayibhili kanye lamabhuku adindwa yinhlanganiso ayanceda kakhulu ukuthi izindaba zoMbuso zitshunyayelwe. Izikhathi ezinengi kukhethwa inceku ekhonzayo ukuthi yenze umsebenzi wokuhambisa izicelo zamabhuku egatsheni lokunika abamemezeli amabhuku nxa esekhona. Bayabhala phansi inani lamabhuku asetshenziswa ngabamemezeli ebandleni ukuze babekwazi ukuthi bacele anganani. Abazalwane abacelwa ukuthi benze umsebenzi lo kufanele bawuqakathekise kakhulu.

¹⁷ Njengoba singamaKhristu azinikeleyo kuNkulunkulu, siyakwazi ukuthi iziphiwo esilazo, isikhathi, impahla esilayo kanye lempilo yethu yizipho ezivela kuJehova njalo kumele sizisebenzise ekumkhonzeni. (Luk. 17:10; 1 Khor. 4:7) Ukuzisebenzisa kuhle izipho lezi kuzatshengisa ukuthi simthanda kakhulu uJehova. Sonke sifisa ukumdumisa ngokumupha okungcono esilakho ngoba siyakwazi ukuthi uyathokoza nxa singenza njalo ngenhliziyo yonke. (Zaga. 3:9; Mak. 14:3-9; Luk. 21:1-4; Kol. 3:23, 24) UJesu wathi: “Lamukele mahala, phanini mahala.” (Mat. 10:8) Nxa singasebenza ngenhliziyo yonke ekukhonzeni uJehova sizathokoza kakhulu.—ImiSeb. 20:35.