“Konke Elikwenzayo Kwenzeleni Inkazimulo KaNkulunkulu”

KUQAKATHEKILE ukuthi konke esikwenzayo lesikukhulumayo kukhazimulise uJehova njengoba sizinikele kuye. Umphostoli uPhawuli wathi: “Ngakho nxa lisidla kumbe linatha kumbe lisenza loba yini, konke elikwenzayo kwenzeleni inkazimulo kaNkulunkulu.” (1 Khor. 10:31) Lokhu kutsho ukuthi kumele silandele izimiso zikaJehova eziyizo ezitshengisa ukuthi ungcwele. (Kol. 3:10) Kufanele silingisele uNkulunkulu endabeni yokuba ngcwele.—Efe. 5:1, 2.

² Umphostoli uPhetro wabhalela amaKhristu wathi: “Njengoba lingabantwana abalalelayo, yekelani ukubunjwa yizifiso elalilazo lingakabi lolwazi, kodwa libe ngcwele kukho konke ukuziphatha kwenu, njengaye oNgcwele owalibizayo, ngoba kubhaliwe ukuthi: ‘Kumele libe ngcwele ngoba lami ngingcwele.’” (1 Phet. 1:14-16) Lalamuhla kukhangelelwe ukuthi sonke ebandleni sibengcwele njengoba nje lama-Israyeli endulo kwakumele abengcwele. Kufanele singabi lasici njalo singangcoliswa yisono loba izinto ezimbi ezisemhlabeni. Singenza njalo kuzakhanya ukuthi sizinikele kuNkulunkulu.—Eks. 20:5.

³ Ukuze sihlale singcwele kumele silandele imithetho kanye lezimiso zikaJehova eziseMibhalweni eNgcwele. (2 Tim. 3:16) Ukufunda iBhayibhili kusincede ukuthi sazi uJehova lezindlela zakhe futhi sisondele kuye. Kwenze sabona lokuthi kufanele siqakathekise uMbuso kaNkulunkulu kanye lokwenza intando yakhe. (Mat. 6:33; Rom. 12:2) Kanti njalo kwenze sazimisela lokugqoka ubuntu obutsha.—Efe. 4:22-24.

UKUHLANZEKA EKUKHONZENI LASEKUZIPHATHENI

⁴ Akulula ukulandela izimiso zikaJehova ngoba uSathane uDeveli, isitha sethu esikhulu, ufuna ukusiphambula eqinisweni. Kanti njalo isono esilaso kanye labantu esiphila labo benza kube nzima kwezinye izikhathi. Kufanele silwe ngamandla ethu wonke nxa sifuna ukuhlala sizinikele kuJehova. IMibhalo isitshela ukuthi akumelanga simangale nxa sihlangana lezilingo kumbe ukuphikiswa ngoba vele kumele sihlupheke ngenxa yokwenza okulungileyo. (2 Tim. 3:12) Kumele sithokoze nxa sihlukuluzwa ngoba kuyibufakazi bokuthi senza intando kaNkulunkulu.—1 Phet. 3:14-16; 4: 12, 14-16.

⁵ Lanxa uJesu wayengelasono, wafunda ukulalela ezintweni ahlupheka ngazo. Kazange avume ukulingwa nguSathane loba ukuba yingxenye yomhlaba. (Mat. 4:1-11; Joh. 6:15) Lanxa ukuhlala ethembekile kwabangela ukuthi azondwe, kazange ayekele ukwenza intando kaNkulunkulu kumbe acabange ukumhlamukela. Esezakufa watshela abafundi bakhe ukuthi labo babezazondwa. Kusukela ngalesosikhathi abalandeli bakaJesu bebelokhu behlukuluzwa, kodwa ukwazi ukuthi uJesu wawunqoba umhlaba kwenza bahlale bethembekile.—Joh. 15:19; 16:33; 17:16.

⁶ Nxa singafuni ukuba yingxenye yomhlaba kumele silingisele uJesu ngokulandela izimiso zikaJehova. Kufanele sibalekele ukuziphatha okubi, ukungena kwezombusazwe lakwezinye indaba zomhlaba lo. Kumele silalele iseluleko esikuJakhobe 1:21 esithi: “Susani konke ukungcola lakho konke okuyizinto okuncane okubi, libe mnene nxa lisamukela ukugxiliswa kwelizwi elenelisa ukulisindisa.” Ukubala iBhayibhili lokungena imihlangano kuzasinceda ukuthi ‘sigxilise ilizwi’ leqiniso engqondweni lasenhliziyweni zethu lokuthi singafisi izinto ezisemhlabeni lo. Umfundi uJakhobe wabhala wathi: “Kalikwazi yini ukuthi ukuba ngumngane womhlaba yikuba yisitha sikaNkulunkulu? Ngakho loba ngubani ofuna ukuba ngumngane womhlaba uzenza isitha sikaNkulunkulu.” (Jak. 4:4) Lokhu yikho okwenza iBhayibhili lisitshele ngokuqakatheka kokulandela izimiso zikaJehova lokuthi singabi yingxenye yomhlaba.

⁷ ILizwi likaNkulunkulu lisitshela ukuthi kumele sibalekele ukuziphatha okubi lokulihlazo. Lithi: “Lingaqali ukuxoxa ngokuziphatha okubi kwezemacansini langayo yonke imihlobo yokungcola loba ubuhwaba, ngoba lokhu kakubafanelanga abantu abangcwele.” (Efe. 5:3) Akumelanga sihlale sicabanga izinto ezilihlazo loba ezingcolileyo futhi akufanelanga loba nini sixoxe ngezinto ezinjalo. Singenza njalo kuzakhanya ukuthi sizimisele ukulandela izimiso lemithetho kaJehova yokuziphatha.

UKUHLANZEKA EMZIMBENI

⁸ AmaKhristu ayakunanzelela ukuthi kumele ahlanzeke emzimbeni njengoba nje kuqakathekile ukuthi ahlanzeke ekukhonzeni lasekuziphatheni. Ngesikhathi sama-Israyeli uNkulunkulu ongcwele wayekhangelele ukuthi izihonqo zawo zihlale zihlanzekile. Lathi kumele sihlanzeke ukuze uNkulunkulu “angaboni lutho olungalunganga” phakathi kwethu.—Dute. 23:14.

⁹ Ukuba ngcwele lokuhlanzeka kujayele ukuqanjwa ndawonye eBhayibhilini. Ngokwesibonelo uPhawuli wabhala wathi: “Bathandekayo, kasizihlambululeni kukho konke ukungcola kwenyama lokomoya, senze ubungcwele bethu bube ngobupheleleyo, sitshengisa ukuthi siyamesaba uNkulunkulu.” (2 Khor. 7:1) Yikho amadoda labesifazana abangamaKhristu kufanele bageze njalo bawatshe lempahla ukuze bahlale behlanzekile. Lanxa izimo zitshiyana kusiya ngendawo, ukugeza ngesepa lamanzi kwenza thina labantwabethu sihlanzeke.

¹⁰ Umsebenzi wethu wokutshumayela wenza saziwe emphakathini. Ukugcina indawo esihlala kuyo ihlanzekile ngeyinye indlela yokutshumayeza omakhelwane. Bonke emulini kufanele babe leqiniso lokuthi umuzi uhlala uhlanzekile. Amadoda kumele abone ukuthi endlini lasegumeni kuhlala kuhlanzekile ngoba lokho kungenza abantu bakhulume kuhle ngaboFakazi bakaJehova. Angenza njalo ayabe etshengisa ukuthi azikhokhela kuhle imuli zawo ekukhonzeni lasendabeni yokuhlanzeka. (1 Tim. 3:4, 12) Abesifazane labo kumele babe leqiniso lokuthi endlini kuhlala kuhlanzekile. (Tit. 2:4, 5) Ikanti abantwana abafundiswe kuhle kufanele bahlale behlanzekile futhi bagcine indawo abalala kuzo zihlanzekile. Nxa bonke emulini besebenza nzima ukuze bagcine umuzi uhlanzekile, bazafanela ukuhlala emhlabeni omutsha ozalethwa nguMbuso kaNkulunkulu.

¹¹ Lamuhla, izinceku zikaJehova ezinengi zisebenzisa izimota, imidududu lokunye okokuhambisa nxa zisiya emihlanganweni. Kwezinye indawo abanye oFakazi bahamba ngezimota ekutshumayeleni, yikho kuqakathekile ukuthi zihlale zihlanzekile futhi zilungisiwe. Indawo esihlala kuzo kanye lezimota zethu kufanele kutshengise ukuthi singabantu bakaJehova abahlanzekileyo futhi abangcwele. Izikhwama kanye lamaBhayibhili esiwasebenzisa ekutshumayeleni lakho kumele kuhlanzeke.

¹² Indlela esigqoka ngayo lesizilungisa ngayo kumele ihambelane lezimiso zikaNkulunkulu. Nxa sisiyabona umuntu oqakathekileyo siba leqiniso lokuthi asigqoki ngendlela engaqedakaliyo loba engatshengisi inhlonipho. Yikho-ke kumele sinanzelele indlela esigqoka ngayo nxa sisekutshumayeleni loba eplathifomu ngoba siyabe simela uJehova. Indlela esizilungisa ngayo kanye lempahla esizigqokayo zingenza abantu bafune ukufunda ngoJehova loba hatshi. Ngakho akumelanga sigqoke ngendlela engelasithunzi kumbe ezakhuba abanye. (Mik. 6:8; 1 Khor. 10:31-33; 1 Tim. 2:9, 10) Kuqakathekile ukuthi sicabange ngalokho okutshiwo yiMibhalo ngokuhlanzeka lokugqoka ngendlela elesithunzi nxa sisiya emihlanganweni yebandla, eyeziqinti leyezabelo. Phela sifuna ukuhlala sidumisa uJehova njalo simkhazimulisa.

¹³ Kufanele sigqoke ngendlela elesithunzi lalapho sisiyabuka amawofisi ethu amakhulu kumbe amawofisi egatsha. Khumbula ukuthi ibizo elithi Bhetheli litsho ukuthi “iNdlu kaNkulunkulu.” Yikho kumele sigqoke kuhle futhi siziphathe ngendlela esenza ngayo nxa sisemihlanganweni yebandla.

¹⁴ Langesikhathi sizilibazisa kumele sinanzelele indlela esigqoka ngayo lesizilungisa ngayo. Kumele sizibuze umbuzo lo, ‘Indlela engigqoke ngayo izangivumela yini ukuthi ngitshumayele ngikhululekile nxa kungavela ithuba?’

UKUZILIBAZISA OKWAKHAYO

¹⁵ Ukuphumula lokuzilibazisa kuqakathekile ngoba kuyavuselela njalo kwenza sibe lempilakahle. Ngelinye ilanga uJesu wahamba labafundi bakhe endaweni engelabantu ukuze ‘bayephumula kancane.’ (Mak. 6:31) Ukuphumula kanye lokuzilibazisa okwakhayo kwenza sitshaywe ngumoya njalo kusinika ledlabuzane lokuqhubeka ngemisebenzi esiyenzayo.

¹⁶ Esingazilibazisa ngakho sekukunengi kakhulu lezinsuku, yikho amaKhristu kumele akhethe ngendlela etshengisa ukuthi alenhlakanipho evela kuNkulunkulu. Kodwa akufanelanga siqakathekise ukuzilibazisa ukwedlula ezinye izinto. IBhayibhili lisitshela ukuthi ‘ngezinsuku zokucina,’ abantu bazakuba ‘ngabathanda injabulo kulokuthanda uNkulunkulu.’ (2 Tim. 3:1, 4) Okokuzilibazisa okunengi okukhona lezinsuku akubafanelanga labo abafisa ukubambelela ezimisweni zikaJehova.

¹⁷ AmaKhristu akuqala kwakumele alwise ukuthi angathatheki ngokuzilibazisa okungakhiyo okwakugcwele ngalesosikhathi. Ngokwesibonelo, emidlalweni yamaRoma abantu babekholisa ukubukela abanye behlukuluzwa. Kwakusiba lemidlalo elodlakela, ukubulalana lokuziphatha okubi kwezemacansini eyayisenzelwa ukuchaza abantu. Kodwa amaKhristu awazange azihlanganise ekuzilibaziseni okunjalo. Ezokuzilibazisa ezikhona lamuhla lazo zilodlakela, ukubulalana lokuziphatha okubi futhi zenzelwe ukusuthisa izifiso ezimbi. Kumele ‘siqaphele’ indlela esihamba ngayo ngokungazilibazisi ngezinto ezimbi. (Efe. 5:15, 16; Hubo. 11:5) Lanxa okunye esikhetha ukuzilibazisa ngakho kungakubi, abantu esizilibazisa labo bangabe besenza izinto ezimbi.—1 Phet. 4:1-4.

¹⁸ Kodwa zikhona izinto ezakhayo amaKhristu angazilibazisa ngazo. Abanengi sebekubonile ukuthi ukulandela iseluleko esiseBhayibhilini kanye lokulalela amacebiso asemabhukwini ethu kuyanceda kakhulu.

¹⁹ Kwesinye isikhathi imuli ethile inganxusa abanye ebandleni ukuthi bazokwejisa. Abafowethu labodadewethu banganxuswa emtshadweni loba komunye umcimbi othile. (Joh. 2:2) Onguye onxuse abanye ulomsebenzi wokubona ukuthi konke kuhamba kuhle. Kodwa kumele kunanzelelwe ikakhulu nxa umcimbi wakhona ulabantu abanengi. Ukukhululeka kakhulu kwenze abanye bacina beziphethe ngendlela engafanelanga amaKhristu. Ngokwesibonelo bacina besidla kumbe banathe kakhulu loba benze isono esikhulu. Yikho amaKhristu akubona kuyikuhlakanipha ukubiza abantu abalutshwane emcimbini ababa layo lokuthi leyomcimbi ingathathi isikhathi eside kakhulu. Nxa kuzakuba lotshwala kumele bunathwe ngokulinganisela. (Flp. 4:5) Nxa singaqakathekisa ukwakhana lokuqinisana emcimbini esiba layo, asisoze sikhathazeke ngokudla loba okunathwayo.

²⁰ Kuhle ukuthi sizijayeze ukunxusa abanye emizini yethu. (1 Phet. 4:9) Kodwa akumelanga sikhohlwe abaswelayo nxa sinxusa abanye. (Luk. 14:12-14) Nxa kuyithi esivakatshileyo kuqakathekile ukuthi siziphathe ngendlela etshengisa ukuthi silandela isimiso esikuMakho 12:31. Singenza njalo kuzakhanya ukuthi siyawubonga umusa abasitshengise wona.

²¹ AmaKhristu ayaziqakathekisa izipho ezinhle ezivela kuNkulunkulu ezigoqela ukuthi “umuntu adle, anathe azuze ukusuthiseka ekusebenzeni gadalala kwakhe.” (UmTshu. 3:12, 13) Nxa konke esikwenzayo ‘singakwenzela inkazimulo kaNkulunkulu,’ sizathokoza njalo sisuthiseke ngoba siyabe senze imicimbi ekhuthaza abanye.

OKWENZIWA ESIKOLO

²² Abantwana baboFakazi bakaJehova bayafunda ezikolo futhi lokhu kuyabanceda ukuthi benelise ukubala lokubhala. Okunye abakufundayo kwenza benelise ukuhlela abangakwenza ekukhonzeni. Kuhle ukuthi ‘bakhumbule uMdali wabo’ ngokuqakathekisa izinto eziphathelane lokukhonza lanxa besasesikolo.—UmTshu. 12:1.

²³ Nxa ungosakhulayo ofundayo nanzelela ukuthi awuqedi isikhathi esinengi labantu ofunda labo abangakhonzi uJehova. (2 Tim. 3:1, 2) Kunengi uJehova akwenzileyo ukuze akuvikele, yikho ungenelisa ukumelana lezilingo ohlangana lazo esikolo. (Hubo. 23:4; 91:1, 2) Ngakho kusebenzise konke uJehova asinike khona ekukhonzeni ukuze uzivikele.—Hubo. 23:5.

²⁴ OFakazi abanengi abafundayo bakhetha ukungenzi imidlalo loba okunye nje okwenziwa esikolo ngoba kabafuni ukuzihlanganisa lomhlaba lo. Kungaba nzima ukuthi ababalisi lalabo abafunda labo bazwisise ukuthi kungani bekhetha ukwenza njalo. Kodwa kumele bakhumbule ukuthi ukuthokozisa uNkulunkulu yikho okuqakathekileyo. Ngakho nxa usafunda, zimisele ukusebenzisa umzwangedwa wakho ofundiswe kuhle ngokungenzi loba yini elokuncintisana njalo ekhuthaza ukuthi uqakathekise kakhulu ilizwe ohlala kulo. (Gal. 5:19, 26) Nxa ungalalela iseluleko esiseMibhalweni osinikwa ngabazali bakho futhi ube labangane abahle ebandleni, kuzakuba lula ukwenza lokho uJehova akufunayo.

UMSEBENZI WOKUZIPHILISA

²⁵ IBhayibhili liveza ukuthi labo abazinhloko zemuli balomlandu wokunakekela izimuli zabo. (1 Tim. 5:8) Loba kunjalo, akumelanga baqakathekise imisebenzi abayenzayo ukwedlula izinto eziphathelane loMbuso. (Mat. 6:33; Rom. 11:13) Nxa bangasuthiseka ngezinto abalazo, ezinjengokudla lokokugqoka abasoze bakhathazeke kumbe babanjwe ngumjibila wokufuna ukunotha.—1 Tim. 6: 6-10.

²⁶ Nxa usebenza, kuqakathekile ukuthi uhlale ukhumbula izimiso eziseMibhalweni ezingakunceda. Ukuthembeka emsebenzini esiwenzayo kugoqela ukungenzi loba yini engavumelani lomthetho kaNkulunkulu loba owelizwe. (Rom. 13:1, 2; 1 Khor. 6:9, 10) Kufanele sihlale sikhumbula ingozi yokuba labangane ababi. Njengoba singamasotsha kaKhristu asingeneli ezindabeni zamabhizimusi ezephula imithetho kaNkulunkulu loba ezingaphambanisa ubuqotho bethu kumbe indlela esikhonza ngayo. (Isaya. 2:4; 2 Tim. 2:4) Kanti njalo asenzi loba yini engasihlanganisa ‘leBhabhiloni Enkulu,’ isitha sikaNkulunkulu.—Isam. 18:2, 4; 2 Khor. 6:14-17.

²⁷ Ukulandela izimiso zikaNkulunkulu kuzasinceda lokuthi singagijimisi ezebhizimusi loba ezinye nje indaba ezingelani lokukhonza nxa sisemihlanganweni yethu. Injongo yokuhlangana kwethu emihlanganweni yebandla, eyeziqinti leyezabelo ngeyokukhonza uJehova. Phela siyabe sisidla etafuleni asilungiselele lona njalo ‘sikhuthazana.’ (Rom. 1:11, 12; Heb. 10:24, 25) Yikho nxa sisemihlanganweni ingxoxo zethu kumele zibe ngezizaqinisa abanye.

UKUMANYANA KWETHU

²⁸ Ukulandela imithetho lezimiso zikaJehova kwenza ‘sihlale simanyene emoyeni silokuthula okwenza sibambane sibe munye.’ (Efe. 4:1-3) Ngamunye wethu kumele azame ngamandla wonke ukwenza okuhle kwabanye hatshi okufunwa nguye kuphela. (1 Thes. 5:15) Akuthandabuzwa ukuthi lokhu yikho kanye okukhona lasebandleni okulo. Akulandaba ukuthi singumhlobo bani, sivela kuliphi ilizwe, sinothile yini, kumbe ukuthi sifunde okunganani, sonke silandela imithetho lezimiso ezifananayo. Labantu abangayisibo oFakazi bayakubona ukumanyana kwethu.—1 Phet. 2:12.

²⁹ Ukuze atshengise ukuthi ukumanyana kuqakathekile, umphostoli uPhawuli wabhala wathi: “Kulomzimba owodwa, lomoya owodwa, njengoba nje labizelwa ethembeni elilodwa lokubizwa kwenu; kuleNkosi eyodwa, lokholo olulodwa, lobhabhathizo olulodwa; loNkulunkulu oyedwa onguYise wabo bonke, ophezu kwabo bonke, osebenza ngabo bonke njalo okubo bonke.” (Efe. 4:4-6) Amazwi la asikhuthaza ukuthi sibe ngqondonye ekuzwisiseni imfundiso eziyisisekelo eziseBhayibhilini lezinye esiqhubeka sizicaciselwa. Ukwenza njalo kuzatshengisa ukuthi siyakwazi ukuthi uJehova nguye ofanele ukubusa indawo yonke. UJehova ufundisa abantu bakhe ulimi oluhlanzekileyo okutsho iqiniso abalalo futhi lokhu kwenza benelise ukumkhonza bemanyene.—Zef. 3:9.

³⁰ Ukumanyana lokuthula okusebandleni lobuKhristu kuyabavuselela bonke abakhonza uJehova. Siyakubona sibili ukugcwaliseka kwesithembiso sakhe esithi: “Ngizabaqoqela ndawonye njengezimvu esibayeni.” (Mik. 2:12) Ngakho kasizimiseleni ukulondoloza ukuthula lokumanyana ngokulandela izimiso kanye lemithetho kaJehova.

³¹ Bayathokoza labo asebeyingxenye yebandla likaJehova elihlanzekileyo. Ukubizwa ngebizo likaJehova kuqakatheke ukwedlula loba yini. Yikho-ke kasizameni ngamandla wonke ukuthi sihlale singabangane bakaJehova, sibambelele ezimisweni zakhe ezilungileyo futhi sikhuthaze labanye ukuthi benze njalo.—2 Khor. 3:18.