INGXENYE 5

Buyelani “KuMalusi LoMbonisi Wemiphefumulo Yenu”

Phakathi kwezinto okuxoxwe ngazo ebhukwini leli kukhona yini okwenza kube nzima ukuthi lawe ubuyele kuJehova? Nxa kunjalo kawuwedwa. Kulezinceku zikaNkulunkulu ezinengi ezithembekileyo ezaphila kudala leziphila khathesi ezaphuma phakathi kobunzima obunjalo. Lawe ungathola usizo oluvela kuJehova njengoba nje lazo wazincedisa ukuthi zinqobe ubunzima lobu.

UJehova uzakuncedisa ukuthi ubuyele kuye

QINISEKA ukuthi uJehova uzakuncedisa ukuthi ubuyele kuye. Uzakuncedisa ukuthi ulwisane lokukhathazeka, uthobe inhliziyo yakho nxa wakhutshwa ngabanye njalo ube lomzwangedwa ohlanzekileyo ozakwenza uhlaliseke engqondweni lasenhliziyweni. Nxa sekunjalo, uzakuzwa sekukufuqa ukuthi uphinde ukhonze uJehova undawonye lezinceku zakhe. Uzabe usufanana lamanye amaKhristu aphila ngekhulu lokuqala umphostoli uPhetro awabhalela incwadi esithi: “Lina lalinjengezimvu ezilahlekileyo, kodwa khathesi selibuyele kuMalusi loMbonisi wemiphefumulo yenu.”—1 UPhetro 2:25.

Ukubuyela kuJehova kuqakatheke ukwedlula loba yini ongayenza. Ngenxa yani? Ngenxa yokuthi uzathokozisa uJehova. (IZaga 27:11) Njengoba usazi, uJehova ulemizwa, yikho-ke esikwenzayo kungamthokozisa kumbe kumdanise. Lanxa kunjalo, kasibambi ngamandla ukuthi simthande njalo simkhonze. (UDutheronomi 30:19, 20) Esinye isifundiswa seBhayibhili sathi: “Akulamuntu ongakuvulela inhliziyo yakho. Wena nguwe okumele uyivule.” Thina singayivula ngokukhonza uJehova ngoba simthanda ngenhliziyo yethu yonke. Nxa sisenza njalo siyabe sitshengisa ukuthi siqotho kuye, okuyisipho esiligugu esingamnika sona njalo siyabe simthokozise kakhulu. Iqiniso yikuthi akulalutho esingaluqathanisa lentokozo esiyitholayo nxa sikhonza uJehova ngendlela emfaneleyo.—ImiSebenzi 20:35; ISambulo 4:11.

Udade obengasafezi inkonzo wemukelwa kuhle ebandleni

Ungasuthisa isidingo sakho sokukhonza uJehova nxa ungaphinda ubuyele endleleni owawumkhonza ngayo. (UMathewu 5:3) Njani? Emhlabeni wonke abantu bayazibuza ukuthi, ‘Siphilelani?’ Bazilambele izimpendulo zemibuzo ephathelane lokuthi siphilelani? Okwenza kube njalo yikuthi uJehova wasidala silesifiso sokuthola izimpendulo zemibuzo enjengale. Wasidala ngendlela yokuthi siyasuthiseka ngokumkhonza. Akukho okunye okungasenza sisuthiseke ukwedlula ukwazi ukuthi sikhonza uJehova ngoba simthanda.—IHubo 63:1-5.

Sicela uqiniseke ukuthi uJehova ufuna ubuyele kuye. Nampu ubufakazi balokhu: Kwathandazwa kakhulu ngesikhathi kubhalwa ibhukwana leli ukuze libe losizo. Mhlawumbe lifike ezandleni zakho uliphiwa ngumdala webandla kumbe omunye umzalwane okuthandayo. Wasusizwa kukufuqa ukuthi ulibale njalo wenze okubhalwe phakathi kwalo. Konke lokhu kuyibufakazi bokuthi uJehova kakukhohlwanga. Esikhundleni salokhu, uyakusondeza kuye ngothando.—UJohane 6:44.

Kuyasiduduza kakhulu ukwazi ukuthi uJehova kazikhohlwa loba sekutheni izinceku zakhe esezilahlekile. Yikho kanye udadewethu uDonna acina esekunanzelela. Wathi: “Ngasuka eqinisweni kancane kancane, kodwa izikhathi ezinengi ngangizithola sengicabanga ngeHubo 139:23, 24, elithi: ‘Ngihlola, O Nkulunkulu, uyazi inhliziyo yami; ngizama ukuze wazi ukunqineka kwemicabango yami. Ake ubone ingabe kulendledlana embi kimi, ungihole ngendlela yaphakade.’ Ngakubona ukuthi ngangiyindlubu ewele ephokweni emhlabeni lo ngoba vele ngangizizwa ngilahlekile, njalo ngasengikwazi ukuthi akula enye indawo okwakumele ngibe kuyo ngaphandle kokuba senhlanganisweni kaJehova. Ngaqalisa ukukubona ukuthi uJehova wayengazange angilahle; okwakumele ngikwenze kuphela, yikubuyela kuye. Ngiyajabula kakhulu ukuthi ngabuyela kuye!”

“Ngaqalisa ukukubona ukuthi uJehova wayengazange angilahle; okwakumele ngikwenze kuphela yikubuyela kuye”

Esikuthandazelayo yikuthi lawe uphinde uzibonele “ukuthokoza kukaJehova.” (UNehemiya 8:10) Kawusoze uzisole ngokubuyela kuJehova.

Izimpendulo Zemibuzo Ephathelane Lokubuyela kuJehova

NGIQALISELE NGAPHI?

Umuntu obengezwa kuhle emzimbeni kungadingeka ukuthi abuyele kancane kancane endleleni abesenza ngayo izinto. Ngendlela efananayo, lawe zama ukuthi ufunde okuthile ngoNkulunkulu nsuku zonke ukuze uqine ekukhonzeni. Ungacabangi ukuthi kumele ukwenze konke ngasikhathi sinye. Mhlawumbe ungafunda iBhayibhili kumbe ulalele ukufundwa kwalo okurekhodiweyo okwemizuzu emilutshwana, loba ubale elinye lamabhuku ethu, kumbe ubukele amavidiyo kuwebhusayithi yethu i-jw.org. Zama lokuthi uye emihlanganweni yebandla masinyane. Okuqakatheke kakhulu, thandaza kuJehova ucele ukuthi akusize. ‘Yethula kuye konke ukukhathazeka kwakho ngoba yena uyakukhathalela.’—1 UPhetro 5:7.

“Ngesikhathi ngingasayifezi inkonzo, ngangiyangeka kakhulu okokuthi lokuthandaza kwasekungisinda. Ngacina ngisitholile isibindi sokuthi ngithandaze, ngemva kwalokho ngavakatshelwa ngumdala webandla lethu. Wangisiza ngabona ukuthi uJehova wayengangikhalalanga. Wasengikhuthaza ukuthi ngiqale ngokubala iBhayibhili nsuku zonke. Ngakuzama lokhu, kwangenza ngaba lamandla okuthi ngiphinde ngingene imihlangano. Ngokuhamba kwesikhathi, ngaphinda ngaqalisa lokutshumayela. Kuyangithokozisa ukuthi uJehova kazange angikhalale.”—U-Eeva.

IBANDLA LIZANGAMUKELA NJANI?

Qiniseka ukuthi bonke abasebandleni bazakwamukela ngezandla zombili. Kabasoze bakuchothoze kumbe bakuthonisise, kodwa bazakutshengisa ukuthi bayakuthanda njalo bazakwenza konke okusemandleni abo ukuthi bakukhuthaze.—KumaHebheru 10:24, 25.

“Ngangilenhloni zokubuyela eWolu loMbuso. Ngangizibuza ukuthi abangane bami babezangiphatha njani. Omunye udade osekhulile owayekhona ngesikhathi ngitshiya iqiniso eminyakeni engu-30 eyadlulayo wangilanda wathi kimi, ‘Siyakwamukela ekhaya, Ndodana!’ Amazwi la angithinta. Ngakubona ukuthi ngasengisekhaya sibili.”—UJavier.

“Ngahamba eWolu loMbuso ngafika ngahlalela emuva ukuze kungabi lomuntu ongibonayo. Kodwa abanengi ababengazi kusukela kudala ngingumntwana ngisangena imihlangano baqalisa ukunginanzelela. Bangamukela ngothando, bangigona ngaze ngazizwa sengihlalisekile ngaphakathi. Ngazizwa ngisekhaya!”—UMarco.

ABADALA BAZANGISIZA NJANI?

Abadala bazakuba lomusa kuwe. Bazakuncoma ukuthi ulesifiso sokuphinda uvuselele “uthando lwakho lwakuqala.” (ISambulo 2:4) Bazakuba lesihawu, bakusize ukuthi ulungise loba yiwaphi amaphutha owawenzayo, bekwenza lokhu “kakuhle” kumbe ngomoya omnene. (KwabaseGalathiya 6:1; IZaga 28:13) Abadala bangacela omunye ukuthi afunde lawe iBhayibhili, mhlawumbe kusetshenziswa ibhuku elithi Sondela kuJehova loba elithi “Zigcineni Lisethandweni lukaNkulunkulu.” Qiniseka ukuthi abadala bazakududuza futhi bakusekele kukho konke njengoba uzama ukubuyela kuJehova.—U-Isaya 32:1, 2.

“Abadala baqhubeka bezama ukungisiza okweminyaka engu-8 ngingayifezi inkonzo. Ngelinye ilanga, omunye wabo wangitshengisa amapikitsha esasiwathethe sisonke. Angikhumbuza izikhathi ezinengi ezimnandi, ngaze ngaba lesifiso sokuphinda ngiyithole intokozo engangiyithola ngesikhathi ngisakhonza uJehova. Abadala bangisiza ngothando ukuthi ngiphinde ngibuyele endleleni engangikhonza ngayo.”—UVictor.

‘Uzalenza Libe Lamandla’

Isihlabelelo sethu esithi, Hlabelela UJehova Ngentokozo silezingoma ezinengi ezimnandi ezingakududuza njalo zikukhuthaze nxa usubuyela ekukhonzeni uJehova. Ngokwesibonelo khangela amazwi engoma unamba 38. Isihloko sayo sithi ‘Uzakwenza Ube Lamandla,’ njalo amazwi ayo asekelwe ku-1 Phetro 5:10.

UJehova walifundis’ iqiniso,

Waselibizela ekukhanyeni.

Wabona ukuthi lalizimisele,

Ukumkhonza ngenhliziyo yonke

Lafung’ ukuthi lizamlalela,

Walisiza usazolisiza.
UJah wanikela ngeNdodana yakhe;

Ukuze lizuze ukuphila.

Nxa walipha isiph’ esiyiNdodana,

Lamandla uzalinika wona

Methemb’ ukuth’ uzakuqinisa.

Ngeke akhohlwe ukholo lwenu, Uzahlala elinakekela.

(IKHORASI)

Walithenga ngegazi LikaJesu Khristu.

Uzaliqinisa aliphe amandla

Uzaliqondisa futhi alivikele.

Uzalenza libe lamandla liqine.

Ukuze ulalele ingoma le erekhodiweyo lezinye ingoma zoMbuso ngena ku-jw.org.