UJehova Wamqinisa U-Elija

UJezebheli wazonda kakhulu ngesikhathi etshelwa ukuthi abaphrofethi bakaBhali basebebulewe. Wathuma umuntu ukuthi ayekuthi u-Elija: ‘Kusasa, ngizakubulala njengoba ubulele abaphrofethi bakaBhali.’ U-Elija wesaba kakhulu wasebaleka waya egangeni. Wakhuleka wathi: ‘Jehova, kungcono ngife ngoba impilo yami inzima kakhulu.’ Walala ngaphansi kwesihlahla ngoba wayediniwe.

Ingilosi yamvusa ngelizwi elilomusa yathi: ‘Vuka udle.’ U-Elija wabona isinkwa sisemalahleni kanye lenkomitsho yamanzi. Wadla wanatha, wasephinda walala. Ingilosi yaphinda yamvusa yathi: ‘Dlana. Kumele ube lamandla ukuze wenelise ukuyafika lapho oya khona.’ Yikho u-Elija wadla wasehamba okwamalanga angu-40 lobusuku obungu-40 waze wayafika entabeni iHorebhi. Wafika wangena ebhalwini walala. UJehova wakhuluma laye wathi: ‘Wenzani lapha Elija?’ U-Elija wathi: ‘Ama-Israyeli kawenzanga ayekuthembise khona. Adilize ama-alithare akho abulala labaphrofethi bakho. Lami asefuna ukungibulala.’

UJehova wathi kuye: ‘Hamba uyekuma phezu kwentaba.’ Kwaqala kwavunguza umoya olamandla. Kwalandela ukuzamazama komhlaba lomlilo, kwasekuzwakala ilizwi elipholileyo likhulumela phansi. U-Elija wavala ubuso ngesembatho sakhe wasesima phandle kobhalu. UJehova wasembuza ukuthi kuyini okwakumenze wabaleka. U-Elija wathi: ‘Yimi ngedwa engiseleyo.’ Kodwa uJehova wathi: ‘Kawusalanga wedwa. Kulabantu abangu-7 000 ko-Israyeli abalokhu bengikhonza. Hamba uyegcoba u-Elisha ukuthi abe ngumphrofethi esikhundleni sakho.’ U-Elija wahle wenza lokho uJehova ayemtshele khona. Ubona angani uJehova uzakunceda yini nxa ungenza lokho akufunayo? Ye, uzakunceda. Ake sibone okunye okwenzakala ngesikhathi sendlala.