Indlovukazi Embi Iyabulawa

INkosi u-Ahabi yayisithi ingalunguza ngewindi ibone insimu yendoda okwakuthiwa nguNabhothi. U-Ahabi wayeyifuna insimu le futhi wacela uNabhothi ukuthi amthengisele yona. Kodwa uNabhothi wala ngoba uMthetho kaJehova wawungavumi ukuthi umuntu athengise indawo eyayililifa lakhe. U-Ahabi kwamphatha njani ukuthi uNabhothi wayesenza okuqondileyo? Kwamzondisa kakhulu waze wala lokuphuma endlini yakhe yokulala futhi wala lokudla.

Umkakhe uJezebheli wathi kuye: ‘Uyinkosi yako-Israyeli. Ungathola loba yini oyifunayo. Ngizakwenza ukuthi insimu le ibe ngeyakho.’ Wabhalela abadala bedolobho izincwadi ebatshela ukuthi baqambele uNabhothi amanga bathi uthethise uNkulunkulu besebemkhanda ngamatshe bambulale. Abadala bedolobho bakwenza lokho. UJezebheli wathi ku-Ahabi: ‘UNabhothi ufile! Insimu isingeyakho.’

Kulabanye futhi ababulawa nguJezebheli bengelacala. Wabulala abantu abanengi ababethanda uJehova. UJezebheli wayekhonza izithombe futhi esenza lezinye izinto ezimbi. UJehova wakubona konke okubi okwakusenziwa nguJezebheli. UJehova wayezamekela yini uJezebheli?

Kwathi u-Ahabi esefile, indodana yakhe okuthiwa nguJoramu yaba yinkosi. UJehova wathuma indoda okuthiwa nguJehu ukuthi iyebulala uJezebheli lemuli yakhe.

UJehu wagada inqola yakhe waya eJeziriyeli lapho uJezebheli ayehlala khona. UJoramu wabuya egade inqola ezohlangabeza uJehu, wambuza wathi: ‘Kulokuthula yini phakathi kwethu?’ UJehu wathi: ‘Akusoze kube lokuthula nxa unyoko uJezebheli elokhu esenza izinto ezimbi.’ UJoramu wazama ukutshibilikisa inqola yakhe ukuze abaleke. Kodwa uJehu wamtshoka ngomtshoko wafa.

UJehu wasuka lapho waya endlini kaJezebheli. UJezebheli wathi esizwa ukuthi uJehu uyabuya, wazicomba, walungisa inwele zakhe wasesiya ewindini eliphezulu endlini yakhe walunguza ngalo. UJehu wathi efika, uJezebheli wamkhulumisa ngamazwi okudelela. UJehu wamemeza izinceku zikaJezebheli ezaziseceleni kwakhe wathi: ‘Mphoseleni phansi!’ Izinceku lezo zamphosa ngewindi wawela phansi wafa.

Ngemva kwalokho, uJehu wabulala amadodana ka-Ahabi angu-70 waseqeda ukukhonzwa kukaBhali. Uyakubona yini ukuthi uJehova ubona zonke izinto lokuthi uyabajezisa labo abenza okubi?