Ibutho LikaJehova Elilezinqola Zomlilo

Inkosi yaseSiriya okwakuthiwa nguBheni-Hadadi yayizama ukuhlasela ama-Israyeli. Kodwa umphrofethi u-Elisha wayelokhu etshela inkosi yako-Israyeli ukuthi amasotsha amaSiriya ayeyicathamele ngaphi. UBheni-Hadadi wasebona kungcono ukuthi amthumbe u-Elisha. Watshelwa ukuthi u-Elisha wayesedolobheni okuthiwa yiDothani. Yikho wathuma amasotsha ukuthi ayemthumba.

Amasotsha lawo afika eDothani ebusuku. Inceku ka-Elisha yathi ivuka ekuseni yabona idolobho ligonjolozelwe ngamasotsha amanengi. Yethuka yamemeza yathi: ‘Elisha, sizakwenzanjani?’ U-Elisha wathi kuye: ‘Thina silabanengi ukwedlula bona.’ UJehova wenza inceku ka-Elisha yabona ezintabeni ezazigombolozele idolobho kugcwele amabhiza lezinqola zomlilo.

Amasotsha amaSiriya athi ezama ukubamba u-Elisha, wakhuleka wathi: ‘Jehova, ngicela ubenze bangaboni.’ Khonokho nje, amasotsha lawo ayengasaboni ukuthi angaphi lanxa ayekhangele. U-Elisha wathi kuwo: ‘Lisedolobheni elingayisilo. Ngilandelani ngiyelitshengisa umuntu elimdingayo.’ Amlandela aze ayafika eSamariya lapho okwakuhlala khona inkosi yako-Israyeli.

Ananzelela esefikile ukuthi ayengaphi. Inkosi yako-Israyeli yabuza u-Elisha yathi: ‘Ngibabulale yini?’ U-Elisha kazange asebenzise ithuba leli ukuthi aphindisele kodwa wathi: ‘Ungababulali. Baphe ukudla ubusubayekela babuyele kibo.’ Inkosi yabanika ukudla okunengi yasibayekela babuyela kibo.