Sebenzisa Imibuzo

UMathewu 16:13-16

OKUMELE UKWENZE: Sebenzisa kuhle imibuzo ukuze abakulaleleyo bafise ukuzwa okunengi njalo baqhubeke bethiye indlebe, ubonisane labo futhi ugcizelele imicijo eqakathekileyo.

UNGAKWENZA NJANI?

• Benze bafise ukuzwa okunengi njalo baqhubeke bethiye indlebe. Buza imibuzo ezakwenza abakulaleleyo bacabangisise ngokutshoyo kumbe ezabaqubula isifiso sokuzwa izimpendulo.

• Bonisana labalaleli. Yehla layo kuhle indaba, uncede abakulaleleyo babone ukuthi isuka ngaphi iya ngaphi, ngokuqhubeka ubabuza imibuzo ezabenza bafike esiphethweni esiyiso.

• Gcizelela imicijo eqakathekileyo. Yethula umcijo oqakathekileyo ngokubuza umbuzo ozakwenza abakulaleleyo bathiye indlebe. Nxa usuqedile ukuxoxa ngomcijo oqakathekileyo loba usugoqa inkulumo yakho, bakhumbuze abakufundileyo ngokubabuza imibuzo.