ISIFUNDO 51
Thokozisa UJehova Ngalokho Okukhulumayo
UJehova wanika abantu isipho esihle kakhulu, isipho sokukhuluma. Kodwa ulendaba yini lokuthi sisisebenzisa njani isipho lesi? Ye, ulendaba sibili! (Bala uJakhobe 1:26.) Manje singenzani ukuze sikhulume ngendlela ezamthokozisa?
1. Kumele sisisebenzise njani isipho sokukhuluma?
IBhayibhili lithi: “Qhubekani likhuthazana futhi lisakhana.” (1 KwabaseThesalonika 5:11) Bakhona yini abantu obacabangayo abadinga ukududuzwa? Ungabaduduza njani? Ungabatshela ukuthi uyabathanda lokuthi ulendaba labo. Khetha lamanye amavesi aseBhayibhilini ongawasebenzisa ukuze ubaduduze. Lanxa amazwi owakhulumayo eqakathekile, ungakhohlwa ukuthi indlela owabeka ngayo layo iqakathekile. Yikho hlala uzimisele ukukhuluma amazwi alomusa.—IZaga 15:1.
2. Nganjani amazwi okungamelanga siwakhulume?
IBhayibhili lithi: “Akungaphumi ilizwi elibolileyo emilonyeni yenu.” (Bala u-Efesu 4:29.) Lokhu kutsho ukuthi akumelanga sikhulume inhlamba kumbe amazwi azazwisa abanye ubuhlungu. Okunye okumele sikubalekele yikunyeya abanye lokukhuluma kubi ngabo.—Bala iZaga 16:28.
3. Kuyini okuzasinceda ukuthi sikhulume ngendlela ezakhuthaza abanye?
Izinto esijayele ukuzikhuluma ziveza okusenhliziyweni lasengqondweni zethu. (ULukha 6:45) Yikho kuqakathekile ukuthi sizijayeze ukucabanga izinto ezilungileyo, ezimsulwa, ezithandekayo lokukhulunywa kuhle ngazo. (KwabaseFiliphi 4:8) Ukuze senelise ukukwenza lokhu, kumele sikhethe kuhle abangane lalokho esizilibazisa ngakho. (IZaga 13:20) Kuqakathekile ukuthi sicabangisise singakakhulumi lutho ngoba amazwi alamandla. IBhayibhili lithi: “Amazwi omuntu okhuluma engacabanganga agwaza njengenkemba, kodwa ulimi lwabahlakaniphileyo luyelapha.”—IZaga 12:18.
GEBHA UJULE
Engxenyeni le uzabona ukuthi ungenzani ukuze ukhulume ngendlela ethokozisa uJehova lezakhuthaza abanye.
4. Khetha kuhle amazwi akho
Ngezinye izikhathi siyake sikhulume amazwi esicina sizisola ngawo. (UJakhobe 3:2) Bala uGalathiya 5:22, 23 beselixoxa ngemibuzo le:
Ubona angani yiziphi izithelo zomoya ongazithandazela ukuze wenelise ukukhetha kuhle amazwi akho? Izithelo lezo zizakunceda njani?
Bala u-1 Khorinte 15:33 beselixoxa ngemibuzo elandelayo:
Ucabanga ukuthi abangane bakho lalokho ozilibazisa ngakho kungayitshintsha yini indlela okhuluma ngayo? Kungani usitsho njalo?
Izinto esizenzayo lalokho esizilibazisa ngakho kungayitshintsha njani indlela esikhuluma ngayo labanye?
Bala umTshumayeli 3:1, 7 beselixoxa ngombuzo olandelayo:
Kunini lapho okumele uthule khona kumbe ulindele isikhathi esifaneleyo sokukhuluma?
5. Khuluma kuhle ngabanye abantu
Singakubalekela njani ukukhuluma kubi ngabanye abantu? Bukelani IVIDIYO beselixoxa ngemibuzo elandelayo.
Kuyini okwenze umzalwane esimbone kuvidiyo wafisa ukutshintsha indlela akhuluma ngayo ngabanye abantu?
Kuyini okwamenza wenelisa ukutshintsha?
Bala umTshumayeli 7:16, beselixoxa ngombuzo lo:
Kuyini okumele ucabange ngakho nxa usufuna ukukhuluma kubi ngomunye umuntu?
Bala umTshumayeli 7:21, 22 beselixoxa ngombuzo olandelayo:
Amavesi la angakunceda njani nxa kulomuntu okhulume kubi ngawe?
6. Khuluma labanye ngomusa emulini
UJehova ufuna sikhulumisane ngomusa langothando emulini. Bukelani IVIDIYO beselixoxa ngombuzo olandelayo.
Kuyini okungakunceda ukuthi ukhulumisane kuhle labanye emulini?
Bala u-Efesu 4:31, 32 beselixoxa ngombuzo lo:
Ngamazwi anjani azakwenza ukuthi abantu bazwanane emulini?
UJehova waveza ukuthi uzwa njani ngeNdodana yakhe uJesu. Bala uMathewu 17:5 beselixoxa ngombuzo olandelayo:
Ungamlingisela njani uJehova nxa uxoxa labanye ngekhaya?
Zijayeze ukuncoma abanye
ABANYE BATHI: “Ngikhuluma engikufunayo. Angizihluphi ngokuthi abanye bathini ngalokho engikukhulumayo.”
Wena uthini? Kungani usitsho njalo?
ISIFINQO
Amazwi alamandla kakhulu! Yikho kumele sicabangisise ngesizakukhuluma, ukuthi sizakukhuluma njani futhi nini.
Ufundeni?
Kumele sisisebenzise njani isipho sokukhuluma?
Nganjani amazwi okungamelanga siwakhulume?
Kuyini okuzasinceda ukuthi sikhulume ngendlela ezakhuthaza abanye?
THOLA OKUNENGI
Bukela ividiyo le ubone ukuthi ungenzani ukuze ukhulume okuzanceda abanye.
Bala isihloko lesi ubone ukuthi ungakubalekela njani ukukhuluma inhlamba.
“Kubi Kangako Yini Ukukhuluma Inhlamba?” (Isihloko esikuwebhusayithi yethu)
Bukela ividiyo le ubone ukuthi kuyini okungakunceda ubalekele ukunyeya.
Bala isihloko lesi uzwe ukuthi kuyini okwenza eyinye indoda yatshiya ukusebenzisa ulimi olungcolileyo.
“Ngaqalisa Ukucabangisisa Ngempilo Yami” (INqabayokulinda, August 1, 2013)