Zwisisa Izimpawu Zobuntu BukaJehova Ngokugcweleyo

1. (a)  Yiziphi izimpawu zobuntu bukaJehova umKhristu angazihlola? (b) Ukuhlolisisa izimpawu zobuntu bukaJehova kuzasinceda ngani?

UMA ucabanga ngobuntu bukaJehova, yiziphi izimpawu zobuntu bakhe ezifika engqondweni yakho? Abanengi bethu bacabanga ngothando, ukulunga, ukuhlakanipha lamandla. Kodwa siyavuma ukuthi uJehova ulezimpawu zobuntu ezinengi ezikhangayo. Nxa singabala izimpawu zobuntu bukaJehova, sithola ezedlula ezingu-40 ezitshiyeneyo, njalo zonke kuyake kuxoxwe ngazo emabhukwini ethu. Cabanga ngenotho ekhona yolwazi olumangalisayo olumayelana lobuntu bukaJehova, esingazitholela yona ngokufunda sisodwa kumbe siyimuli! Ukufunda lokhu kungasinceda ngani? Kungajulisa ukuzwisisa kwethu uBaba wethu osezulwini. Njengoba sijulisa ukuzwisisa kwethu uJehova, isifiso sethu sokusondela eduze laye lesokumlingisela siyaqina kakhulu.​—Josh. 23:8; Hubo. 73:28.

2. (a) Yiwuphi umzekeliso otshengisa indlela esingajulisa ngayo ukuzwisisa kwethu izimpawu zobuntu bukaJehova? (b) Sizahlolani?

² Kodwa kutshoni “ukuzwisisa” into ethile? Ngendlela esizalisebenzisa ngayo lapha, ibala leli litsho ukwazi ukuqakatheka kolutho oluthile. Ukuzwisisa kungajula kancane kancane. Singakufananisa lalokhu: Ukukhwabitha kwethu ukudla okutsha kuqhubeka kujula njengoba sisizwa uqhatshi lwakho besesikunambitha, sicine sesiziphekela ukudla lokho. Ngendlela efananayo, singajulisa ukuzwisisa kwethu uphawu ngalunye lobuntu bukaJehova ngokujayelana lalo, ukucabangisisa ngalo kanye lokululingisela ekuphileni kwethu. (Efe. 5:1) Inhloso yesihloko lesi kanye lezimbili ezilandelayo yikujulisa ukuzwisisa kwethu izimpawu zobuntu bukaNkulunkulu esingajayelanga ukucabanga ngazo. Kuphawu lunye ngalunye sizahlola lezizinto: Lutshoni? UJehova ulutshengisa njani? Singamlingisela njani uJehova ekutshengiseni uphawu lolu?

UJEHOVA UYANGENEKA

3, 4. (a) Ungamchaza njani umuntu ongenekayo? (b) UJehova usiqinisekisa njani ukuthi uyangeneka?

³ Ake siqale ngokuhlola loluphawu lobuntu: ukungeneka. Ungamchaza njani umuntu ongenekayo? Mhlawumbe ungathi, ‘Ngumuntu olomusa, olesikhathi labantu, njalo okulula ukukhuluma laye.’ Izikhathi ezinengi, ungakwazi ukuthi umuntu uyangeneka kumbe hatshi ngokulalela lokho akukhulumayo lokukhangela akwenzayo. Ngokwesibonelo indlela akhuluma ngayo ngezandla, ubuso lokunye akwenzayo ngaphandle kokukhuluma.

⁴ UJehova utshengisa njani ukuthi uyangeneka? Lanxa enguSomandla, uMdali womhlaba wonke uJehova wenza sibe leqiniso lokuthi uyafuna njalo uzimisele ukulalela lokuphendula imithandazo yethu. (Bala IHubo 145:18; U-Isaya 30:18, 19.) Singakhuluma loNkulunkulu okwesikhathi eside kungelandaba lokuthi singaphi kumbe ukuthi yisikhathi bani. Singathandaza kuye sikhululekile, sikwazi ukuthi kangeke asisole nxa sisenza njalo. (Hubo. 65:2; Jak. 1:5) ILizwi likaNkulunkulu lichaza uJehova ngendlela esiyizwisisayo ukuze litshengise ukuthi ufuna sikhulume laye sikhululekile. Ngokwesibonelo, umhubi uDavida wabhala ukuthi “amehlo kaJehova akhangele” thina, njalo ‘isandla sakhe sokunene siyasisekela.’ (Hubo. 34:15; 63:8) Umphrofethi u-Isaya wafananisa uJehova lomalusi esithi: “Ubuthelela amawundlu ezingalweni zakhe awathwale eseduzane lenhliziyo yakhe.” (Isa. 40:11) Akucabange ngalokho! UJehova ufuna sibe seduze kwakhe njengewundlu eligonwe esifubeni ngumalusi olothando. Akuthandabuzwa ukuthi siloBaba ongenekayo sibili! Singamlingisela njani uJehova kulokhu?

UPHAWU LOBUNTU OLUQAKATHEKISWA KAKHULU

5. Kungani kuqakathekile ukuthi abadala babe ngabangenekayo?

⁵ Eminyakeni esanda kwedlula, oFakazi abatshisekayo abahlala emazweni atshiyeneyo babuzwa ukuthi, “Yiluphi uphawu lobuntu oluqakathekisa kakhulu kumzalwane ongumdala?” Abanengi baphendula bathi, “Yikungeneka.” Kuliqiniso ukuthi umKhristu munye ngamunye kumele athuthukise loluphawu lobuntu ngokugcweleyo, kodwa kuqakatheke kakhulu ukuthi abadala babe ngabangenekayo. (Isa. 32:1, 2) Omunye udadewethu wachaza ukuthi kungani ebona lolu phawu lobuntu luqakatheke kakhulu, wathi: “Singancedwa yizimpawu zobuntu ezinhle umdala angabe elazo, kuphela nxa engeneka.” Uyakubona yini ukuba lengqondo kwamazwi la? Kodwa-ke kuyini okwenza ukuthi umuntu abe ngongenekayo?

6. Yiphi into eyisiqokoqela engenza ukuthi sibe ngabangenekayo?

⁶ Into eyisiqokoqela engenza ukuthi sibe ngabangenekayo yikuthanda abanye ngenhliziyo yonke. Nxa umdala ekhathalela abanye njalo ezimisele ukuzinikela ngenxa yabo, abafowabo labodadewabo kugoqela labantwana bazakubona lokho. (Makho 10:13-16) UCarlos oleminyaka engu-12 uthi: “Ewolu ngibona abadala behlekelela, belomusa, futhi ngiyakuthanda abakwenzayo.” Kodwa akwenelanga ukuthi umdala athi uyangeneka, kumele alutshengise ngezenzo loluphawu lobuntu. (1 Joha. 3:18) Angakwenza njani lokho?

7. Kungani ukugqoka ibheji lomhlangano kujayele ukuvusa ingxoxo, njalo singafundani kulokho?

⁷ Cabanga ngesibonelo lesi. Eminyakeni esanda kwedlula, omunye umfowethu waphenduka ngendizamtshina evela emhlanganweni kwelinye ilizwe, egqoke ibheji lomhlangano. Omunye osebenza endizamtshineni wathi ebona ibheji elalibhalwe ukuthi “UMbuso kaNkulunkulu Kawuze!” wathi kumfowethu, “Ye, kawuze sibili, kumele sixoxe okunengi ngaloludaba.” Kuthe sekumbayimbayi baxoxa, isisebenzi leso sajabulela ukuthatha amamagazini ethu. Abanengi bethu sebeke bahlangana lalokhu. Kodwa, kungani ibheji lomhlangano lijayele ukuvusa ingxoxo? Ngoba ngamanye amazwi, litshela abantu ukuthi: “Khululekani ukuzokhuluma lami. Ngibuzani ukuthi ngiyangaphi.” Ibheji luphawu olubonakalayo olwenza abantu babone ukuthi siyafuna ukuxoxa labo ngesikukholwayo. Ngendlela efananayo, abadala abangamaKhristu kumele batshengise izimpawu ezibonakalayo ezitshela abakhonza labo ukuthi: “Khululekani ukuzokhuluma lami.” Yiziphi ezinye izimpawu zakhona?

8. Abadala batshengisa njani ukuthi bathanda abanye ngenhliziyo yonke, njalo lokhu kulithinta njani ibandla?

⁸ Amasiko ayatshiyana kusiya ngezindawo, kodwa izikhathi ezinengi ukubobotheka nxa sibona abafowethu labodadewethu, ukubaqhawula ngomusa, lokubabingelela singajahanga kutshengisa ukuthi siyabathanda ngenhliziyo yonke. Ngubani okumele aqalise ukwenza lokhu? Khangela isibonelo sikaJesu. UMathewu ulandisa ukuthi uJesu esemhlanganweni labafundi bakhe, “wasondela, wakhuluma labo.” (Mat. 28:18, The Holy Bible in Ndebele) Ngendlela efananayo, lamuhla abadala yibo abaqalayo ukuya kwabakhonza labo bakhulume labo. Lokhu kungalithinta njani ibandla? Omunye udadewethu oliphayona oleminyaka engu-88 wathi: “Ukubobotheka kwabadala kanye lamazwi abo akhuthazayo nxa ngingena eWolu loMbuso kwenza ukuthi ngibathande.” Omunye udadewethu othembekileyo laye wathi: “Kungakhanya angani yinto encane nje, kodwa nxa umdala engihlangabeza ebobotheka emhlanganweni, lokho kuthinta inhliziyo yami.”

UKUNGENEKA LOKUTHOLAKALA

9, 10. (a) UJehova usibekela siphi isibonelo esihle? (b) Abadala bangenza njani ukuthi batholakale kwabanye?

⁹ Kusegcekeni ukuthi asingeke sibe ngabangenekayo nxa singatholakali. UJehova usibekela isibonelo esihle kulokhu. ‘Kakhatshana komunye lomunye wethu.’ (ImiSeb. 17:27) Okunye okwenziwa ngabadala ukuze batholakale yikuzinika isikhathi sokuxoxa labafowethu labodadewethu​—⁠abakhulileyo labancane, imihlangano ingakaqalisi futhi baxoxe labo isiphelile. Omunye umfowethu oliphayona wathi: “Nxa umdala engibuza impilo, abesesima alalele impendulo yami, ngizizwa ngiqakathekisiwe.” Omunye udadewethu osekhonze uJehova okweminyaka engaba ngu-50 wathi: “Abadala abazinika isikhathi sokukhuluma lami nxa imihlangano isiphelile benza ngizizwe ngithandwa.”

¹⁰ Kuyazwisiseka ukuthi abelusi abangamaKhristu baleminye imisebenzi abayenzayo. Kodwa emihlanganweni kumele kube ngumgomo wokuqala ukuba lesikhathi lezimvu.

UJEHOVA KABANDLULULI

11, 12. (a) Ukungabi lobandlululo kugoqelani? (b) UJehova usibekela njani isibonelo sokungabandlululi?

¹¹ Ukungabandlululi ngolunye uphawu lobuntu bukaJehova obukhangayo. Kutshoni ukungabandlululi? Kugoqela ukungabi lenkethabetshabi kumbe ukungakhethi. Ukungabandlululi kweqiniso kuhlanganisa izinto ezimbili, ukucabanga lezenzo. Kungani kokubili kudingeka? Umuntu angaphumelela ukuphatha abanye ngokungabandlululi kuphela nxa indlela abona ngayo izinto ingelabandlululo. Emibhalweni yamaKhristu yesiGiriki, umutsho othi, “kathandi abanye kulabanye abantu,” nxa uthethwe njengoba unjalo utsho ‘ukungakhangeli ubuso,’ okutsho ukungakhethi ngobuso. (ImiSeb. 10:34, Kingdom Interlinear) Yikho-ke, umuntu ongelabandlululo kasoze abelendaba lezimo kumbe indlela umuntu akhangeleka ngayo, kodwa ukhangela isimilo somuntu.

¹² UJehova uyisibonelo esedlula zonke sokungabandlululi. ILizwi lakhe lithi “kathandi abanye kulabanye abantu” njalo ‘kalabandlululo.’ (Bala ImiSebenzi 10:34, 35; UDutheronomi 10:17.) Okwenzakala ngesikhathi sikaMosi kuyayicacisa indaba le.

13, 14. (a) Amadodakazi kaZelofehadi amahlanu ahlangana laluphi uhlupho? (b) UJehova wakutshengisa njani ukuthi kalabandlululo?

¹³ Izintombi ezinhlanu ezaziyizelamani zehlelwa yinsindabaphenduli yendaba abako-Israyeli sebezangena eLizweni elalithenjisiwe. Kwakuyini? Babekwazi ukuthi imuli yabo kwakumele iphiwe ilifa elalabelwe uyise njengezinye izimuli zako-Israyeli. (Nani. 26:52-55) Kodwa uyise uZelofehadi owesizwana sakoManase wayesefile. Ngokwesiko, ilungelo lokuthatha ilifa lelizwe lalingelamadodana kaZelofehadi, kodwa wayelamadodakazi kuphela. (Nani. 26:33) Emulini le ilifa lalizaphiwa izihlobo yini, amadodakazi lawo asale engelalifa njengoba kwakungelandodana?

¹⁴ Izintombi lezi zalanda uMosi zambuza zathi: “Kungani ibizo likababa licitsha kwabosendo lwakhe ngokungabi lendodana na?” Bancenga bathi: “Sipheni ilifa lethu lathi ezihlotsheni zikababa.” Ingabe uMosi wabaphendula esithi, ‘Umthetho ngumthetho’? Hatshi, “wethula indaba yawo phambi kukaJehova.” (Nani. 27:2-5) UJehova waphendula njani? Watshela uMosi wathi: “Lokho okutshiwo ngamadodakazi kaZelofehadi kuqondile. Kufanele ubaphe isabelo sabo selifa ezihlotsheni zikayise njalo ubaphe ilifa likayise.” UJehova kacinanga khonapho. Wenza lokhu kwaba ngumthetho, waselaya uMosi esithi: “Nxa indoda ife ingelandodana, ilifa layo kaliphiwe indodakazi yayo.” (Nani. 27:6-8; Josh. 17:1-6) Kusukela mhlalokho, abesifazana bonke abako-Israyeli ababelohlupho olufananayo babezavikelwa.

15. (a) UJehova ubaphatha njani abantu bakhe, ikakhulu labo abangenelisi ukuzivikela? (b) Yiziphi ezinye izindaba eziseBhayibhilini ezitshengisa ukuthi uJehova kalabandlululo.

¹⁵ Lesi kwakuyisinqumo esitshengisa umusa lokungabandlululi! UJehova wabaphatha ngenhlonipho abesifazana laba ababengenelisi ukuzivikela, ngendlela ayephatha ngayo abako-Israyeli ababesezimeni ezinhle. (Hubo. 68:5) Le ngenye yezindaba eziseBhayibhilini etshengisa leliqiniso eliduduzayo: UJehova kazibandlululi izinceku zakhe zonke.​—1 Sam. 16:1-13; ImiSeb. 10:30-35, 44-48.

SINGAMLINGISELA UJEHOVA

16. Singenza njani ukuze singabandlululi, njalo singakuqinisa njani ukuzimisela kwethu kulokhu?

¹⁶ Singakulingisela njani ukungabandlululi kukaJehova? Khumbula ukuthi ukungabandlululi kugoqela izinto ezimbili. Singaphatha abanye ngokungakhethi kuphela nxa thina singelabandlululo. Kuliqiniso ukuthi sonke sizitshela ukuthi asikhethi njalo kasibandlululi. Kodwa uzavuma ukuthi akulula kwesinye isikhathi ukuhlola imizwa yethu ngendlela eqondileyo. Manje singenzani ukuze sikwazi ukuthi asilabandlululo? Lapho uJesu efuna ukwazi ukuthi abantu babesithini ngaye, wabuza abangane bakhe ayebathemba wathi: “Abantu bathi iNdodana yoMuntu ingubani na?” (Mat. 16:13, 14) Lawe ungenza njengoJesu. Ungabuza umngane wakho ongalifihliyo iqiniso ukuthi wena waziwa njengomuntu ongelabandlululo yini. Kumele wenzeni nxa angakutshela ukuthi uyabandlulula ngemihlobo, ngokuthi umuntu uvela ngaphi kumbe ngokuthi umuntu unothe kangakanani? Khuleka ngenhliziyo yonke kuJehova umtshela ngemizwa yakho, umncenga ukuthi akuncede ulungisise imicabango yakho ukuze kukhanye ukuthi awubandlululi ngitsho lakancane njengaye.​—Mat. 7:7; Kol. 3:10, 11.

17. Singatshengisa njani ukuthi asibandlululi abanye?

¹⁷ Ebandleni lobuKhristu, sitshengisa isifiso sethu sokulingisela ukungabandlululi kukaJehova ngokuphatha bonke abafowethu labodadewethu ngomusa wothando langenhlonipho. Ngokwesibonelo, nxa sinxusa abantu ezindlini zethu kumele sinxuse abantu abatshiyeneyo esikhonza labo, kungaba ngabavela ezindaweni ezitshiyeneyo, abangabayanga, izintandane labafelokazi. (Bala KwabaseGalathiya 2:10; UJakhobe 1:27.) Emsebenzini wokutshumayela ngoMbuso asibandlululi, sikhuluma ngezindaba ezinhle lemihlobo yonke yabantu kugoqela labavela kwamanye amazwe. Siyajabula kakhulu ukuthi senelisa ukuthola amabhuku asekelwe eBhayibhilini ngezindimi ezifika-600. Lobu yibufakazi obucacileyo bokungabandlululi.

18. Ungakutshengisa njani ukuthi uyakuzwisisa ukungeneka kukaJehova kanye lokungabandlululi kwakhe?

¹⁸ Akuthandabuzwa ukuthi ukuzwisisa kwethu uJehova kuyajula nxa sizinika isikhathi sokucabangisisa ngokungeneka lokungabandlululi kwakhe. Ukuzwisisa okujulileyo kuzasenza ukuthi silingisele izimpawu zobuntu bukaJehova ngokugcweleyo, njalo lokhu kuzakhanya ngendlela esiphatha ngayo esikhonza labo kanye lalabo esibatshumayezayo.