Zwisisa Ukuthembeka Lokuthethelela KukaJehova

1, 2. (a) Kungani sibathanda abangane abathembekileyo njalo abathethelelayo? (b) Yiphi imibuzo esizayihlola?

UNGAMCHAZA njani umngane weqiniso? Udade okuthiwa ngu-Ashley uthi yena: “Kimi umngane weqiniso ngulowo ongakulahliyo loba sekutheni njalo okuthethelelayo nxa uphambanisile.” Sonke siyabathanda abangane abathembekileyo njalo abathethelelayo. Benza sizizwe sithandwa njalo singesabi.​—Zaga. 17:17.

² UJehova ngumngane othembekileyo njalo othethelelayo ukwedlula bonke esingabathola. Kunjengoba nje umhubi watsho: “Uyathethelela njalo ulungile, O Jehova, ugcwele uthando [kumbe “uthando oluqotho”] kulabo abakhuleka kuwe.” (Hubo. 86:5) Kodwa kutshoni ukuthembeka lokuthethelela? UJehova uzitshengisa njani lezizimpawu zobuntu ezinhle? Thina singasilingisela njani isibonelo sakhe? Izimpendulo zemibuzo le zizasinceda ukuthi sijulise ukuthanda kwethu uJehova, umngane wethu owedlula bonke. Zizasinceda lokuthi siqinise ubungane bethu labanye.​—1 Joha. 4:7, 8.

UJEHOVA UTHEMBEKILE

3. Kutshoni ukuba ngothembekileyo?

³ Ukuthembeka luphawu olukhangayo oluhlanganisa ukuzinikela, ukubaqotho njalo ukusekela ngenhliziyo yonke. Umuntu othembekileyo kasuye thathekile. Kodwa unamathela ngothando komunye umuntu (kumbe entweni ethile) enamathela nama kulowomuntu (kumbe ulutho) lanxa izimo zinzima. UJehova ‘uNgcwele [“uthembeke,” NW ]’ ngokupheleleyo sibili.​—Isam. 16:5.

4, 5. (a) UJehova ukutshengisa njani ukuthembeka? (b) Ukucabangisisa ngezenzo zikaJehova zokuthembeka kungasiqinisa njani?

⁴ UJehova ukutshengisa njani ukuthembeka? Kazilahli izikhonzi zakhe ezithembekileyo. Esinye isikhonzi sakhe, iNkosi uDavida, savuma ukuthi uJehova uthembekile. (Bala u-2 Samuyeli 22:26.) Ngesikhathi uDavida elingwa, uJehova waba ngothembekileyo kuye ngokumqondisa, ngokumvikela langokumsindisa. (2 Sam. 22:1) UDavida wayekwazi ukuthi ukuthembeka kukaJehova akupheleli ekukhulumeni kuphela. Kungani uJehova wathembeka kuDavida? Ngoba uDavida yena ngokwakhe ‘wayengothembekileyo.’ UJehova uyakuqakathekisa ukuthembeka kwezikhonzi zakhe, njalo uba ngothembekileyo kuzo.​—Zaga. 2:6-8.

⁵ Ukucabangisisa ngezenzo zikaJehova zokuthembeka kungasiqinisa. Omunye umfowethu othembekileyo okuthiwa nguReed uthi: “Kuyanginceda kakhulu ukubala ngendlela uJehova aphatha ngayo uDavida ngesikhathi ecindezelekile. UJehova wamsekela njalo wamnakekela ngesikhathi eyisiphepheli, ecatsha ezimbalwini ezitshiyeneyo. Lokhu kuyangikhuthaza kakhulu! Kungikhumbuza ukuthi lanxa ngilohlupho olunganani kumbe kukhanya kungaselathemba uJehova uzabe elami uma ngiqhubeka ngithembekile.” Akuthandabuzwa ukuthi lawe uzizwa njalo.​—Roma. 8:38, 39.

6. Yiziphi ezinye izindlela uJehova atshengisa ngazo ukuthembeka njalo lokhu kuzinceda njani izikhonzi zakhe?

⁶ Yiziphi ezinye izindlela uJehova atshengisa ngazo ukuthembeka? Kantshintshantshintshi ezimisweni zakhe. Uyasithembisa: ‘Lasebudaleni benu, mina nginguye.’ (Isa. 46:4) Uhlala esenza izinqumo ezisekelwe ezimisweni zakhe ezingaguqukiyo mayelana lokuhle lokubi. (Mal. 3:6) Okunye yikuthi uJehova utshengisa ukuthembeka ngokuhlala eqotho ezithembisweni zakhe. (Isa. 55:11) Yikho-ke ukuthembeka kukaJehova kuphathisa zonke izikhonzi zakhe ezithembekileyo. Njani? Nxa sibambelela ezimisweni zikaJehova ngamandla ethu wonke, sizaba leqiniso lokuthi uzasigcwalisa isithembiso sakhe sokusibusisa.​—Isa. 48:17, 18.

LINGISELA UKUTHEMBEKA KUKAJEHOVA

7. Yiphi enye indlela esingalingisela ngayo ukuthembeka kukaNkulunkulu?

⁷ Singakulingisela njani ukuthembeka kukaJehova? Enye indlela yikuthatha inyathelo lokunceda labo abasebunzimeni. (Zaga. 3:27) Ngokwesibonelo, ukhona yini okhonza laye okhathazwa yikugula, ukuphikiswa emulini, kumbe ukusilela kwakhe? Kungani ungahle uthathe inyathelo lokumsiza ‘ngamazwi omusa, amazwi aduduzayo’? (Zek. 1:13)a Nxa usenza njalo, uyabe utshengisa ukuthi ungumngane othembekileyo njalo oweqiniso, “umngane othembeka okudlula umfowenu.”​—Zaga. 18:24.

8. Singakulingisela njani ukuthembeka kukaJehova, ngokwesibonelo emtshadweni?

⁸ Singaphinda silingisele ukuthembeka kukaJehova ngokuhlala sithembekile kwesibathandayo. Ngokwesibonelo nxa singabatshadileyo siyakwazi ukuthi kumele sihlale sithembekile komunye wethu. (Zaga. 5:15-18) Yikho-ke, asiqali ukudlala ngengozi ngokuzama ukwenza izinto ezingenza sicine sifebile. (Mat. 5:28) Kanti njalo sitshengisa ukuthembeka kwesikhonza labo ngokwenyanya unyeyo oluyingozi kumbe ukunyundela, langokungahambi sifafaza inkulumo ezinjalo kumbe ukuzilalela.​—Zaga. 12:18.

9, 10. (a) Ngubani okumele sizimisele ukuhlala sithembekile kuye? (b) Kungani kungalula kwezinye izikhathi ukulalela imilayo kaJehova?

⁹ Phezu kwakho konke sifuna ukuhlala sithembekile kuJehova. Sikwenza njani lokhu? Ngokuzama ngamandla ukubona izinto ngendlela azibona ngayo, okutsho ukuthanda lokho akuthandayo lokuzonda lokho akuzondayo besesiziphatha ngokuvumelana lakho. (Bala IHubo 97:10.) Nxa singaqhubeka silola imicabango lemizwa yethu ukuthi kuhambelane lemicabango lemizwa kaJehova, kuzaba lula ngathi ukulalela imilayo yakhe.​—Hubo. 119:104.

¹⁰ Kuliqiniso ukuthi kwezinye izikhathi akusoze kube lula ukulalela imilayo kaJehova. Kungadingeka ukuthi sisebenze nzima ukuze sihlale sithembekile. Singacabanga ngamanye amaKhristu alesifiso sokutshada, kodwa angakamtholi umuntu ofaneleyo phakathi kwezikhonzi zikaJehova. (1 Kor. 7:39) Udade ongakatshadi angabe esebenza labantu abangakholwayo abahlala bezama ukumhlanganisa lamajaha athile. Mhlawumbe udade lo angabe ehlutshwa yisizungu. Lanxa kunjalo, uyazimisela ukulwisana lakho konke ukuze alondoloze ubuqotho bakhe kuJehova. Asiziqakathekisi yini izibonelo ezinhle kangaka zokuthembeka? Kuliqiniso sibili ukuthi uJehova uzabanika umvuzo labo abahlala bethembekile lanxa behlangana lobunzima.​—Heb. 11:6.

UJEHOVA UYATHETHELELA

11. Kutshoni ukuba ngothethelelayo?

¹¹ Olunye uphawu lobuntu bukaJehova obukhanga kakhulu yisifiso sakhe sokuthethelela. Kutshoni ukuba ngothethelelayo? Ngamafitshane, kugoqela ukuxolela umuntu okuphambaniseleyo nxa kulesizathu esizwakalayo sokwenza njalo. Lokhu akutsho ukuthi umuntu othethelelayo ukuthatha lula ukuthi wonelwe kumbe uyaphika ukuthi kwenzakele. Kodwa kutsho ukuthi ukhetha ukungabambi isikhwili. IMibhalo ifundisa ukuthi uJehova ‘uyabathethelela’ labo abatshengisa ukuthi baphenduka ngeqiniso.​—Hubo. 86:5.

12. (a) UJehova ukutshengisa njani ukuthi uyathethelela? (b) Kutshoni ukwenza ukuthi izono ‘zesulwe’?

¹² UJehova ukutshengisa njani ukuthi uyathethelela? Nxa uJehova ethethelela wenza lokhu “ngesihle,” uthethelela ngokupheleleyo njalo kuze kube phakade. (Isa. 55:7) Sikwazi njani ukuthi uJehova uthethelela ngokupheleleyo? Khangela isiqinisekiso esikumiSebenzi 3:19. (Bala.) Umphostoli uPhethro wakhuthaza ababemlalele ukuthi ‘baphenduke, babuyele kuNkulunkulu.’ Nxa isoni siphenduka okweqiniso siyabe sizisola kakhulu ngento embi esiyenzileyo futhi sizimisele lokungasiphindi isono leso. (2 Kor. 7:10, 11) Kanti njalo, ukuphenduka kweqiniso kwenza isoni ‘sibuyele kuNkulunkulu,’ besesitshiya izinto ezimbi njalo senze lokho okumthokozisayo. Kwakuzakwenzakalani nxa ababelalele uPhethro babetshengisa ukuthi sebephenduke okweqiniso? UPhethro wathi lokhu kwakuzakwenza ukuthi izono zabo ‘zesulwe.’ Ibala leli livela ebaleni lesiGiriki elitsho “ukutshabalalisa loba ukucitsha.” Yikho-ke nxa uJehova ethethelela ucitsha konke, akhohlwe ngakho. Uthethelela ngokupheleleyo.​—Heb. 10:22; 1 Joha. 1:7.

13. Yikuphi ukuqiniseka esibalakho ngamazwi athi “ngingazikhumbuli futhi izono zabo”?

¹³ Sikwazi njani ukuthi ukuthethelela kukaJehova ngokwaphakade? Khangela isiphrofetho sikaJeremiya esiphathelane lesivumelwano esitsha esenziwa lamaKhristu agcotshiweyo, njalo esenza ukuthi labo abalokholo enhlawulweni bathethelelwe okweqiniso. (Bala uJeremiya 31:34.) UJehova uthi: “Ngizabathethelela ububi babo, ngingazikhumbuli futhi izono zabo.” Ngakho uJehova usiqinisekisa ukuthi nxa angasithethelela, kasoze aphinde asijezisele lezozono ngesikhathi esizayo. Kasibaliseli izono zethu ukuze asisole kumbe asijezise kanenginengi. Kodwa uyasithethelela lezozono abesezilahlela khatshana angaphindi azikhumbule futhi.​—Roma. 4:7, 8.

14. Ukucabangisisa ngokuthethelela kukaJehova kungasiduduza njani? Nika isibonelo.

¹⁴ Singathola induduzo nxa sicabangisisa ngokuthethelela kukaJehova. Cabanga ngesibonelo lesi. Eminyakeni eminengi eyadlulayo, udade esizamuthi ngu-Elaine wasuswa. Ngemva kweminyaka ethile wasebuyiselwa. U-Elaine uyavuma esithi: “Lanxa ngangikwazi njalo ngitshela abanye ukuthi ngiyakholwa ukuthi uJehova ungithethelele, ngangilokungumuzwa kokuthi ukhatshana lami kumbe ukuthi abanye baseduze laye kulami njalo ungokoqobo sibili kubo.” Kodwa u-Elaine waduduzwa yikubala lokucabangisisa ngezifenqo ezisetshenziswa ukuchaza ukuthethelela kukaJehova eBhayibhilini. Uqhubekela phambili esithi: “Ngangikaze ngikunanzelele ukuthi uJehova uyangithanda futhi uyangikhathalela kangaka.” Okwamthinta kakhulu ngamazwi la: “Nxa uJehova ethethelela izono zethu, akumelanga sizizwe angani izono lezo zilitshatha elingacitshekiyo okwempilo yethu yonke.”b U-Elaine uthi: “Ngananzelela ukuthi ngangingakukholwa ukuthi uJehova angangithethelela ngokupheleleyo futhi ngangicabanga ukuthi ngizahlala ngilomthwalo onzima okwempilo yami yonke. Ngiyakwazi ukuthi kuzathatha isikhathi, kodwa sengiqalisa ukuzizwa ukuthi sengisondela kuJehova sibili njalo ngizwa angani ngethulwe umthwalo onzima.” Sikhonza uNkulunkulu olothando njalo othethelelayo sibili!​—Hubo. 103:9.

LINGISELA UKUTHETHELELA KUKAJEHOVA

15. Singakulingisela njani ukuthethelela kukaJehova?

¹⁵ Singalingisela ukuthethelela kukaJehova ngokuba ngabathethelelanayo loba nini lapho okuyabe kulesizathu esihle sokwenza njalo. (Bala uLukha 17:3, 4.) Khumbula ukuthi nxa uJehova ethethelela, uyazikhohlwa izono zethu ngomqondo wokuthi kaphindi asibalisele zona kumbe asijezise. Nxa sithethelela abanye lathi kumele sikhohlwe izono zabo ngokwekela indaba idlule futhi singaphindi siyivuse kusasa.

16. (a) Ukuba ngothethelelayo kutsho yini ukungavumi ukuthi siphanjanisiwe kumbe ukwekela abantu besidelela? Chasisa. (b) Kumele senzeni ukuze uNkulunkulu asithethelele?

¹⁶ Ukuba ngothethelelayo akutsho ukuthi awuvumi ukuthi uphanjanisiwe kumbe ukuvumela abanye ukuthi bakudelele. Kodwa ngamazwi alula nje kutsho ukuthi sikhetha ukungabambi isikhwili. Yikho-ke okuqakathekileyo yilokhu, ukuze sithethelelwe nguNkulunkulu, kumele silingisele ukuthethelela kukaJehova ekusebenzelaneni labanye. (Mat. 6:14, 15) Kanti futhi isihawu yiso esenza uJehova akhumbule “ukuthi siluthuli.” (Hubo. 103:14) Ngakho-ke, akungeke kube kuhle yini ukuthi lathi sivumele isihawu sisenze samukele ukuthi abanye bayaphambanisa njalo sibathethelele ngokukhululeka langenhliziyo yonke?​—Efe. 4:32; Kol. 3:13.

17. Kuyini okungasinceda nxa omunye esikhonza laye esikhubile?

¹⁷ Iqiniso yikuthi kwezinye izikhathi akulula ukuthethelela. Lamanye amaKhristu agcotshiweyo ekhulwini lokuqala akuthola kunzima ukuthi akhulumisane kuhle ngokungazwanani okwakuphakathi kwawo. (Flp. 4:2) Nxa omunye esikhonza laye esikhubile kuyini okungasinceda? Cabanga ngoJobe. Kwamzwisa ubuhlungu kakhulu okwenziwa “ngabangane bakhe” u-Elifazi, uBhilidadi, loZofari ngesikhathi bemhlasela ngamazwi abuhlungu kungelabufakazi. (Jobe 10:1; 19:2) Ekucineni uJehova wabasola labo bamangaleli bamanga, wasebatshela ukuthi bahambe kuJobe ukuze benze umnikelo ngenxa yesono sabo. (Jobe 42:7-9) Kodwa uJehova wayefuna ukuthi uJobe enze okuthile. Kwakuyini lokho? UJehova wathi uJobe abakhulekele laba ababeke bammangalela. UJobe wenza khona kanye uJehova ayekutshilo njalo uJehova wambusisa ngenxa yokuthethelela kwakhe. (Bala uJobe 42:10, 12, 16, 17.) Sifundani kulokhu? Ukukhuleka ngenhliziyo yonke sikhulekela umuntu osiphambaniseleyo kungasenza singambambeli isikhwili.

QHUBEKA UZWISISA IZIMPAWU ZOBUNTU BUKAJEHOVA NGOKUGCWELEYO

18, 19. Singenzani ukuze siqhubeke sijulisa ukuzwisisa kwethu ubuntu bukaJehova obukhangayo?

¹⁸ Kusithokozise kakhulu ukuxoxa ngezingxenye ezitshiyeneyo zobuntu bukaJehova obukhangayo. Sesibonile ukuthi uyangeneka, kabandlululi, uyaphana, uyazwisisa, uthembekile njalo uyathethelela. Kodwa siphongukha phezulu nje. Sizathokoziswa yikufunda okunengi ngoJehova kuze kube nini lanini. (UmTshu. 3:11) Sivumelana lomphostoli uPhawuli owabhala ukuthi: “Yeka ukuzika kwenotho yenhlakanipho kanye lokwazi kukaNkulunkulu,” ikakhulu uthando lezimpawu zobuntu eziyisithupha esixoxe ngazo.​—Roma. 11:33.

¹⁹ Kungaba kuhle nxa sonke singaqhubeka sijulisa ukuzwisisa kwethu ubuntu bukaJehova obukhangayo. Singakwenza lokhu ngokujayelana lezimpawu zobuntu bakhe, ukucabangisisa ngazo, lokuzilingisela ekuphileni kwethu. (Efe. 5:1) Njengoba siqhubeka sisenza lokho asisoze sithikaze ukuvumelana lomhubi owahlabela esithi: “Kodwa mina kimi kuhle ukuba seduze loNkulunkulu.”​—Hubo. 73:28.