Iphonogirafi​—Iyingozi Yini Kumbe Hatshi?

Lamuhla umhlaba ugcwele iphonogirafi.a Ingatholakala ezintweni zokukhangisa, ezefeshini, kumafilimu, emiculweni, lakumamagazini, kanye lakumathelevizhini, kumidlalo yevidiyo, emafonini, kumaWebhusayithi njalo khathesi kuzinhlelo zokuthumezelana imifanekiso ku-internet. Kukhanya angani iphonogirafi yinto esidume kakhulu. Abantu abanengi ezindaweni ezinengi baqhubeka bebukela iphonogirafi kakhulu ukwedlula loba nini.​—Bona ibhokisi elithi “Iqiniso Eliphathelane Lephonogirafi.”

Imihlobo yephonogirafi iyantshintsha. Usikhwicamfundo uGail Dines uthi nxa ebhala: “Imifanekiso lamuhla isimibi kakhulu okokuthi iphonogirafi okwakuthiwa iyethusa kuqala, khathesi isijayelekile.”

Uzibona njani wena izinto ezinjalo? Iphonogirafi yikuzilibazisa okungelangozi, yitshefu, noma yinto engatsho lutho nje yini? UJesu wathi: “Sonke isihlahla esihle sithela izithelo ezinhle, kodwa isihlahla esibi sithela ezimbi.” (UMathewu 7:17) Iphonogirafi ithela izithelo ezinjani? Ukuze sithole izimpendulo ake sihlole eminye imibuzo eqakathekileyo ngephonogirafi.

Iphonogirafi ithinta njani abayibukelayo?

OKUTSHIWO ZINGCITSHI: Iphonogirafi yinto enzima ukuyitshiya, abanye abacubunguli labodokotela baze bayiqathanise lesidakamizwa i-crack cocaine.

UBrian,b owayelomkhuba wokubukela iphonogirafi ku-internet, uthi: “Ngangingavumeli lutho lungiphambanisa. Ngangisehluleka ukulawula imicabango yami. Ngangiqhuqha njalo ngitshaywe likhanda. Ngazama ukwekela kodwa ngemva kweminyaka eminengi ngangilokhu ngibanjwe ngumkhuba lo.”

Abantu ababukela iphonogirafi bajayele ukufihla umkhuba wabo. Bathanda ukufihla njalo bayakhohlisa. Yikho-ke, akumangalisi ukuthi abantu abanengi abayibukelayo bahlutshwa yimizwa yesizungu, yokuyangeka, yokukhathazeka lolaka. Ngezinye izikhathi bayaba lesifiso sokuzibulala. UNkazimulo owayedawuniloda phose nsukuzonke iphonogirafi efonini yakhe uthi: “Ngasengiphila elizweni lamaphupho njalo ngiswela lokuthi ngibambe ngaphi. Ngangizizwa ngingasilutho, ngilecala, ngilesizungu njalo kungelanto engangingayenza. Ngangiyangeka kakhulu njalo ngangisesaba ukudinga uncedo.”

Ukubukela nje kancane loba ukuyithi tshazi ngengozi iphonogirafi kungaba lempumela emibi. UDokotela uJudith Reisman umcubunguli omkhulu wephonogirafi emi njengofakazi phambi kwekhomithi ye-U.S. Senate wafakaza wathi: “Imifanekiso yephonogirafi iyanamathela engqondweni njalo iyintshintshe, ifaka ividiyo enzima ukucitsha engqondweni loba engacitshekiyo.” USusan oleminyaka engu-19 owayebukela amaWebhusayithi ephonogirafi, uthi: “Imifanekiso inamathele engqondweni yami. Iyaphongufika yodwa engqondweni. Ngizwa angani kangisoze ngenelise ukuyicitsha yonke engqondweni.”

NGAMAFITSHANE: Iphonogirafi iyagqilaza njalo ibathwalise amagabha avuzayo abayibukelayo.​—2 UPhetro 2:19.

Iphonogirafi ithinta njani izimuli?

OKUTSHIWO ZINGCITSHI: “Izimuli ziyadilika ngenxa yephonogirafi.”​—Ibhuku elithi The Porn Trap, elibhalwe nguWendy loLarry Maltz.

Iphonogirafi ichitha imitshado lezimuli ngezindlela lezi ezilandelayo:

• Ngokululaza ezemacansini, ukuthembana lothando emtshadweni.​—IZaga 2:12-17.

• Ngokukhuthaza ukungabi lendaba lomunye wakho, ukungafuni ukuveza imizwa kuye lokungasuthiseki ngaye.​—Kwabase-Efesu 5:28, 29.

• Ngokwenza ukuthi umuntu ahlale ecabanga ngezemacansini lokukhanuka okungalunganga.​—2 UPhetro 2:14.

• ▪ Ngokulinga abayibukelayo ukuthi babambe ngamandla abatshade labo ukuthi balingisele imikhuba engamihle abayibonileyo kuphonogirafi.​—Kwabase-Efesu 5:3, 4.

• Ngokukhuthaza izenzo lemizwa yokuphinga.​—UMathewu 5:⁠28.

IBhayibhili litshela abantu abatshadileyo ukuthi ‘bangahlukuluzani.’ (UMalaki 2:16) Ukuphinga yisihluku esingaphambanisa umtshado njalo kudala ukuthi kube lokwehlukana kwesikhatshana lokuchitheka kwemitshado. Ukwehlukana okunjalo kulimaza abantwana.

Iphonogirafi ingalimaza bona ngokwabo abantwana. UBrian okuke kwakhulunywa ngaye, uthi: “Ngavumbulula amamagazini kababa awephonogirafi ngidlala umacatshelana ngileminyaka engu-10. Ngaqalisa ukuwabuka ngicatsha ngingazwisisi ukuthi kungani imifanekiso yakhona yayingikhanga kangaka. Lokhu kwaba yikuqala komkhuba olimazayo owaqhubeka ngaze ngaba ngumuntu omdala.” Ukuhlola kutshengisa ukuthi iphonogirafi ingenza ukuthi abasakhulayo baqalise ukuya emacansini besesebancane kakhulu lokuthi bangaziphathi, babelodlakela emacansini, lokuthi bangahlaliseki emoyeni lasengqondweni.

NGAMAFITSHANE: Iphonogirafi iyalimaza ubungane obulothando ibisilimaza izinhliziyo zabanye.​—IZaga 6:27.

IBhayibhili lithini ngephonogirafi?

ILIZWI LIKANKULUNKULU LITHI: “Kubulaleni konke okungokwemvelo yenu yasemhlabeni: ukuxhwala kobufebe, ukungcola, inkanuko, izifiso ezimbi kanye lobuhwaba, okuyikukhonza izithombe.”​—KwabaseKholose 3:5.

Ngamazwi alula nje, uJehovac uNkulunkulu uyayizonda iphonogirafi. Ayisikho ukuthi ziyamethusa izindaba zemacansini. Wasidala silamandla okuya emacansini wasesenza ukuthi abantu abatshadileyo basebenzise lawomandla ukuze bathokozisane, futhi kubenza bathandane kakhulu njalo bathokoziswe yisimanga sokuzala abantwana.​—UJakhobe 1:17.

Kuyini okusenza sibe leqiniso lokuthi uJehova uyayizonda sibili iphonogirafi? Cabanga ngezizathu ezilutshwana ezilandelayo.

• Uyakwazi ukuthi iphonogirafi iyaphambanisa empilweni.​—Kwabase-Efesu 4:17-19.

• Uyasithanda njalo ufuna ukusivikela ukuthi singalimali.​—U-Isaya 48:17, 18.

• UJehova ufuna ukuvikela imitshado lezimuli.​—UMathewu 19:4-6.

• Ufuna sihlanzeke ekuziphatheni lokuthi sihloniphe amalungelo abanye abantu.​—1 KwabaseThesalonika 4:3-6.

• Ufuna sihloniphe amandla ethu okuzala njalo siwasebenzise ngendlela efaneleyo.​—KumaHebheru 13:4.

• UJehova uyakwazi ukuthi iphonogirafi itshengisa umbono wobugovu futhi ongalunganga ophathelane lezemacansini njalo ovela kuSathane.​—UGenesisi 6:2; UJuda 6, 7.

NGAMAFITSHANE: Iphonogirafi ilimaza ubungane bomuntu loNkulunkulu.​—KwabaseRoma 1:24.

Loba kunjalo, uJehova ulesihawu ngabantu abafuna ukutshiya umkhuba wokubukela iphonogirafi. IBhayibhili lithi: ‘UJehova ulesihawu njalo ulomusa, uyaphuza ukuthukuthela, kodwa uyanda ngothando. Ngokuba uyakwazi ukuthi sibunjwa njani, uyakhumbula ukuthi siluthuli.’ (IHubo 103:8, 14) Unxusa abantu abathobekileyo ukuthi bacele kuye ‘isihawu njalo bathole umusa wokubasiza ezikhathini zokuswela kwabo.’​—KumaHebheru 4:16; bona ibhokisi elithi “Ukunqoba Umkhuba Wokubukela Iphonogirafi.”

Abantu abanengi sebelwamukele uncedo oluvela kuNkulunkulu. Uncedo lwakhe luyasebenza yini? Khangela ukuthi iBhayibhili lithini ngabanye abanqoba imikhuba emibi: “Selageziswa, selangcweliswa, selalungiswa ngebizo leNkosi uJesu Khristu langomoya kaNkulunkulu wethu.” (1 KwabaseKhorinte 6:11) Njengomphostoli uPhawuli abantu abanjalo bangathi: “Ngingazenza zonke izinto ngaye onginika amandla.”​—KwabaseFiliphi 4:13.

USusan owanqoba umkhuba wokubukela iphonogirafi uthi: “UJehova nguye yedwa ongakunceda ukuthi utshiye umkhuba lo. Nxa ungacela ukuthi akuncedise lokuthi akukhokhele, ungaba lobuhlobo obuhle laye. Kasoze akudanise.”