Imibuzo yeBhayibhili Iyaphendulwa

UNkulunkulu uyayilalela yini yonke imithandazo?

UNkulunkulu uyabalalela abantu bazo zonke izizwe. (IHubo 145:18, 19) ILizwi lakhe iBhayibhili lisikhuthaza ukuthi simtshele konke okusihluphayo. (KwabaseFiliphi 4:6, 7) Lanxa kunjalo, eminye imithandazo ayimthokozisi uNkulunkulu. Ngokwesibonelo, ukuphindaphinda imithandazo ebanjwa ngekhanda akumthokozisi.​—Bala uMathewu 6:7.

Okunye njalo yikuthi uJehova uyayizonda imithandazo yabantu abawephula ngabomo umthetho wakhe. (IZaga 28:9) Ngokwesibonelo, endulo uNkulunkulu wala ukulalela imithandazo yabako-Israyeli ababelecala lokubulala. Kuyacaca-ke ukuthi kulezinto okumele sizenze ukuze uNkulunkulu asizwe.​—Bala u-Isaya 1:15.

Kumele senzeni ukuze uNkulunkulu asizwe?

Asingeke sithandaze kuNkulunkulu nxa singelalo ukholo. (UJakhobe 1:5, 6) Kumele singathandabuzi ukuthi ukhona lokuthi uyasikhathalela. Singaluqinisa ukholo lwethu ngokufunda iBhayibhili, ngoba ukholo lweqiniso lusekelwa yibufakazi kanye lezithembiso ezitholakala eLizwini likaNkulunkulu.​—Bala kumaHebheru 11:1, 6.

Kumele sithandaze siqotho njalo sithobekile. LeNdodana kaNkulunkulu uJesu yayithandaza ithobekile. (ULukha 22:41, 42) Yikho-ke kulokuthi simtshele uNkulunkulu ukuthi enzeni, kufanele sizwisise lokho akufunayo ngokubala iBhayibhili. Sibe sesithandaza ngezinto ezihambelana lentando yakhe.​—Bala u-1 Johane 5:14.