IMIBUZO YEBHAYIBHILI IYAPHENDULWA
Kuyini okuzakwenza ukuthi uKhristu aphenduke?
UJesu Khristu engakayi ezulwini ngo-33 C.E., wathembisa ukuthi uzaphenduka. Wazifananisa lendoda yasesikhosini eyahamba okwesikhathi eside yasiphenduka ilamandla okubusa, isiyinkosi. UJesu uzaphenduka ukuze azoletha uhulumende omuhle ebantwini.—Bala uLukha 19:11, 12.
UJesu uzalethela abantu uhulumende omuhle
UKhristu uphenduka elomzimba onjani? Wavuswa eseyisidalwa somoya esingabonakaliyo. (1 UPhetro 3:18, NW) Wasesiya ezulwini wayahlala ngasekunene sikaNkulunkulu. (IHubo 110:1) Ngemva kwesikhathi esithile, uJesu wamiswa phambi kukaJehova uNkulunkulu, “uSimakade” wasenikwa amandla okubusa abantu. Yikho-ke uJesu kaphenduki abonwe ngabantu, kodwa uphenduka eyiNkosi engabonakaliyo.—Bala uDanyeli 7:13, 14.
UJesu uzafika enzeni?
Ngesikhathi uJesu ozabe engabonwa ngabantu efika lezingilosi zakhe, uzakwahlulela abantu. Uzabhubhisa abantu ababi kodwa labo abamukela ubukhosi bakhe uzabanika ukuphila okungapheliyo.—Bala uMathewu 25:31-33, 46.
INkosi uJesu izantshintsha umhlaba ube lipharadayisi. Izavusa abafileyo ukuze bakholise ukuphila ePharadayisi emhlabeni.—Bala uLukha 23:42, 43.