ISHLOKO ESISEKUQALISENI
Ngubani Ongakhuluma Iqiniso Ngekusasa?
Sonke sihlala sicabanga ngekusasa. Siyazibuza ukuthi ikusasa lethu lelezihlobo zethu kanye labangane bethu lizabe linjani. Sihlala sizibuza imibuzo enjengale elandelayo: ‘Kambe abantwabami bazake bahlale emhlabeni ongcono yini? Umhlaba uzatshabalaliswa yisehlakalo esiyingozi yini? Ngingenzani ukuze ikusasa lami libe ngcono?’ Sazalwa sifuna ukwazi izimpendulo zemibuzo le njalo ngokwemvelo sifuna ukuthi izinto zisihambele kuhle lokuthi sihlale sikhuthazwa. Nxa uleqiniso lokuthi ikusasa lizabe linjani, ulakho ukulilungiselela kukho konke.
Kodwa lizabe linjani ikusasa lakho? Ukhona yini okwaziyo? Izikhwicamfundo ezizama ukukhuluma ngekusasa ziyake zikhulume okuthile kwenzakale, kodwa okunengi ezikutshoyo akwenzakali. Lanxa kunjalo, iLizwi lakhe lisitshela ukuthi uNkulunkulu uyenelisa ukukhuluma okuyikho kanye okuzakwenzakala. Lithi: “Mina ngenza isiphetho sazakale kusukela ekuqaleni; lokuzakwenzakala kusukela ezikhathini zasendulo.” (U-Isaya 46:10) Kuyenzakala yini okukhulunywa nguNkulunkulu?
OKUKHULUNYWA NGUNKULUNKULU KUYENZAKALA
Kungani kumele uhlole ukuthi iziphrofetho ezazikhulunywe nguNkulunkulu endulo zagcwaliseka yini? Akuthandabuzwa ukuthi ungathokoza nxa ungananzelela ukuthi konke okukhulunywa ngumuntu ohlola umumo womkhathi kuhlala kusenzakala njengoba kunjalo nsuku zonke. Nxa esekutshela ukuthi umkhathi uzabe unjani kusasa uyabe uzamlalela sibili. Yikho-ke nxa ungazinika isikhathi sokufunda ngezehlakalo ezazikhulunywe nguNkulunkulu uzabona ukuthi zenzakala sibili. Lokhu kuzakwenza ukuthi ufise ukuzwa okunengi mayelana lalokho uNkulunkulu akukhulumayo ngekusasa lakho.
Umduli owakhiwa kutsha, edolobheni leNineve elachithwa kudala
UKUCHITHWA KWEDOLOBHO ELIKHULU:
Kungamangalisa sibili ukuthi umuntu akhulume ngokuthi idolobho elikhulu njalo ebelilamandla okwamakhulu eminyaka lizabhujiswa masinyane nje, besekusenzakala njengoba kunjalo. Yikho kanye okwenziwa nguNkulunkulu. Wathuma umphrofethi wakhe ukuthi atshele abantu ukuthi idolobho laseNineve lalizabhidlizwa. (UZefaniya 2:13-15) Lokhu kuyatholakala yini emabhukwini ezembali? Ngekhulu lesikhombisa B.C.E., sekwedlule iminyaka engaba ngu-15 uNkulunkulu ekukhulumile lokhu, abaseBhabhiloni laMamede bahlasela iNineve bayibhidliza. Kanti njalo uNkulunkulu wakucacisa ukuthi iNineve ‘yayizatshabalala ngokupheleleyo njalo yome njengenkangala.’ Kambe lokhu okwakukhulunywe kuseselesikhathi kwenzakala njengoba kunjalo yini? Ye, kwenzakala sibili. Lanxa idolobho leli lalilamalokitshi ayengalingana lendawo engama-acre angaba ngu-128 000 (518 km2), abahlaseli laba abazange balilondoloze idolobho leli kumbe balenze impango yabo. Kodwa balitshabalalisa. Akulangcitshi ehlola ngezombangazwe eyayingakhuluma ngezehlakalo ezinjengalezi besezisenzakala njengoba zinjalo.
AMATHAMBO ABANTU AZATSHISWA:
Kambe ngubani owayengaba lesibindi sokubika ngesehlakalo kusasele iminyaka engu-300 ukuthi senzakale? Aphinde akhulume ngendoda eyayizazalwa esizweni esithile eyayizatshisa amathambo abantu e-alithareni edolobheni elithile, aze ayiqambe langebizo? Nxa kuyikuthi lokhu kwagcwaliseka sibili, umuntu owakukhulumayo uyabe ezathenjwa ngabantu abanengi. Isithunywa sikaNkulunkulu sathi: “Kuzazalwa indodana endlini kaDavida, egama layo linguJosiya” njalo ‘izakwenza ukuthi amathambo atshiselwe’ e-alithareni edolobheni laseBetheli. (1 AmaKhosi 13:1, 2) Ngemva kweminyaka engamakhulu amathathu, inkosi eyayilebizo elingajayelekanga eBhayibhilini okwakuthiwa nguJosiya yazalwa kwabosendo lukaDavida. Okwakukhulunyiwe kwenzakala njengoba kunjalo ngoba uJosiya ‘wathi kususwe [“amathambo,” NW ] emangcwabeni atshiswe e-alithareni’ eliseBetheli. (2 AmaKhosi 23:14-16) Akuthandabuzwa ukuthi akulamuntu owayengabika ngesehlakalo esinjengalesi ngaphandle kokuthi ethunywe ngothile olamandla amakhulukazi.
Bible prophets foretold the fall of Babylon with amazing accuracy
UKUTSHABALALA KOMBUSO OTHILE:
Kungamangalisa sibili ukuthi umuntu othile aqambe ibizo lendoda ethile ingakazalwa, njalo achaze lokuthi izanqoba umbuso olamandla amakhulu emhlabeni wonke. Kanti njalo atsho lecebo elingajayelekanga ezalisebenzisa nxa isihlasela. UNkulunkulu wabika ukuthi indoda okuthiwa nguKhurosi yayizakhokhela ekunqobeni ilizwe elithile. Kanti njalo indoda le yayizakhulula abakoJuda njalo ibancedise ukwakha kutsha ithempeli labo elingcwele. UNkulunkulu wabika lokuthi ibutho likaKhurosi lalizahlasela langokomisa imifula lokuthi amasango ayezatshiywa evuliwe okwakuzabangela ukuthi kube lula ukunqoba. (U-Isaya 44:27–45:2) Lokhu okwaphrofethwa nguNkulunkulu kwagcwaliseka njengoba kunjalo yini? Abezembali bayakuvuma ukuthi uKhurosi wanqoba sibili. Ibutho likaKhurosi lasebenzisa icebo elimangalisayo ngokuphambukisa amanzi kweminye yemifula yaseBhabhiloni, yasiwoma. Kanti njalo ibutho langena edolobheni ngamasango ayetshiywe evuliwe. Ngemva kwalokho uKhurosi wakhulula abakoJuda wasebavumela ukuthi bayekwakha kutsha ithempeli labo eJerusalema. Lokhu kwakumangalisa ngoba phela uKhurosi wayengamkhonzi uNkulunkulu wamaJuda. (U-Ezra 1:1-3) Ngaphandle kukaNkulunkulu, ngubani sibili owayengabika ngokuthi kuzakwenzakala isehlakalo esinjengalesi njalo senzakale njengoba etshilo?
Sesikhulume ngezehlakalo ezintathu ezitshengisa ukuthi okwakukhulunywe nguNkulunkulu kwagcwaliseka. Kodwa zinengi ezingaqanjwanga lapha. Umkhokheli wakoJuda uJoshuwa, wakhuluma iqiniso elalisaziwa lixuku elalimlalele wathi: “Liyazi ngezinhliziyo zenu lemiphefumulo ukuthi kasikho isithembiso lasinye esihle phakathi kwalezo elazinikwa nguJehova uNkulunkulu wenu esehlulekayo. Zonke izithembiso sezagcwaliswa; kasikho lesisodwa esehlulekayo.” (UJoshuwa 23:1, 2, 14) Abantu ababekhokhelwa nguJoshuwa babekwazi mhlophe ukuthi zonke izithembiso leziphrofetho zikaNkulunkulu ziyagcwaliseka. Kodwa uNkulunkulu uzigcwalisa njani? Ukwenza kukaNkulunkulu kutshiyene kakhulu lokwabantu. Kuqakatheke kakhulu ukwazi lokhu ngoba kunengi uNkulunkulu akutshoyo mayelana lekusasa eliseduze elizantshintsha impilo yakho.
IZIPHROFETHO ZIKANKULUNKULU KANYE LOKUKHULUNYWA NGABANTU
Okukhulunywa ngabantu kujayele ukusekelwa kulokho okuvela kubacubunguli bezesayensi, lasekuhlolisisweni kwezinto ezibhaliweyo kanye lezenzakalayo, kumbe kulokho okukhulunywa ngabantu abathi balemimoya ethile evela kuNkulunkulu. Nxa abantu sebekhulume ngesehlakalo esithile esizayo bajayele ukuhlala bamelele ukubona ukuthi kuzakwenzakala yini.—IZaga 27:1.
UNkulunkulu kafanani labantu ngoba yena ukwazi konke. Uyakwazi ukuthi badalwe njani, njalo uyazazi lezifiso zabo; yikho nxa ekhuluma ngekusasa ulamandla okubona okuzakwenziwa ngumuntu munye ngamunye kanye lokuzakwenziwa yizizwe. Kodwa uNkulunkulu angenza okunengi kakhulu. Angaqondisa njalo antshintshe izinto kanye lokwenzakalayo ukuze abe leqiniso ukuthi lokho akukhulumileyo kuyaphumelela. Uthi: ‘Linjalo lelizwi lami eliphuma emlonyeni wami: kaliyikubuya kimi lize, lizaphumelelisa lokho engilithume khona.’ (U-Isaya 55:11) Yikho-ke ezinye iziphrofetho zikaNkulunkulu ziyabe ziphathelane lalokho azasenzela khona kusasa. Konke akukhulumileyo kwenzakala njengoba kunjalo, kaphambanisi.
IKUSASA LAKHO
Ukhona yini ongakutshela iqiniso ngekusasa lakho kanye lelezihlobo zakho? Ake sithi uzwe ukuthi kulesiphepho esizayo, akuthandabuzwa ukuthi ubuzazama konke okusemandleni akho ukuze uphephe. Yikho okumele ukwenze nxa usizwa iziphrofetho eziseBhayibhilini. UNkulunkulu usitshela ngontshintsho olukhulu oluzakwenzakala masinyane nje emhlabeni wonke. (Khangela ibhokisi elithi “UNkulunkulu Usitshelani Ngekusasa?”) Ikusasa leli lehlukene kakhulu lalokho okukhulunywa zingcitshi ezinengi mayelana lekusasa.
Lokhu singakubeka kanje: Indaba yomhlaba lo ilesehlakalo esiyisiqokoqela. Isibhaliwe njalo singazihlolela isiphetho sayo. UNkulunkulu uthi: ‘Mina ngenza isiphetho sazakale kusukela ekuqaleni. Ngithi: Injongo yami izakuma kokuphela, njalo ngizakwenza konke engikufunayo.’ (U-Isaya 46:10) Wena kanye lamalunga emuli yakho lingaba lekusasa elihle kakhulu. Buza oFakazi bakaJehova mayelana lokuthi iBhayibhili lithini ngezehlakalo ezizayo. OFakazi abasizo zangoma, njalo abasebenzisi imimoya ethile ukuze bakutshele ngekusasa. Kodwa basebenzisa iBhayibhili njalo bangakutshengisa izinto ezinhle ezenziwa nguNkulunkulu ukuze ube lekusasa elihle.