ISIHLOKO ESISEKUQALISENI | UNKULUNKULU UTHINI NGOKUBHEMA?
Uhlupho Olusemhlabeni Wonke
Ukubhema sekubaqedile abantu.
Kwabulala abantu abangu-100 000 000 eminyakeni engu-100 eyadlulayo.
Khathesi kubulala abangaba ngu-6 000 000 umnyaka munye ngamunye.
Kukhanya angani kumizuzwana eyisithupha nje, kufa umuntu oyedwa ngenxa yokubhema.
Kanti njalo kukhanya lokhu akusoze kuntshintshe.
Kucatshangwa ukuthi abantu bangaqhubeka bebhema, inani lababulawa yikubhema umnyaka munye ngamunye lizakhwela lize ledlule i-8 000 000 ngo-2030. Kanti njalo kuthiwa kusiyaphela ikhulu lesi-21, abangu-1 000 000 000 bayabe sebesemathuneni ngenxa yokubhema.
Ukubhema igwayi akubulali abalibhemayo kuphela. Kufa abangu-600 000 umnyaka munye ngamunye ngenxa yokuhotsha intuthu yabantu ababhemayo. Kanti njalo kulamalunga emuli asala ekhathazekile futhi elohlupho lwemali. Okunye yikuthi kudala uhlupho ebantwini bonke ngoba kwenza imithelo yezokwelapha iqhubeke ikhwela.
Ukubhema akufanani lemikhuhlane ememethekayo eyenza ukuthi odokotela baphithizele bedinga izindlela zokuyelapha. Kuyelapheka sibili njalo umuthi wakho waziwa phose ngumuntu wonke. UDokotela okuthiwa nguMargaret Chan ongusibalukhulu wenhlanganiso yezempilakahle okuthiwa yi-World Health Organization, wathi: “Uhlupho lokubhema igwayi lubangelwa ngabantu njalo lungaqedwa nxa ohulumende labantu bonke nje bengasebenza nzima ukuze balwisane lalo.”
Kuyamangalisa ukuthi amazwe amanengi asebambene ukuze alwisane lohlupho lolu oluphambanisa impilakahle. Kusukela ngo-August 2012, amazwe angaba ngu-175 avumelana ukuthi kungcono enze okuthile ukuze kuqedwe ukubhema.a Kodwa kulokuthile okuhluphayo okwenza umkhuba wokubhema uqhubekele phambili. Umnyaka munye ngamunye izinkampani ezithengisa igwayi zisebenzisa amaqubaquba ezimali zizama ukuhuga labangabhemiyo ukuthi babheme, ikakhulu abesifazana labasakhulayo abasemazweni asathuthuka. Nxa kuyikuthi umuntu useqalisile ukubhema, kunzima ukuthi ayekele. Lokhu kwenza ukuthi inani labantu ababhemayo liqhubeke liphezulu. Lenani labazabulawa yikubhema lizaqansa kakhulu eminyakeni engu-40 elandelayo nxa belokhu bebhema igwayi.
Abantu abanengi bayehluleka ukuyekela ukubhema loba befisa ngenxa yokuthi akulula ukukuyekela njalo lamankampani athengisa igwayi aqhubeka ebahuga. Yikho kanye okwenzakala kumama okuthiwa nguNaoko. Waqalisa ukubhema esesemncane. Wayezibona engumuntu kuzwa ngoba wayelingisela akubona kusenziwa kunhlelo ezikhuthaza ukubhema. Wazibonela abazali bakhe bebulawa yimvukuzane yamaphaphu ngenxa yokubhema kodwa waqhubeka ebhema njalo kazange ayekele lanxa wayesesondla amadodakazi akhe amabili. Wathi, “Kwakungikhathaza ukuthi ngizaba lemvukuzane yamaphaphu lokuthi abantwabami bangacina begula kodwa kwakunzima ukuthi ngiyekele. Ngangicabanga ukuthi angisoze ngafa ngayekela ukubhema.”
Lanxa kunjalo uNaoko wacina engasabhemi ngoba wancedwa yilokho osekuncede izigidi zabantu ukuthi zingabhemi. Kuyini lokho? Sicela uqhubeke ubala uzazizwela.
a Lokhu kugoqela ukufundisa abantu ngezingozi zokubhema lokuvimbela amankampani athengisa igwayi ukuthi angaqhubeki ehuga abantu abanengi, lokuthi kukhwezwe imithelo yegwayi kanye lokwenza izinhlelo zokunceda asebebhema.