IMIBUZO YEBHAYIBHILI IYAPHENDULWA
Izingilosi zingasinceda yini?
Endulo izingilosi zanceda uDanyeli owayeyisikhonzi sikaNkulunkulu esithembekileyo, yikho lalamuhla zinceda abantu ukuthi bathole izindaba ezinhle
UJehova uNkulunkulu waqala ngokudala izigidi zezingilosi engakadali abantu. (UJobe 38:4, 7) Izingilosi yizidalwa zomoya ezilamandla ezenza umsebenzi kaNkulunkulu. Kwezinye izikhathi uzithuma ukuthi ziqondise abantu bakhe emhlabeni kanye lokuthi zibavikele. (IHubo 91:10, 11) Lamuhla izingilosi zinceda abantu ukuthi bathole izindaba ezinhle ezitshunyayelwa ngabalandeli bakaJesu.—Bala iSambulo 14:6, 7.
Kumele sicele usizo ezingilosini yini? Hatshi. Imithandazo yethu kumele iye kuNkulunkulu kuphela ngoba nguye yedwa esimkhonzayo. (ISambulo 19:10) Izingilosi yizinceku zikaNkulunkulu, yikho zenza lokho ezikutshelwa nguye kuphela hatshi ngabantu. Yikho-ke kumele sithandaze kuNkulunkulu kuphela ngebizo likaJesu.—Bala iHubo 103:20, 21; UMathewu 26:53.
Zikhona yini izingilosi ezimbi?
Izingilosi zadalwa zilenkululeko yokuzikhethela njalo zingazikhethela ukwenza okuhle loba okubi. Kuyadanisa ukuthi ezinengi zahlamuka kuNkulunkulu. (UJuda 6) Eyaqalisa ukwenza lokhu nguSathane, njalo ezinye zamanyana laye zasezibizwa ngokuthi ngamadimoni. USathane lamadimoni akhe bacina bexotshiwe ezulwini baphoselwa emhlabeni.—Bala iSambulo 12:7-9.
Kusukela ngo-1914 izinto ezimbi lobudlwangudlwangu kuqhubeke kusanda ngendlela emangalisayo. Lokhu kutshengisa ukuthi uNkulunkulu usezambhubhisa uSathane lamadimoni akhe, abesentshintsha umhlaba ube liPharadayisi.—Bala iSambulo 12:12; 21:3, 4.