Imibuzo YeBhayibhili Iyaphendulwa
Kuliqiniso yini ukuthi uJesu wavusa abafileyo?
UJesu wavusa uLazaro owayeselamalanga amane etshonile
IBhayibhili liyakucacisa ukuthi uJesu wavusa abantu abafileyo baphinda baphila. Izindaba lezi kazisizo nganekwane nje ngoba izindawo okuthiwa kwenzakala kuzo zazikhona sibili njalo kuyaziwa lokuthi zenzakala nini. Ngokwesibonelo ngentwasa, ngomnyaka ka-31 C.E., uJesu wayehamba lexuku labantu elikhulu esuka eKhaphenawume esiya eNayini. Bathi befika bahlangana lelinye futhi ixuku labantu. Yikho-ke okwenza sikukholwe sibili ukuthi uJesu wafika wavusa umuntu owayefile yikuthi kulotshiwe eLizwini likaNkulunkulu iBhayibhili, njalo kwakulabantu abanengi ababekhangele ngesikhathi lokhu kusenzakala.—Bala uLukha 7:11-15.
UJesu waphinda wavusa umngane wakhe uLazaro owayeselamalanga amane etshonile. Lawe ulakho ukukholwa ukuthi lokhu kwenzakala sibili ngoba banengi abazibonela ngawabo uJesu ekwenza.—Bala uJohane 11:39-45.
Kungani uJesu wavusa abantu abafileyo?
UJesu wavusa abafileyo ngoba wayelesihawu. Kanti njalo wayesenzela ukuthi kukhanye ukuthi uYise, onguye uMdali wabantu, wayemnike amandla okuvusa abafileyo.—Bala uJohane 5:21, 28, 29.
Izindaba ezimayelana lokuthi uJesu wavusa abafileyo zisenza sikholwe ukuthi uzazigcwalisa izithembiso zakhe. Uzavusa abantu abafileyo abanengi kakhulu kanye lababengalunganga, okutsho abantu abebangakwazi lutho ngoNkulunkulu weqiniso. Abantu laba bazaphiwa ithuba lokufunda ngoJehova uNkulunkulu lelokumthanda.—Bala imiSebenzi 24:15.