Ibizo likaNkulunkulu Uyalazi Njalo Uyalisebenzisa Yini?

Kambe ungathi umuntu ngumngane wakho omthandayo wena ungalazi ibizo lakhe? Lokhu akujayelekanga. Omunye umama ohlala eBulgaria okuthiwa ngu-Irina wakubona lokhu waze wathi: “Awungeke ube seduze loNkulunkulu nxa ungalazi ibizo lakhe.” Okuhle yikuthi isihloko esidlulileyo sihle satshengisa ukuthi uNkulunkulu ufuna usondele kuye. Yikho-ke uNkulunkulu usebenzisa iBhayibhili ukuze akutshele ukuthi yena ungubani. Uthi: “Mina nginguJehova, lelo yilo ibizo lami!”​—U-Isaya 42:8.

UJehova ulendaba yini lokuthi uyalazi ibizo lakhe kanye lokuthi uyalisebenzisa na? Akucabange ngalokhu: Ngesikhathi iBhayibhili liqalisa ukubhalwa, ibizo likaNkulunkulu lalitholakala okwezikhathi ezingaba ngu-7 000 libhalwe ngongwaqa abane besiHebheru abathiwa yiTetragrammaton. Akula elinye ibizo elitholakala kanengi kangaka eBhayibhilini. Lokhu kutshengisa ukuthi uJehova uyafuna sibili ukuthi silazi futhi silisebenzise ibizo lakhe.a

Abanye bangacabanga ukuthi kuyabe kuyikudelela ukusebenzisa ibizo likaNkulunkulu ngoba ungcwele njalo unguSomandla. Kuyinto embi sibili ukulisebenzisa kubi ibizo likaNkulunkulu njengoba lawe ungeke ukhulume kubi ngebizo lomngane wakho omthandayo. Lanxa kunjalo uJehova ufuna ukuthi bonke abamthandayo badumise ibizo lakhe njalo bancede labanye ukuthi balazi. (IHubo 69:30, 31; 96:2, 8) UJesu wafundisa abalandeli bakhe ukuthi bathandaze bathi: “Baba wethu osezulwini, malihlonitshwe ibizo lakho.” Yikho-ke singatshengisa ukuthi siyalihlonipha ibizo likaNkulunkulu ngokutshela abanye ngalo. Lokhu kuzakwenza ukuthi sisondele phansi kwakhe.​—UMathewu 6:9.

IBhayibhili lisitshengisa ukuthi uNkulunkulu uyabathanda abantu ‘abahlonipha ibizo lakhe.’ (UMalaki 3:16) Zwana ukuthi ubathembisani. Uthi: “Ngizamvikela, ngokuba uyalinaka ibizo lami. Uzangibiza, ngimphendule; ngizakuba laye ekuhluphekeni.” (IHubo 91:14, 15) Ukulazi ibizo likaJehova lokulisebenzisa kuqakatheke kakhulu nxa sifuna ukuhlala siseduze kwakhe.