Ukuqathanisa Okungakunceda Okwamagama

UNGUMKHRISTU yini? Uma kunjalo ungomunye wabantu abadlula 2 bhiliyoni abasemhlabeni abazithi bangamaKhristu, okutsho ukuthi umuntu oyedwa kwabathathu uthi ungumKhristu. Lamuhla kulamasonto amanengi kakhulu athi angawobuKhristu kodwa adabukene phakathi ngenxa yokufundisa izinto ezitshiyeneyo. Izimfundiso wena ozikholwayo ungathola ukuthi zitshiyene lezabanye abazithi ngamaKhristu. Kuqakathekile ukuhlola lokho okukholwayo nxa ufisa ukukhonza ngendlela eqondileyo efundiswa liBhayibhili.

Abalandeli bakaJesu Khristu bakuqala babebizwa ngokuthi “ngamaKhristu.” (ImiSebenzi 11:26) Kwakungadingakali elinye ibizo lokuwehlukanisa ngoba yiwo wodwa amaKhristu ayekhona. AmaKhristu ayemanyene njalo ayelandela imilayo kaJesu Khristu onguye owayengumqali wesiziba sobuKhristu. Kuthiwani ngesonto okuyo? Uyakukholwa yini ukuthi ifundisa lokho okwakufundiswa nguKhristu lokuthi yenza khona kanye okwakusenziwa ngabalandeli bakhe bakuqala? Kuyini okungenza ube leqiniso sibili? Indlela yinye kuphela, ukuhlolisisa iBhayibhili.

Cabanga ngalokhu: UJesu Khristu wayeyihlonipha kakhulu iMibhalo ngoba wayesazi ukuthi iyiLizwi likaNkulunkulu. Wabasola kakhulu labo ababeqakathekisa amasiko abo njalo bekhangelela phansi izimfundiso eziseBhayibhilini. (UMakho 7:9-13) Lokhu kusenza sibone ukuthi abalandeli bakaJesu beqiniso kumele bafundise okuvela eBhayibhilini. Yikho-ke kuhle ukuthi umKhristu ngamunye azibuze ukuthi, ‘Izimfundiso ezisesontweni yami ziyavumelana lalokho okuseBhayibhilini yini?’ Ukuze uphendule umbuzo lo xeganisa lokho okufundiswa liBhayibhili lalokho okufundiswa esontweni yakho.

UJesu wathi ukukhonza uNkulunkulu kumele kusekelwe eqinisweni njalo iqiniso lona silithola eBhayibhilini. (UJohane 4:24; 17:17) Umphostoli uPhawuli wathi ukuze abantu basindiswe kumele “balazi iqiniso.” (1 KuThimothi 2:4) Kuqakathekile ukuthi lokho esikukholwayo kuvele eBhayibhilini ngoba yikho okuzasenza sisindiswe.

QATHANISA IZIMFUNDISO ZAKHO LALOKHO OKUFUNDISWA LIBHAYIBHILI

Zama ukukhangela imibuzo le eyisithupha ubusuhlola lezimpendulo ezivela eBhayibhilini. Bala amavesi ubusucabangisisa ngezimpendulo zakhona. Ngemva kwalokho zibuze, ‘Engikufundiswa esontweni kuyahambelana yini lalokho okufundiswa liBhayibhili?’

Ukuxeganisa okunjalo kuzakunceda okwamagama. Uyafisa yini ukuqathanisa okunye okufundiswa liBhayibhili lalokho okufunda esontweni yakho? OFakazi bakaJehova bangakuncedisa ukuzwisisa iqiniso elicacileyo elitholakala eBhayibhilini. Cela omunye wabo ukuthi azofunda lawe iBhayibhili mahala loba ungene kuwebhusayithi yethu i-jw.org.

1 UMBUZO: Ungubani uNkulunkulu?

IMPENDULO: UJehova uBaba kaJesu, unguNkulunkulu waphakade loMdali wazo zonke izinto olamandla.

OKUFUNDISWA LIBHAYIBHILI:

• “Simbonga kokuphela uNkulunkulu, uYise weNkosi yethu uJesu Khristu, nxa silikhulekela.”—KwabaseKholose 1:3.

• “Ufanele, Nkosi yethu loNkulunkulu wethu, ukwamukela udumo lenhlonipho kanye lamandla, ngoba wena wadala izinto zonke.”—ISambulo 4:11.

• Khangela loRoma 10:13 kanye lo-1 Thimothi 1:17.

2 UMBUZO: Ungubani uJesu Khristu?

IMPENDULO: UJesu yiNdodana kaNkulunkulu eyizibulo. UJesu ulesiqalo ngoba yena wadalwa. UJesu uyazithoba kuNkulunkulu futhi uhlala ezimisele ukwenza intando yakhe.

OKUFUNDISWA LIBHAYIBHILI:

• “UBaba mkhulu kulami.”—UJohane 14:28.

• ‘[UJesu] uyisifanekiso sikaNkulunkulu ongabonakaliyo, izibulo kukho konke okwadalwayo.’—KwabaseKholose 1:15.

• Khangela loMathewu 26:39 kanye lo-1 KwabaseKhorinte 15:28.

3 UMBUZO: Uyini umoya ongcwele?

IMPENDULO: Umoya ongcwele ngamandla uNkulunkulu awasebenzisayo ukuze intando yakhe yenzeke. Kawusimuntu. Abantu bangaba lomoya ongcwele njalo ungabanika amandla.

OKUFUNDISWA LIBHAYIBHILI:

• “Kwathi u-Elizabethi esizwa ukubingelela kukaMariya, umntwana wanyakaza esiswini sakhe, u-Elizabethi wagcwaliswa ngomoya ongcwele.”—ULukha 1:41.

• “UNkulunkulu wamgcoba . . . uJesu waseNazaretha ngomoya ongcwele langamandla.”—ImiSebenzi 10:38.

• Khangela loGenesisi 1:2 kanye IemiSebenzi 2:1-4.

4 UMBUZO: Uyini uMbuso kaNkulunkulu?

IMPENDULO: UMbuso kaNkulunkulu unguhulumende osezulwini. UJesu nguye oyiNkosi yoMbuso lo. Sekuseduze ukuthi uMbuso wenze ukuthi intando kaNkulunkulu yenziwe emhlabeni wonke.

OKUFUNDISWA LIBHAYIBHILI:

• “Ingilosi yesikhombisa yakhalisa icilongo layo, kwasekusiba lamazwi amakhulu ezulwini, ayesithi: ‘Umbuso wasemhlabeni usube ngumbuso weNkosi yethu loKhristu wayo, njalo izabusa kuze kube nininini.’”—ISambulo 11:15.

• Khangela loDanyeli 2:44 kanye loMathewu 6:9, 10.

5 UMBUZO: Bonke abantu abalungileyo bazahamba ezulwini yini?

IMPENDULO: Hatshi. Iqembu elincane labantu abathembekileyo elibizwa ngokuthi ‘ngumhlambi omncane’ elikhethwe nguNkulunkulu yilo elizakuya ezulwini. Lizabusa abantu likanye loJesu.

OKUFUNDISWA LIBHAYIBHILI:

• “Lingesabi, mhlambi omncane, ngoba uYihlo uthandile ukulipha umbuso.”—ULukha 12:32.

• “Bazakuba ngabaphristi bakaNkulunkulu labakaKhristu njalo bazabusa laye.”—ISambulo 20:6.

• Khangela loSambulo 14:1, 3.

6 UMBUZO: Iyini injongo kaNkulunkulu ngomhlaba labantu?

IMPENDULO: Nxa uMbuso kaNkulunkulu usubusa, umhlaba uzakuba lipharadayisi, kuzakuba lokuthula, abalungileyo bazakuba lempilakahle njalo bazaphila phakade.

OKUFUNDISWA LIBHAYIBHILI:

• “Abathobekileyo bazakudla ilifa lelizwe bakholise ukuthula okukhulu.”—AmaHubo 37:10, 11.

• “Uzazesula zonke izinyembezi emehlweni abo. Akusayikuba khona futhi ukufa loba ukulila loba ukukhala loba ubuhlungu, ngoba umumo omdala wezinto usudlule.”—ISambulo 21:3, 4.

• Khangela loHubo 37:29 kanye lo-2 Phetro 3:13.