“Umsebenzi Mkhulu”

KWAKUYISIKHATHI sombuthano oqakathekileyo eJerusalema. Inkosi uDavida yayibize zonke izikhulu zesizwe, abalawuli bamaviyo kanye lawo wonke amaqhawe kulowomhlangano. Ngemva kwalokho yenza isaziso esathokozisa wonke umuntu owayelapho. Yabika ukuthi uJehova ulaye ukuba indodana yayo uSolomoni, yakhe isakhiwo esikhulu kakhulu esasizasetshenziswa ukukhonza uNkulunkulu weqiniso. Yabatshela lokuthi uJehova uyinike umdwebo walesosakhiwo njalo isiwunike uSolomoni. Ngemva kwalokho yathi: ‘Umsebenzi mkhulu, ngoba lesisakhiwo ayisiso esomuntu kodwa ngesikaJehova uNkulunkulu.’—1 ImiLan. 28:1, 2, 6, 11, 12; 29:1.

UDavida wabuza wathi: ‘Ngubanike ozanikela izipho ngenhliziyo eNkosini [uJehova] lamhla na?’ (1 ImiLan. 29:5, The Holy Bible in Ndebele) Wena wawuzakwenzani aluba wawukhona mhlalokho? Wawuzawusekela yini umsebenzi lo owawumkhulu kangaka? Abako-Israyeli kabazange baphozise amaseko, bahle bazinikela ukuncedisa. IBhayibhili lithi: “Baba lokujabula okukhulu . . . ngoba banikela kuJehova ngokukhululeka langezinhliziyo zabo zonke.”—1 ImiLan. 29:9.

Ngemva kweminyaka eminengi uJehova wenza uhlelo lokukhonza olukhulu kakhulu ukwedlula ithempeli elakhiwa nguSolomoni. Wasungula uhlelo lolu ngokunikela ngeNdodana yakhe ukuba ibe ngumhlatshelo ukuze senelise ukumkhonza. (Heb. 9:11, 12) Lamuhla uJehova uncedisa abantu ukuthi babuyisane laye esebenzisa umsebenzi wokutshumayela owenziwayo. (Mat. 28:19, 20) Umsebenzi lo ube lempumela emihle kakhulu; umnyaka ngamunye kufundwa iBhayibhili lezigidi zabantu, izinkulungwane ziyabhaphathizwa futhi kubunjwa amabandla amatsha amanengi.

Ukukhula komsebenzi lo kwenze lokuthi kudindwe amabhuku amanengi asekelwe eBhayibhilini, kwakhiwe njalo kulungisiswe amaWolu oMbuso kanye lezindawo zokungena imihlangano yezabelo leyeziqinti. Akuthandabuzwa ukuthi lawe uyakuvuma ukuthi umsebenzi lo wokumemezela izindaba ezinhle mkhulu futhi uyabanceda abantu.—Mat. 24:14.

Ukuthanda uNkulunkulu labomakhelwana bethu kanye lokukhumbula ukuthi umsebenzi wokutshumayela ngoMbuso uqakathekile kumele kusenze ‘sinikele ngenhliziyo’ yonke kuJehova. Phela kuyasithokozisa ‘ukudumisa uJehova ngemfuyo yethu’ kanye lokubona ukuthi iminikelo le isetshenziswa ngokuhlakanipha ukuze kuthuthukiswe umsebenzi omkhulu owenziwa emhlabeni wonke.—Zaga. 3:9.

Izindlela Abanye Abanikela Ngazo Ukuze Basekele Umsebenzi Womhlaba Wonke

Abanengi kulezinsuku ‘babeka eceleni imali ethile’ ukuze babe lemali abangayifaka ebhokisini eliseWolu elibhalwe ukuthi, “Umsebenzi Womhlaba Wonke.” (1 Khor. 16:2) Inyanga ngayinye amabandla athumela imali le ewofisini yaboFakazi bakaJehova eselizweni labo. Kanti njalo ungenelisa ukuthumela iminikelo yakho usebenzisa inhlanganiso esemthethweni esetshenziswa ngoFakazi bakaJehova elizweni lakini. Ukuze uthole ibizo eliqondileyo lenhlanganiso esemthethweni elizweni lakini, vula kuwebhusayithi yethu i-www.jw.org kumbe ufonele egatsheni. Nansi iminikelo ongayithumela ngokuqondileyo egatsheni:

IMINIKELO

Ingenziwa ngokufaka imali ebhanga, ngokusebenzisa amakhadi ebhanga kumbe ukuthumeza ngefoni. Kwamanye amagatsha lokhu ungakwenza usebenzisa i-jw.org kumbe usebenzise enye iwebhusayithi ekhethwe yihlanganiso.
Unganikela ngemali, impahla eligugu (jewelry) kumbe enye nje impahla. Ungabhala lencwadi etshoyo ukuthi leyomali kumbe impahla yisipho osinika inhlanganiso.

UMNIKELO OLESIVUMELWANO ESITHILE

Unganikela ngemali ongenelisa ukuthi uyithathe nxa ungabe usufuna ukuyisebenzisa.
Kumele kube lencwadi echaza ukuthi kulesivumelwano osenze lenhlanganiso.

EZINYE IZINDLELA ZOKUNIKELA

Ngaphandle kokunikela ngemali loba impahla, zikhona ezinye izindlela onganikela ngazo ukuze uphathise emsebenzini woMbuso owenziwa emhlabeni wonke. Lanxa ingaba khona indlela yokunikela ongathanda ukuyisebenzisa, kungaba kuhle ukuthi uthintane lewofisi yegatsha ukuze uzwe ukuthi yiziphi izindlela ezikhona elizweni lakini. Phela imithetho kanye lalokho okudingwa ngabezemithelo kuyatshiyana ilizwe ngalinye. Ngakho kuqakathekile ukuthi ubuzisise kwababona ngemithelo kanye labalolwazi ngemithetho ukuze bakuncede ukuthi ukhethe indlela eqondileyo. Nanzi ezinye izindlela ongazisebenzisa.

I-Insurance: Yindlela yokunikela ngokubhalisa ukuthi inhlanganiso ibe yindlalifa emalini yakho kungaba yipentsheni loba ezinye izimali owazongayo.

Ukusebenzisa i-akhawunti yebhanga: Yikunikela ngokunika inhlanganiso i-akhawunti yakho loba izincwadi zakho zebhanga loba ngokubhala ukuthi inhlanganiso iphiwe leyomali oyigcine ebhanga nxa wena usufile.

Ama-Shares lama-Bonds: Yikunikela ngama-shares lama-bonds ongabe ulawo kumbe ukubhalisa ukuthi inhlanganiso iphiwe lezozinto nxa wena usufile.

Izakhiwo loba Umhlabathi: Ukunikela ngezinto ezingathengiseka kungaba yizindlu, izitanda loba amapulazi. Nxa kuyindawo ohlala kuyo ungatsho ukuthi uzaqhubeka uhlala kuyo kodwa nxa ungafa ungathanda ukuthi ithathwe yinhlanganiso.

I-Gift Annuity: Yikunikela ngokupha inhlanganiso inzuzo oyabe uyithola ezindaweni owahlanyela kuzo imali yakho (investments). Ubususenza isivumelwano lenhlanganiso ukuthi iyabe ikunika ingxenye ethile kuleyomali futhi ulakho ukwehliselwa umthelo owubhadalayo nxa wenze lokhu.

Amawili lama-Trust: Ungabhala iwili etshoyo ukuthi impahla loba imali yakho ufuna ithathwe yinhlanganiso. Kumele kube yisivumelwano esisemthethweni. Indlela le yokunikela layo ingenza ukuthi wehliselwe imithelo oyibhadalayo.

Umuntu ofisa ukusebenzisa izindlela lezi kumele ahlale phansi ahlele ukuthi ufuna ukunikela njani. Kwenziwe ibhukwana elithi Charitable Planning to Benefit Kingdom Service Worldwide ukuze lisize labo abafuna ukunikela ngezindlela lezi. Ibhukwana leli litholakala ngesiNgisi langeSpanish futhi limumethe ulwazi olunengi mayelana lezindlela umuntu anganikela ngazo esaphila loba njengelifa. Mhlawumbe imilayezo esebhukwaneni leli ayisebenzi esimeni sakho ngenxa yemithetho yemithelo kumbe eminye imithetho eselizweni lakini. Ngokusebenzisa izindlela lezi zokunikela abanengi basekela imisebenzi eyenziwa enhlanganisweni yethu emhlabeni wonke egoqela ukunceda abanye abazalwane abaphakathi kobunzima obutshiyeneyo. Ibhukwana leli ungenelisa ukulicela kumabhalane webandla okulo nxa likhona elizweni lakini.

Ukuze uzwe okunengi ngodaba lolu hlaba lapho okubhalwe khona ukuthi “Nikela Ukuze Usekele Umsebenzi Wethu Owenziwa Emhlabeni Wonke” ekucineni kwepheji yokuqala kuwebhusayithi yethu kumbe uthintane lewofisi yaboFakazi bakaJehova.