Ungenzani Ukuze Uncedakale Njalo Ukholise Nxa Ubala IBhayibhili?

UJoshuwa ubala uMthetho; imiduli yeJerikho iyadilika kodwa indlu kaRahabi isala imi; uJoshuwa uyathandaza ephakamise izandla

UJOSHUWA wayenikwe umthwalo onzima kakhulu. Kwakumele akhokhele abako-Israyeli ayebangenisa elizweni ababelithenjisiwe kodwa umsebenzi lo wawungelula. Yikho uJehova wamqinisekisa njalo wamkhuthaza esithi: ‘Qina ube lesibindi. Incwadi yomthetho kayingasuki emlonyeni wakho; Yibale emini lebusuku ukuze unanzelele ukuthi wenza konke okulotshwe kuyo. Ngakho uzaphumelela.’—Josh. 1:7, 8.

Lathi zinengi inhlupho esihlangana lazo ngoba siphila ‘ezikhathini ezinzima.’ (2 Tim. 3:1) Yikho okungasisiza ukuthi siphumelele yikulandela iseluleko uJehova asinika uJoshuwa. Kufanele silibale zikhathi zonke iBhayibhili njalo sisebenzise izimiso ezitholakala kulo nxa sihlangana lenhlupho.

Lanxa kunjalo abanengi bethu kabakuthandi kangako ukubala. Kodwa ukubala iBhayibhili yikho kuphela okungasenza siphumelele. Ngakho hlola ibhokisi elithi, “Amacebo Angakusiza” ukuze uthole imicijo ezakwenza ukholise njalo uncedakale nxa ubala iBhayibhili.

Umhubi wahlabela wathi: “Ngiqondisa endleleni yemilayo yakho, ngokuba khonapho ngifumana ukuthokoza.” (Hubo. 119:35) Ukubala iLizwi likaNkulunkulu kungakwenza uthole intokozo. Ngakho gebha ujule kulo ukuze uthole amagugu angakunceda.

Lanxa ungaphiwanga umsebenzi wokukhokhela isizwe njengoJoshuwa, ukubala iBhayibhili kuzakusiza ukuthi ulwisane lezakho inhlupho. Yikho lawe lingisela uJoshuwa ngokubala konke okulotshiweyo ukuze uncedakale. Ungenza njalo uzathola inhlakanipho njalo uphumelele.

AMACEBO ANGAKUSIZA

Thandaza ungakaqalisi ukutaditsha. IBhayibhili limumethe imicabango kaNkulunkulu uSomandla eyalotshelwa ukunceda wena. Ngakho nxa ubala iBhayibhili mcele uJehova akuncedise ukuthi ulizwisise, ukhumbule okubalileyo njalo wenelise ukukusebenzisa empilweni yakho.—Ezra. 7:10.
Zibuze imibuzo nxa ubala iBhayibhili loba amabhuku esiwanikwa yinhlanganiso. Ngokwesibonelo ungazibuza ukuthi, “Indaba le ingifundisani ngoJehova? Amavesi la engisanda kuwabala ahambelana njani lalokho iBhayibhili elikhuluma ngakho? Ngingawasebenzisa njani ukuze ngisize abanye?
Cabangisisa ngalokho okubalayo. Nxa ungabala indaba ethile mana kancane, ucabangisise. Indaba le iqubula mizwa bani enhliziyweni yami? Kungani ngifikelwa yimizwa enjalo? Ingenelana njani lokwake kwenzakala empilweni yami, lalokho engiphakathi kwakho khathesi loba okungangehlela kusasa? Ngingazisebenzisa njani izimiso loba izeluleko ezitholakala endabeni engiyibalayo? (Jobe. 23:5; Hubo. 49:3) Zibuze imibuzo le: “Ngiyenelisa yini ukuchazela abanye ukuthi kungani uJehova esithi sibalekele imikhuba ethile? Yiphi impumela eba khona nxa umuntu angakhetha ukulandela indlela ethile?—Dute. 32:28, 29.
Kubone ngelihlo lengqondo okubalayo ikakhulu nxa indaba yakhona ichaza isehlakalo esithile. Ake sithi ubala indaba yokuthengiswa kukaJosefa. Zama ukugijimisa ingqondo yakho ubabone abafowabo sebemthengisa kuma-Ishmayeli. (Gen. 37:18-28) Uyakubona yini okwenzakalayo, uyakuzwa yini abakukhulumayo njalo kuzwakala phunga bani endaweni yakhona? Lawe zibone usungomunye wabalingiswa abasendabeni. Bacabangani futhi bathini? Ukunakana ngalindlela nxa utaditsha kuzakwenza ukholise njalo uncedakale.
Sebenzisa amathuluzi okuchwayisisa. Inhlanganiso kaJehova isinika amathuluzi alohlonzi asisiza ukuthi sichwayisise. Amanye akhona angamabhuku ikanti amanye atholakala kuwebhusayithi yethu ngezindimi ezinengi. Nxa ungakwazi ukuwasebenzisa cela abanye bakutshengise ukuthi asetshenziswa njani. Ngokwesibonelo i-Watch Tower Publications Index kanye le-Bhuku Lokuchwayisisa LaboFakazi BakaJehova kuyasisiza ukuthi sithole izihloko ezikhuluma ngezindaba ezitshiyeneyo kanye lendlela amavesi achasiswa ngayo. Okunye ongakusebenzisa yizengezo ezisekucineni kwe-New World Translation of the Holy Scriptures nxa zitholakala ngolimi oluzwisisayo. Izengezo lezi zingakunceda ukuthi uzwisise okunengi ngendawo obala ngayo, imbali, izisindo, izilinganiso lokunye okunjalo.
Finqa imicijo eqakathekileyo nxa usuqedile ukubala. Lokhu kuzakunceda ukuthi uhlale uyikhumbula. Okunye ongakwenza yikuxoxela abanye lokho okufundileyo. Kukhona yini ongakusebenzisa ekutshumayeleni? Nxa ungenza njalo izinto ozibalayo zizangena zijule engqondweni yakho futhi uzakwenelisa ukuzisebenzisa ukuze usize abanye.