Hlala Uqotho!

1. OFakazi abathathu abaqanjwe endimeni batshengise njani ukuthi bazimisele ukuhlala beqotho kuJehova?

AKUCABANGE ngezimo ezilandelayo ezingehlela oFakazi bakaJehova. (1) Enye intombazana ithi iseklasini labanye abantwana izwe umbalisi esithi kuzamele bananze umkhosi othile ophathelane lenkolo loba ezombusazwe. Intombazana le iyakwazi ukuthi umkhosi lo kawumthokozisi uJehova, yikho iyabachasisela ngenhlonipho ukuthi yona ngeke ikwenze lokho. (2) Omunye ujaha olenhloni uyatshumayela endlini ngendlu abasenanzelela ukuthi endlini elandelayo yikho okuhlala khona umfana afunda laye owake wachothoza oFakazi bakaJehova. Loba kunjalo uqonda khona afike aqoqode emnyango. (3) Enye indoda esebenza nzima ukuze inakekele imuli yayo itshelwa ngumqhatshi wayo ukuthi yenze okuthile okungekho emthethweni. Lanxa ikwazi ukuthi ingaphelelwa ngumsebenzi, itshela umqhatshi wayo ukuthi kumele ithembeke njalo ilalele umthetho kahulumende ngoba lokho yikho uNkulunkulu akukhangelele ezincekwini zakhe.​—Rom. 13:1-4; Heb. 13:18.

2. Yiphi imibuzo esizaxoxa ngayo njalo kungani kumele sixoxe ngayo?

² Kuyini okunanzeleleyo kuboFakazi laba abathathu? Mhlawumbe okunye yikuthi balesibindi futhi bathembekile. Kodwa okuqakatheke kakhulu yikuthi batshengise ukuba qotho kuJehova. Lokhu yikho okubasize ukuthi bangavumi ukwephula umthetho kaNkulunkulu. Kumele ukuthi uJehova uyaziqhenya ngalokho abakwenzileyo. Lathi siyafuna ukuthi uBaba wethu osezulwini azigqaje ngathi. Ngakho kasixoxeni ngemibuzo le emithathu: Kutshoni ukuba qotho? Kungani kumele sibe qotho? Singenzani ukuze sizimisele ukuhlala siqotho kulezinsuku ezinzima?

KUTSHONI UKUBA QOTHO?

3. (a) Kutshoni ukuba qotho? (b) Yiziphi izibonelo ezingasinceda sizwisise ukuthi ukuba qotho kutshoni?

³ Kutshoni ukuba qotho? Ukuba qotho kutsho ukuthanda uJehova ngenhliziyo yonke lokuzinikela kuye ngokupheleleyo kanye lokwenza izinto ezimthokozisayo ngaso sonke isikhathi. Ake sihlole okunye okungasinceda ukuthi sizwisise indlela ibala leli elisetshenziswe ngayo eBhayibhilini. Ibala lesiHebheru elihunyutshwe ngokuthi “qotho” litsho into epheleleyo, engelasici futhi engasolekiyo. Ngokwesibonelo abako-Israyeli babenikela ngezinyamazana nxa besenza imihlatshelo kuJehova njalo uMthetho wawusithi izinyamazana lezo zingabi lesici.b (Levi. 22:21, 22) Kwakungamelanga banikele ngezinyamazana eziyiziphofu, ezilimeleyo, eziyizilima loba ezigulayo. UJehova wayefuna banikele ngezifuyo eziphilileyo futhi ezingelasici. (Mal. 1:6-9) Lokhu kusinceda sizwisise ukuthi uJehova uyakuqakathekisa ukuzinikela okupheleleyo futhi okungelasici. Phela kakho phakathi kwethu ongathenga isithelo esibolileyo, ibhuku elingela amanye amakhasi kumbe ithuluzi elilokunye okusilelayo. UJehova laye ufuna simthande njalo sibe qotho kuye ngendlela epheleleyo, engelasici lengasolekiyo.

4. (a) Kungani sisithi abantu abalesono bengenelisa ukuba qotho? (b) Ngokwalokho okutshiwo kuHubo 103:12-14, kuyini uJehova akukhangeleleyo kithi?

⁴ Manje singenelisa yini ukuba qotho thina silesono futhi sihlala sisenza amaphutha? Ye, singenelisa. Nanzi izizatho ezimbili ezenza sitsho njalo. Esokuqala, uJehova kahlali ekhangela amaphutha esiwenzayo. ILizwi lakhe lithi: “Aluba wena, O Jehova, ububhala phansi zonke izono, ngubani ongema na?” (Hubo. 130:3) UJehova uyakwazi ukuthi silesono njalo uyasithethelela nxa sisenza amaphutha. (Hubo. 86:5) Okwesibili, uyakwazi ukuthi kungakanani esenelisa ukukwenza futhi kakhangelelanga ukuthi senze okuphezu kwamandla ethu. (Bala iHubo 103:12-14.) Pho singenzani ukuze singabi lesici futhi singasoleki emehlweni akhe?

5. Kuyini okungasinceda ukuthi sibe qotho?

⁵ Ukuthanda uJehova yikho okungasinceda ukuthi sibe qotho. Kumele simthande ngenhliziyo yonke uBaba wethu osezulwini njalo sizinikele kuye ngokupheleleyo. Indlela esimthanda ngayo kufanele ihlale ingelasici futhi ingasoleki kungelani lokuthi sihlangana lezilingo bani. Nxa simthanda ngendlela enjalo siyabe siqotho. (1 ImiLan. 28:9; Mat. 22:37) Ake sibuyele kuboFakazi abathathu esikhulume ngabo ekuqaliseni. Kayisikho ukuthi intombazana leyo yayingafuni ukukholisa labanye esikolo kumbe ukuthi ijaha lelo lalifuna ukuyangiswa loba ukuthi indoda leyo yayingasawufuni umsebenzi. Pho kuyini okwabafuqa ukuthi benze lokho abakwenzayo? Babekwazi ukuthi imithetho kaJehova ilungile futhi babezimisele ukumthokozisa. Kanti njalo babemthanda yikho baqala bacabanga ngalokho akufunayo bengakenzi izinqumo. Lokhu kwatshengisa ukuthi baqotho.

KUNGANI KUMELE SIBE QOTHO?

6. (a) Kungani kumele sibe qotho? (b) Kuyini okwenza u-Adamu lo-Eva behluleka ukutshengisa ubuqotho?

⁶ Kungani kuqakathekile ukuthi sibe qotho? Kumele sibe qotho ngoba uSathane wasola uJehova njalo wathi akulamuntu ongahlala ethembekile. Ingilosi le eyahlamukayo yaqamba amanga esivandeni sase-Edeni futhi ngokwenza njalo yaba nguSathane loba “uMphikisi.” Yakhuluma kubi ngebizo likaJehova yenza kwakhanya angathi unguMbusi omubi, ongathembekanga futhi ongelandaba labanye. Okudanisayo yikuthi u-Adamu lo-Eva balalela uSathane bahlamukela uJehova. (Gen. 3:1-6) Zinengi izinto uJehova ayebenzele zona esivandeni sase-Edeni ezazingabanceda ukuthi bamthande kakhulu. Kodwa ngesikhathi uSathane ebalinga babengamthandi ngenhliziyo yonke uJehova. Lokhu kwenza kwaba lombuzo othi: Kungenzakala yini ukuthi abantu bahlale bethembekile kuJehova uNkulunkulu ngenxa yokuthi bayamthanda? Ngamanye amazwi, abantu bangenelisa yini ukuba qotho kuNkulunkulu? Ake sihlole indaba kaJobe sizwe.

7. Amazwi akuJobe 1:8-11 atshengisa ukuthi uJehova wayembona engumuntu onjani uJobe? USathane yena-ke?

⁷ UJobe waphila ngesikhathi ama-Israyeli eseGibhithe. Ngalesosikhathi akulamuntu owayeqotho njengaye. Laye wayelesono njengathi futhi ewenza amaphutha. Kodwa uJehova wayemthanda ngoba wayeyindoda eqotho. Kungenzakala ukuthi uSathane wayeseke weyisa uJehova esithi akulamuntu oqotho. Yikho uJehova watshela uSathane ngoJobe. Indlela uJobe ayephila ngayo yayiveza egcekeni ukuthi uSathane ungusomangase. Kodwa uSathane wathi uJobe kalingwe ukuze kukhanye ukuthi uqotho yini. UJehova wayemthemba umngane wakhe uJobe yikho wavumela uSathane ukuthi amlinge.​—Bala uJobe 1:8-11.

8. USathane wamenzani uJobe?

⁸ USathane ulesihluku futhi ungumbulali. Watshabalalisa inotho kaJobe wamtshiya engumyanga, wabulala izisebenzi zakhe njalo wenza ukuthi asale engaselasithunzi emphakathini. Ngemva kwalokho wahlasela imuli yakhe wabulala abantwabakhe abalitshumi. Waphinda watshaya umzimba wakhe ngamathumba abuhlungu. Umkakhe wadabuka kakhulu ngalokhu okwakusenzakala waze wamtshela ukuthi aqalekise uNkulunkulu azifele. UJobe laye wayesebona kungcono ukuthi afe. Lanxa kunjalo wayelokhu ezimisele ukuba qotho. USathane wathi ekubona lokhu wamhlasela ngenye indlela. Wasebenzisa amadoda amathathu ayengabangane bakaJobe. Amadoda la avakatshela uJobe okwensuku ezithile kodwa kawazange amduduze, ayelokhu emtshela amazwi ahlabayo futhi emsola. Amtshela ukuthi uNkulunkulu nguye owayemehlisela inhlupho kanye lokuthi wayengelandaba lobuqotho bakhe. Aphinda amenza umuntu omubi, esithi izono zakhe yizo ezibangela ukuthi ajeziswe.​—Jobe. 1:13-22; 2:7-11; 15:4, 5; 22:3-6; 25:4-6.

9. Lanxa uJobe wayesebunzimeni kuyini angazange avume ukukwenza?

⁹ UJobe wenzani esephakathi kobunzima bonke lobu? Phela laye wayengumuntu olesono. Watshingela amadoda lawo ayemchothoza njalo wakhuluma izinto acina esezisola ngazo. Kanti njalo wakhuluma kakhulu ngokulunga kwakhe ukwedlula okukaNkulunkulu. (Jobe. 6:3; 13:4, 5; 32:2; 34:5) Lanxa kunjalo kazange avume ukuthi ubunzima ayephakathi kwabo bumenze ahlamukele uJehova uNkulunkulu. Kazange awakholwe amanga ayekhulunywa ngabangane bakhe. Wabatshela wathi: “Kangisoze ngivume ukuthi lina lilungile ngelikutshoyo; ngizaze ngiyokufa ngingabulandulanga ubuqotho bami.” (Jobe. 27:5) Amazwi la atshengisa ukuthi uJobe wayezimisele ukuhlala eqotho kumnyama kubomvu. Lathi kasimlingiseleni.

10. USathane usisola njani ngendlela asola ngayo uJobe?

¹⁰ Lamuhla uSathane uyasisola ngendlela asola ngayo uJobe. Akutshoyo yikuthi kasimthandi uJehova lokuthi nxa izinto sezinzima sizamtshiya. (Jobe. 2:4, 5; Isam. 12:10) Kumele ukuthi lokhu uSathane akutshoyo kukuzwisa ubuhlungu kakhulu. Kodwa ungakhathazeki, uJehova uyavumela uSathane ukuthi akulinge ngoba uyakuthemba. Uyakwazi ukuthi uzahlala uqotho kuye njalo ukuthembisa ukuthi uzakusiza ukuze uphumelele. (Heb. 13:6) Yikho ekunika ithuba lokuthi utshengise ukuthi uSathane ungusomangase. Kuyisibusiso sibili ukuthenjwa nguMbusi wendawo yonke. Kuyakhanya-ke ukuthi ukuba qotho kuqakatheke kakhulu ngoba kuyasinceda ukuthi singcwelise ibizo likaNkulunkulu, sisekele ubukhosi bakhe futhi sitshengise ukuthi uSathane ulamanga. Manje kuyini okungasisiza ukuthi sihlale siqotho?

SINGENZANI UKUZE SIHLALE SIQOTHO?

11. Kuyini esizaxoxa ngakho khathesi?

¹¹ USathane ubathwalele ubhulo abantu bakaNkulunkulu ‘kulezinsuku zokucina.’ (2 Tim. 3:1) Pho kuyini okungasinceda ukuthi sihlale siqotho njengoba siphila ezikhathini ezinzima kangaka? Ake sibuyele endabeni kaJobe sibone ezinye izifundo esingazithola kulokho akwenzayo. Ngesikhathi uJobe elingwa nguSathane, wayesekutshengise kanengi ukuthi uqotho kuNkulunkulu. Asixoxeni ngezinto ezintathu azenzayo ezingasinceda ukuthi sihlale siqotho.

12. (a) Ngokwalokho okutshiwo kuJobe 26:7, 8, 14, kuyini okwenza uJobe wamangaliswa yimisebenzi kaJehova njalo wamhlonipha kakhulu? (b) Singamlingisela njani uJobe?

¹² UJobe wamthanda kakhulu uJehova ngoba wayemangaliswa yimisebenzi yakhe. Wayesiba lesikhathi sokucabangisisa ngobuhle bendalo kaJehova. (Bala uJobe 26:7, 8, 14.) Wayesala ebambe owangaphansi nxa ecabangisisa ngomhlaba, isibhakabhaka, amayezi kanye lomdumo wezulu futhi wananzelela ukuthi kulutshwana kakhulu akwaziyo ngezinto ezidaliweyo. Kanti njalo wayewaqakathekisa amazwi kaNkulunkulu. Wathi: “Ngiwenze igugu amazwi omlomo wakhe.” (Jobe. 23:12) UJobe wamangaliswa yimisebenzi kaJehova njalo wamhlonipha kakhulu. Wayemthanda uYise futhi efuna ukwenza izinto ezimthokozisayo. Lokhu kwamsiza ukuthi azimisele ukuhlala eqotho. Lathi kufanele simlingisele uJobe. Khathesi kunengi kakhulu esikwaziyo ngendalo kaJehova ukwedlula abantu abaphila ngesikhathi sikaJobe. Kanti njalo sileBhayibhili elisinceda simazi kuhle uJehova. Esikufunda endalweni kaJehova laseLizwini lakhe kwenza sibone ukuthi unguNkulunkulu omangalisayo. Ukubuka imisebenzi yakhe emangalisayo lokumhlonipha kuyasinceda ukuthi simthande, simlalele njalo kwenza sibe lesifiso esikhulu sokuhlala siqotho kuye.​—Jobe. 28:28.

13-14. (a) KuJobe 31:1, uJobe watshengisa njani ukuthi uyalalela? (b) Singamlingisela njani uJobe?

¹³ Ukulalela kwamsiza ukuthi azimisele ukuhlala eqotho. Ukulalela kuyasisiza ukuthi sizimisele ukuhlala siqotho. UJobe wayekwazi lokhu yikho wazimisela ukulalela uNkulunkulu kukho konke ayekwenza. Ngokwesibonelo, wayenanzelela ukuthi kazidlisi satshanyana kwabesifazana. (Bala uJobe 31:1.) Wayekwazi ukuthi akuqondanga ukuthi ahawukele abanye omama yena etshadile. Lamuhla siphila emhlabeni ogcwele izinto ezingasihuga ukuthi sicine siziphatha kubi kwezemacansini. Yikho nxa utshadile mlingisele uJobe ngokuzimisela ukuthi ungahawukeli umuntu ongatshadanga laye. Kanti njalo akumelanga sizilibazise ngemifanekiso evusa inkanuko zemacansini loba iphonografi. (Mat. 5:28) Ukuzithiba okunjalo kuzasinceda ukuthi sihlale siqotho kukho konke esikwenzayo.

¹⁴ UJobe watshengisa ukuthi uyamlalela uJehova lasendabeni yokuthanda inotho. Wabona ukuthi nxa wayengabeka ithemba lakhe enothweni ayelayo, wayezabe esenza isono esingabangela ukuthi ajeziswe. (Jobe. 31:24, 25, 28) Lathi siphila emhlabeni ogcwele abantu abathanda imali. Yikho nxa silalela lokho iBhayibhili elikutshoyo ngemali kanye lenotho siyabe sitshengisa ukuthi sizimisele ukuhlala siqotho.​—Zaga. 30:8, 9; Mat. 6:19-21.

15. (a) UJobe wayelethemba lani? (b) Ukuhlala sicabanga ngethemba esilalo kusinceda ngani?

¹⁵ UJobe waqhubeka elethemba lokuthi uNkulunkulu uzambusisa. Wayekholwa ukuthi uNkulunkulu uyabona ukuthi uqotho. (Jobe. 31:6) Lanxa wahlangana lobunzima waqhubeka elethemba lokuthi uJehova wayezacina embusisile. Ukuba lethemba kwamnceda ukuthi azimisele ukuhlala eqotho. UJehova wathokoza ngalokho uJobe akwenzayo njalo wambusisa kakhulu. (Jobe. 42:12-17; Jak. 5:11) Lasemhlabeni omutsha uzathola ezinye izibusiso. Wena uyakholwa yini ukuthi uJehova uzakubusisa nxa ungahlala uqotho kuye? Phela uNkulunkulu wethu kantshintshi. (Mal. 3:6) Nxa singahlala sikhumbula ukuthi uJehova uyabanika umvuzo abantu abathembekileyo sizazimisela ukuhlala siqotho kuye futhi kasisoze sithandabuze ukuthi sizakuba lekusasa elihle.​—1 Thes. 5:8, 9.

16. Kuyini ozimisele ukukwenza?

¹⁶ Zimisele ukuhlala uqotho kuJehova. Kwezinye izikhathi ungadana nxa ubona abanye abantu bengasakuqakathekisi ukuba qotho kuJehova. Kodwa kumele ukhumbule ukuthi awuwedwa ngoba banengi abantu bakaJehova emhlabeni wonke abazimisele ukuhlala beqotho. Kanti njalo uzabalwa phakathi kwamadoda labesifazana basendulo ababethembekile futhi abaqhubeka beqotho lanxa babekhangelane lokufa. (Heb. 11:36-38; 12:1) Sonke kasizimiseleni ukuhlala siqotho njengoJobe owathi: “Ngizaze ngiyokufa ngingabulandulanga ubuqotho bami.” Kasihlaleni siqotho ukuze uJehova adunyiswe kuze kube nini lanini!