Bafowethu Abasakhulayo, Libeke Izinhliziyo Zenu Emsebenzini Othile Yini?
1. Umfowethu osakhulayo angaqalisa nini ukusebenzisa isiqondiso esiku-1 KuThimothi 3:1?
1 “Uma umuntu ebeke inhliziyo yakhe . . . , ufisa umsebenzi olesithunzi.” (1 Tim. 3:1) Amazwi la aphefumulelweyo akhuthaza abafowethu ukuthi babeke izinhliziyo zabo ekutholeni izibusiso zenkonzo ebandleni. Kufanele ube mdala yini ukuze ukwenze lokhu? Iqiniso yikuthi kuhle kakhulu ukuqalisa usakhula. Ngokwenza lokhu uyabe uzuza ukuqeqetshwa futhi utshengisa ukufanela kwakho ukuthi ubekwe ukuba yinceku ekhonzayo nxa usukhulile. (1 Tim. 3:10) Nxa ungumfowethu osakhulayo obhaphathiziweyo, ungabeka njani inhliziyo yakho emsebenzini othile?
2. Ungazama ngaziphi izindlela ukuthi ube ngumuntu ozinikelayo njalo ungakutshengisa njani lokhu?
2 Ukuzinikela: Khumbula ukuthi ubeke inhliziyo yakho emsebenzini olesithunzi, hatshi esikhundleni. Ngakho-ke, zama ukuba lesifiso sokunceda abafowenu labodadewenu. Enye indlela yokwenza lokhu ngeyokucabangisisa ngesibonelo sikaJesu esihle. (Mat. 20:28; Joha. 4:6, 7; 13:4, 5) Cela ukuthi uJehova akuncedise ukuthi ube lendaba labanye. (1 Kor. 10:24) Unganceda yini asebekhulile labagulayo abasebandleni ngokubenzela okuthile? Uyazinikela yini ukuthi ucente, uhlanze loba wenze okunye nje okusiza ukuthi iWolu loMbuso lihlale lilihle? Ungazinikela yini ukuthi unike inkulumo yomunye ongekho eSikolo seNkonzo samaKhristu? Uzathola ukuthi ukuzinikela ukuthi uncede abanye kuzakwenza uthokoze.—ImiSeb. 20:35.
3. Kuqakatheke kangakanani ukuqina ekukhonzeni, futhi kuyini okungakwenza ube njalo?
3 Ukuqina Ekukhonzeni: Kuqakatheke kakhulu ukuthi inceku ebandleni ibe ngeqinileyo ekukhonzeni kulokuthi ibe leziphiwo ezithile kumbe amakhono athile ezalwe ilawo. Umuntu oqinileyo ekukhonzeni uzama ukuba lombono kaJehova lokaJesu ngezinto ezithile. (1 Kor. 2:15, 16) Utshengisa ‘izithelo zomoya.’ (Gal. 5:22, 23) Ungummemezeli otshisekayo ofaka izinto eziphathelane loMbuso kuqala. (Mat. 6:33) Ungaba lobuntu obungokomoya ngokuba lohlelo oluhle lokufunda uwedwa. Lokhu kugoqela ukufunda iBhayibhili nsukuzonke, ukubala i-Nqabayokulinda le-Awake! ngayinye, njalo lokulungiselela imihlangano yebandla kanye lokuyingena. (Hubo. 1:1, 2; Heb. 10:24, 25) Lapho ekhuthaza uThimothi owayesakhula ukuthi athuthuke ngokomoya, uPhawuli wabhala wathi: ‘Qaphela kakhulu imfundiso yakho.’ (1 Tim. 4:15, 16) Ngakho sebenza nzima ezinkulumweni zakho oyabe uziphiwe eSikolo seNkonzo samaKhristu. Lungiselela inkonzo yasensimini njalo uhlanganyele kuyo ngasosonke isikhathi. Zibekele imisebenzi ofuna ukuyenza engokomoya futhi uzame ukuyifinyelela, enjengokuphayona, inkonzo yaseBhetheli kumbe ukuya eSikolo seBhayibhili saBazalwane Abangatshadanga. Ukuqina kwakho ekukhonzeni kuzakunceda ukuthi ‘ubalekele izinkanuko ezimbi zobutsha.’—2 Tim. 2:22.
4. Kuqakatheke ngani ukuthembeka lokuba leqiniso?
4 Ukuthembeka lokuba leQiniso: Abaphostoli kabazange badubeke ngokucabanga ukuthi umsebenzi wokupha amaKhristu ayeswela ukudla wawuzakwenziwa kuhle yini loba hatshi, ngoba bakhetha abazalwane ‘ababesaziwa’ ukuthi bathembekile futhi baleqiniso. Lokhu kwabenza bagxila kwezinye izindaba ezaziqakathekile. (ImiSeb. 6:1-4) Yikho-ke, nxa uphiwe umsebenzi othile ebandleni wenze ngenhliziyo yakho yonke. Lingisela uNowa owalandela ngonanzelelo iziqondiso zokwakha umkhumbi ayeziphiwe. (Gen. 6:22) UJehova uyakuqakathekisa kakhulu ukuba leqiniso futhi ukuba njalo kutshengisa ukukhula ngokomoya—1 Kor. 4:2; bona ibhokisi elithi “Ukuqeqetsha Kunceda Ngani?”
5. Kungani kumele abasakhulayo babeke izinhliziyo zabo emsebenzini othile?
5 Njengoba kwaphrofethwa, uJehova uyakuphangisisa ukuqoqwa lokhu. (Isa. 60:22) Ngokwesilinganiso, kubhaphathizwa abantu abayizinkulungwane ezingu-250 umnyaka ngamunye. Njengoba kulabanengi kangaka abamukela iqiniso, amadoda afaneleyo futhi aqinileyo ekukhonzeni ayafuneka ukuze anakekele imisebenzi yebandla. Khathesi sekulomsebenzi omnengi kakhulu wokwenza enkonzweni kaJehova ukwedlula isikhathi esadlulayo. (1 Kor. 15:58) Bafowethu abasakhulayo, libeke izinhliziyo zenu emsebenzini othile yini? Nxa likwenza lokhu, lifisa umsebenzi omuhle kakhulu!
[Umfanekiso osekhasini 2]
Amadoda afaneleyo aqinileyo ekukhonzeni ayadingakala ukuze anakekele imisebenzi yebandla ngenxa yokuthi banengi abantu abatsha abeza eqinisweni
[Umfanekiso osekhasini 3]
Ukuqeqetsha Kunceda Ngani?
Abafowethu abasakhulayo abafaneleyo bayancedakala nxa abadala bebanika imisebenzi yokwenza njalo bebaqeqetsha. Umbonisi wesiqinti wayehlezi epulathifomu ekhuthaza omunye ummemezeli ngemva komhlangano. Wananzelela umfana osakhulayo owayeme eduze kwakhe, ngakho wambuza ukuthi wayefuna ukukhuluma laye yini. Umfowethu osakhulayo waphendula esithi wayecelwe ukuthi athanyele ipulathifomu ngemva kwemihlangano maviki wonke. Abazali bakhe basebefuna ukuhamba kodwa yena wayengafuni ukuhamba engakenzi umsebenzi wakhe. Umbonisi wesiqinti wasuka esitejini. Umbonisi wesiqinti wathi: “Abadala kulelo bandla babehlala beqeqetsha abazalwane abasakhulayo ngokubanika imisebenzi yokwenza ebandleni. Umpumela waba yikuthi ngesikhathi ngivakatshela ibandla labo, babekhuluma kuhle ngabazalwane abasakhulayo, becela lokuthi babekwe ukuthi babe yizinceku ezikhonzayo.”