ILizwi likaNkulunkulu Liyasebenza

1. Sithini isihloko somhlangano wosuku oluqakathekileyo somnyaka wenkonzo ka-2014?

¹ Ngokungafanani laloba kuyini okuvela ebantwini abalesono, iBhayibhili lilamandla okusintshintsha, lenza ukuthi indlela esicabanga ngayo kanye lesenza ngayo ivumelane lentando kaJehova. Kodwa lilamandla kangakanani iLizwi likaNkulunkulu? Singawasebenzisa njani ekuphileni kwethu amandla eLizwi likaNkulunkulu? Singalisebenzisa njani kuhle ukuze sincede abanye? Sileqiniso lokuthi sonke sizakwakhiwa ngokomoya njengoba imicijo le kuzaxoxwa ngayo ehlelweni lomhlangano wosuku oluqakathekileyo olwenzelwe umnyaka wenkonzo ka-2014. Isihloko sawo sithi “ILizwi likaNkulunkulu Liyasebenza,” futhi sithethwe kumaHebheru 4:12.

2. Kumele silalele izimpendulo zemibuzo yiphi?

² Dinga Izimpendulo Zemibuzo Le: Njengoba ulalela uhlelo lomhlangano, bhala izimpendulo zemibuzo ebhalwe ngaphansi.

• Kungani kumele silethembe iLizwi likaJehova? (Hubo. 29:4)

• Singawabona njani amandla eLizwi likaNkulunkulu ekuphileni kwethu? (Hubo. 34:8)

• Ungawatshengisa njani amandla eLizwi likaNkulunkulu enkonzweni yakho? (2 Tim. 3:16, 17)

• Singakubalekela njani ukukhohliswa ngumhlaba kaSathane? (1 Joha. 5:19)

• Njengosakhulayo, ungaphumelela njani ngokomoya? (Jer. 17:7)

• Singahlala njani siqinile lanxa singelawo amandla? (2 Kor. 12:10)

• Kuyini okuqakathekileyo okungasinceda ukuthi siqhubeke sintshintsha, lanxa silemikhuba okunzima ukuyiyekela? (Efe. 4:23)

3. Ngaphandle kokulalela uhlelo lomhlangano, yiphi enye indlela esingancedakala ngayo emhlanganweni wosuku oluqakathekileyo?

³ Sizancedakala kakhulu ngokuzwa amazwi la aqakatheke kangaka! Okunye yikuthi umhlangano wosuku oluqakathekileyo uzasinika ithuba lokuvula ngokupheleleyo izinhliziyo njalo sijabulele ubudlelwano labafowethu labodadewethu abangasibo bebandla lethu njengoba nje umhlangano wesiqinti lomhlangano wesigaba usinika ithuba elifananayo. (Hubo. 133:1-3; 2 Kor. 6:11-13) Ngakho thola isikhathi sokuba labangane bakudala, njalo udinge abanye abatsha. Nxa kulesikhulumi esivakatshileyo njengombonisi wesigaba kumbe umzalwane ovela eBhetheli bezonika izinkulumo emhlanganweni wenu wosuku oluqakathekileyo, kungani ungathathi lelithuba ukumamukela yena kanye lomkakhe? Kuliqiniso ukuthi silezizathu zokukhangelela ukubakhona emhlanganweni ozayo wosuku oluqakathekileyo!