Izihloko Ezandise Ukuphuma Ezingasinceda eNkonzweni Yethu
1. Izihloko ezandise ukuphuma ezithi “Ingxoxo Lomakhelwana” zihlose ziphi izinto ezimbili?
1 Ngezinye izikhathi, INqabayokulinda kazulu wonke iba lezihloko ezithi “Ingxoxo Lomakhelwana.” Izihloko lezi ezandise ukuphuma zihlose izinto ezimbili—ukufundisa izimfundiso zeBhayibhili ngendlela ekhangayo kanye lokusitshengisa izindlela esingabonisana ngazo ngokuhlakanipha nxa sikhuluma ngezinye izihloko ezitshiyeneyo. (1 Phe. 3:15) Singazisebenzisa njani ngendlela ephumelelayo izihloko lezi?
2. Singazisebenzisa njani enkonzweni yethu izihloko lezi ezandise ukuphuma?
2 Zisebenzise eNkonzweni: Ungagcina amanye amakhophi e-Nqabayokulinda alaleso sihloko esitholakala ezihlokweni lezi ezandise ukuphuma. Nxa umninimuzi, umuntu olesifiso sokufunda, kumbe umuntu ofunda laye iBhayibhili ebuza umbuzo kumbe kulokunye angavumelani lakho okwakhulunywa ngakho kulezo zihloko, mnike ikhophi elesihloko leso njalo ucele ukuthi lixoxe ngaso. Nxa ungelayo ikhophi yemagazini eyayikhuluma ngaleso sihloko, ungazidawunilodela ku-jw.org.
3. Ungaxoxa njani lomninimuzi usebenzisa lezizihloko?
3 Ungaxoxa njani lomunye umuntu usebenzisa lezizihloko? Abanye bacela lowo muntu abaxoxa laye ukuthi abale ngelizwi eliphezulu amazwi kamakhelwana, bona besebebala amazwi kaFakazi. Babone ukuthi ukusebenzisa indlela le esangxoxo kuyasebenza ngoba kwenza ukuthi umuntu okuxoxwa laye ahlole lokho esikukholwayo ngendlela ezamenza ukuthi angazizwa angani uyahlaselwa.—Dute. 32:2.
4. Singazifundisa njani sisebenzisa lezizihloko ezandise ukuphuma?
4 Zifundise Wena, Ufundise Labanye: Njengoba ubala izihloko lezi, nanzelela imibhalo, imizekeliso kanye lendlela yokubonisana esetshenzisiweyo. Nanzelela futhi indlela udaba lwakhona olubekwe ngayo. Zama ukusebenzisa indlela efananayo enkonzweni yakho. (Zaga. 1:5; 9:9) Omunye udade wathi, “Ukubala izihloko lezi kunjengokufunda kwelinye iphayona ‘eliyingcitshi’—elikwaziyo ukuthi yikuphi okuqondileyo okumele likutsho!”
5. Singabanceda njani esifunda labo iBhayibhili ukuthi bakulungele ukutshumayela?
5 Ungasebenzisa izibonelo ezibhaliweyo ukunceda ofunda labo iBhayibhili ukuthi balungele ukutshumayela. Balani ndawonye okusesihlokweni, unike ofunda laye ingxenye yommemezeli. Ngokwenza njalo, labo ofunda labo iBhayibhili bazabe befundela ukutshela abanye ngabakukholwayo, futhi bekwenza ngokukhetha kuhle amabala abawasebenzisayo ukuze bangacaphuli abanye enkonzweni. Kuliqiniso ukuthi izihloko lezi ngezinye zezindlela uJehova asinceda ngazo ukuthi ‘siyifeze yonke’ inkonzo yethu.—2 Thim. 4:5.