Indlela Esingalungiselela Ngayo Izingeniso Eziphumelelayo
1. Kuqakatheke kangakanani ukuba lesingeniso esihle?
1 Njengoba nje ukunambitha ukudla okumnandi kusenza ukuthi ufise ukukudla, isingeniso esihle laso senza ukuthi kube lengxoxo enhle yeMibhalo. Izingeniso ezinhle zingatshiyana ubude bazo kanye lalokho ezikumumetheyo. Njengokudla okumnandi, izingeniso kumele zilungiselelwe kuhle futhi kuseselesikhathi. (IZaga 15:28) Kuyini okwenza izingeniso zibe lempumela emihle?
2. Singasilungiselela njani isingeniso esilesihloko esithandwa ngabantu?
2 Khetha Izihloko Ezithandwa Ngabantu: Isingeniso sethu kumele sibe ngesithandwa ngabantu ukuze umninimuzi angayiqumi ingxoxo. Ngakho nxa ulungiselela, cabanga ngezihloko ezithandwa ngabantu abasemphakathini wakini. Bafuna uhulumende omuhle yini, ukuthokoza njengezimuli, kumbe ukuqedwa kwezimpi? Abantu bayakuthanda ukuveza imibono yabo, ngakho lungiselela umbuzo ozabenza ukuthi baveze imibono yabo. Ungasebenzisa yini ensimini yakini esinye sezingeniso eziku-Nkonzo Yethu yoMbuso? Ngezinye izikhathi, lingaphurakithiza ezinye zezingeniso ngesikhathi senu sokuKhonza Kwemuli kwantambama.
3. Singenza njani ukuthi isingeniso sethu sihambelane lamasiko lendlela abantu abakhuliswe ngayo ensimini yethu?
3 Cabanga Ngamasiko Lendlela Abantu Abakhuliswe Ngayo: Kwezinye izindawo kukhangelelwe ukuthi sihle sitsho ukuthi kungani sivakatshile. Kwezinye futhi, yikudelela ukuthi umuntu ovakatshileyo angaqali abuze ukuthi umninimuzi unjani lokuthi abuze okunye okuthile ngaye umninimuzi. Ikanti kwezinye, kulula ukuxoxa labantu ngeBhayibhili ngelanga lokuqala nje ngenxa yokuthi bayabe bekhulele ezimulini ezikhonzayo. (ImiSebenzi 2:14-17) Kodwa nxa ukhuluma labantu abasenkolweni engasiyo yobuKhristu, kumbe abangelankolo ethile abayingenayo, kungabangcono ukukhuluma ngeBhayibhili nxa usuphindela.—ImiSebenzi 17:22-31.
4. Kuyini okumele sikunanzelele ngamazwi esiwatsho kuqala nxa sisethula izindaba ezinhle?
4 Amazwi Esiqala Ukuwatsho: Lungiselela kuhle amazwi ozaqala ukuwatsho. Kungcono kakhulu ukukhuluma imitsho emifitshane futhi elula. Indlela esitsho ngayo amazwi okuqala layo iqakathekile. Khuluma ngomdlandla. Momotheka ngobuqotho ngoba lokho kutshengisa ukuthi ulendaba lomninimuzi. Ukulandela amacebo la kuzasinceda ukuthi silungiselele izingeniso ezizakhuthaza abantu esibatshumayezayo ukuthi badle etafuleni likaJehova.—1 KwabaseKhorinte 10:21.