Lingisela Abaphrofethi—UMikha
1. Yiwuphi umbuzo okungenzeka uMikha wayecabanga ngawo, kodwa kungani ukutshumayela kwakhe kwakungasikuchitha isikhathi?
1 ‘Ukuphela komumo lo wezinto ogcwele izinto ezimbi kuyafika nini? Mhlawumbe umphrofethi uMikha wayeke wacabanga ngombuzo ofananayo ememezela umlayezo wesahlulelo sikaJehova esasimayelana lemibuso yako-Israyeli loJuda. Loba kunjalo, umsebenzi wakhe wokutshumayela wawungasikuchitha isikhathi nje. Ngo-740 B.C.E., uMikha esaphila, amazwi kaJehova ayewakhuluma ngalokhu okwakuzakwenzakala eSamariya agcwaliseka. (Mik. 1:6, 7) Ngemva kwesikhathi iJerusalema labhujiswa ngomnyaka ka-607 B.C.E. (Mik. 3:12) Singamlingisela njani uMikha njengoba silindele isahlulelo sikaJehova osukwini lwethu?
2. Sitshengisa njani ukubekezela njengoba silindele usuku lukaJehova njalo kungani kumele senze njalo?
2 Bekezela: UMikha wabhala wathi: “Kodwa mina ngilindele uJehova ngethemba, ngilindele uNkulunkulu umsindisi wami.” (Mik. 7:7) Loba kunjalo uMikha kazange ahlale phansi wamelela ukuthi ukucina kufike. Waqhubeka esebenza njengomphrofethi kaJehova. Njengoba silindele usuku lukaJehova lathi, ‘kumele siphile impilo engcwele leyokumesaba uNkulunkulu.’ (2 Phet. 3:11, 12) Ukubekezela kukaJehova kuvulela abantu ithuba lokuthi baphenduke. (2 Phet. 3:9) Yikho-ke, siyasiqakathekisa isikhuthazo sokuthi silingisele abaphrofethi ekubeni ngababekezelayo.—Jak. 5:10.
3. Kungani kumele sicele uJehova ukuthi asinike umoya ongcwele?
3 Thembela Emandleni kaJehova: Lanxa uMikha wayenikwe umsebenzi onzima wathembela kuJehova ukuthi athole amandla okwenza umsebenzi ayewunikiwe. (Mik. 3:8) UJehova uyakwazi ukuthi siyawadinga amandla yikho esikhuthaza eBhayibhilini ukuthi sicele kuye amandla. Unika ngomusa abakhatheleyo amandla ukuze benelise ukwenza imisebenzi yabo yenkonzo. (Hubo. 84:5, 7; Isaya. 40:28-31) Wena usuke wawabona yini amandla lawo enkonzweni yakho? Ukwenza umkhuba yini ukucela umoya ongcwele kaJehova olamandla?—Luk. 11:13.
4. Yisiphi isibonelo esihle kakhulu esisithola endleleni uMikha ayephila ngayo?
4 Ukwenza intando kaNkulunkulu kwakuyinto eyayiqakathekile empilweni kaMikha. Wayezimisele ukuhlala ethembekile lanxa wayephakathi kwabantu ababengaziphathanga. Lathi lamuhla sihlangana lezilingo nsukuzonke. Yikho-ke, kasizimiseleni ukuqhubeka ‘sihamba ebizweni likaJehova uNkulunkulu wethu kuze kube laphakade.’—Mik. 4:5.