Ukuthuthukisa Indlela Esitshumayela Ngayo—Ngokubhala Phansi
“Qhaphela kakhulu ukuphila kwakho kanye lemfundiso.” (1 Tim. 4:16) Iseluleko lesi esiphefumulelweyo umphostoli uPhawuli asipha uThimothi sitshengisa ukuthi kungelani lokuthi sisesebatsha kumbe sesilesikhathi sitshumayela kumele senze umzamo wokuthi sithuthuke. Ukuze sikwenze lokhu, kuzakuba lesihloko esitsha esizabe siphuma ku-Nkonzo Yethu yoMbuso esithi “Ukuthuthukisa Indlela Esithumayela Ngayo.” Isihloko sinye ngasinye sizatshengisa indlela eqakathekileyo esingayisebenzisa lokuthi singayithuthukisa njani. Phakathi kwenyanga sonke sikhuthazwa ukuthi siyisebenzise indlela leyo. Inyanga ingaphela, kuzaba lengxenye eMhlanganweni weNkonzo ezasinika ithuba lokuthi sitsho ukuthi kusincede njani ukusebenzisa indlela leyo. Kule inyanga sikhuthazwa ukuthi sibhale phansi okuthile okuphathelane labantu esihlangane labo.
Kuqakatheke Ngani: Ukuze siwufeze umsebenzi wethu, kumele singatshumayeli-nje kuphela. Kumele sibuyele kulabo abalesifiso sokufunda siyebafundisa, ngokwenza njalo siyabe sithelela inhlanyelo yeqiniso esiyabe siyihlanyelile. (Mat. 28:19, 20; 1 Khor. 3:6-9) Lokhu kutsho ukumdinga futhi lowomuntu, sixoxe ngokumkhathazayo njalo sakhele kulokhu esaxoxa ngakho. Ngakho, kuqakathekile ukuthi sibhale phansi nxa singathola umuntu olesifiso sokufunda.
Indlela Yokukwenza:
• Qiniseka ukuthi ulazo zonke izinto ezifunekayo zokubhala phansi esikhwameni sakho. Kumele ubhale ngendlela ecacileyo njalo okubhalileyo kumele kuhlale kuhambelana lesikhathi. Kumele uhle ubhale uqeda nje ukukhuluma lomuntu.
• Bhala phansi okuphathelane lomninimuzi. Bhala ibizo lakhe, lapho atholakala khona, njengekheli, inombolo yocingo kumbe ikheli lakhe le-imeyili. Kukhona yini okubonileyo ngaye kanye lemuli yakhe okungakunceda?
• Bhala phansi elixoxe ngakho. Yiphi imibhalo eliyifundileyo? Kuyini akukhulumileyo ngalokhu akukholwayo? Umtshiyele liphi ibhuku? Bhala isikhathi kanye lelanga omvakatshele ngalo.
• Bhala phansi ohlela ukukwenza nxa usubuyela kuye. Umthembise ukuthi lizaxoxa ngani? Umtshele ukuthi uzamvakatshela nini?
• Isikhathi ngasinye ngemva kokuphindela, bhala phansi izinto ezingakunceda. Akula ndaba ungaze ubhale izinto ezinengi kulalezo ozidingayo.
Kuzame Lokhu Phakathi Kwenyanga:
• Nxa ubhala phansi, tshela labo ohamba labo ukuthi ubhalani.