Uzalisebenzisa Yini Ithuba?
ISikhumbuzo Esizayo Sisinika Ithuba Lokutshengisa Ukuthi Singababongayo
1. ISikhumbuzo sisinika liphi ithuba eliqakathekileyo?
1 ISikhumbuzo esizakwenziwa ngo-April 14 sizasinika ithuba elihle lokufunda lelokutshengisa ukuthi siyabubonga ubuhle bukaJehova. Indaba ekuLukha 17:11-18 itshengisa ukuthi uJehova loJesu bakubona njani ukubonga. Kuyadanisa ukuthi uJesu wasilisa amadoda alitshumi ayelobulephero kodwa ngeyodwa kuphela eyaphenduka yazobonga. Ngesikhathi esizayo, isipho senhlawulo sizaqeda du konke ukugula, njalo sizakwenza abantu bathole ukuphila okungapheliyo! Akuthandabuzwa ukuthi sizambonga uJehova nsukuzonke ngalezi zibusiso. Kodwa singatshengisa njani ukuthi singababongayo emavikini alandelayo?
2. Kuyini okungasinceda ukuthi sitshengise ukuthi siyayibonga inhlawulo?
2 Zama Ukuba Ngobongayo: Imicabango yiyo eyenza ukuthi sizizwe sifuna ukubonga. Kulohlelo lokubalwa kweBhayibhili oluqakathekileyo lwangesikhathi seSikhumbuzo olutholakala ezindaweni ezitshiyeneyo njengakusengezo B12 se-revised New World Translation, kukhalenda, kanye laku-Examining the Scriptures Daily. Uhlelo lolu lwenzelwe ukusinceda ukuthi sibe ngabatshengisa ukubonga ngenhlawulo. Kungani lingahleli ukulandela uhlelo lolu liyimuli? Ukwenza lokhu kuzasenza ukuthi siyiqakathekise kakhulu inhlawulo. Lokhu besekusenza ukuthi siziphathe ngendlela engcono kakhulu.—2 Khor. 5:14, 15; 1 Joh. 4:11.
3. Singatshengisa njani ukuthi singababongayo ngesikhathi seSikhumbuzo?
3 Tshengisa Ukubonga: Ukubonga kutshengiswa ngezenzo. (Kol. 3:15) Indoda eyayilobulephero yazama ukudinga uJesu ukuze imbonge. Akuthandabuzwa lokuthi ngentshiseko enkulu, yatshela abanye ngokusiliswa kwayo ngendlela eyisimangaliso. (Luk. 6:45) Ukubonga kuzenza yini ukuthi sibe lentshiseko ekutsheleni abanye ngeSikhumbuzo? Enye indlela yokutshengisa ukubonga yikuba ngamaphayona asizayo ngesikhathi seSikhumbuzo kumbe ukwengezelela isikhathi enkonzweni. Ngelanga leSikhumbuzo, inhliziyo ebongayo izasenza samukele izethekeli futhi sizimisele ukuphendula imibuzo yazo.
4. Kuyini esingakwenza ukuze singazisoli nxa iSikhumbuzo lesi sesidlulile?
4 ISikhumbuzo lesi sizakuba ngesokucina yini? (1 Khor. 11:26) Kasikwazi. Kodwa siyakwazi ukuthi nxa isikhumbuzo lesi singedlula, liyabe selidlulile lethuba lokutshengisa ukubonga. Uzalisebenzisa yini ithuba lelo? Sengathi amazwi emilomo yethu leminakano yezinhliziyo zethu kungathokozisa uJehova, osiphe inhlawulo ngesihle.—Hubo. 19:14.