Amaphetshana Amatsha Enziwe Ngendlela Enhle!
1. Kuyini okwenziwe ngendlela entsha esizakusebenzisa enkonzweni?
1 Emhlanganweni weSigaba ka-2013 owawulesihloko esithi “ILizwi LikaNkulunkulu Liliqiniso!” kwethulwa amaphetshana amahlanu amatsha. Kanti le-Kingdom News No. 38 ethi “Abafileyo Bangaphinde Baphile Yini? yangezelelwa kulawo maphetshana. Wonke amaphetshana la enziwe ngendlela enhle njalo entsha. Kungani amaphetshana la enziwe kutsha? Enkonzweni yendlini ngendlu singayisebenzisa njani indlela entsha yokwenziwa kwawo?
2. Kungani amaphetshana la enziwe kutsha?
2 Kungani Enziwe Ngendlela Le?: Indlela ephumelelayo yokutshumayela ihlanganisa amanyathelo la amane: (1) Buza umbuzo ozakwenza umuntu atsho umbono wakhe ukuze liqale ingxoxo. (2) Mbalele uMbhalo. (3) Nika umninimuzi okokubala. (4) Mbuze umbuzo ozaphendulwa esikhathini esizayo, beselihlela ukuthi uzaphenduka nini. Indlela amaphetshana la enziwe ngayo yenza kube lula ukulandela amanyathelo la womane.
3. Enkonzweni, singalihambisa njani elinye lamaphetshana amatsha?
3 Indlela Yokuwasebenzisa: (1) Nxa usuzethulile kumninimuzi, mtshengise imibuzo esekuqaliseni kwephetshana, ubusumbuza ukuthi yena ucabangani. (2) Vula iphetshana beselixoxa ngesihloko esithi “Lokho Okutshiwo LiBhayibhili.” Nxa izimo zivuma mbalele iBhayibhili. Nxa umninikhaya elesikhathi, xoxani ngesihloko esithi “Ukukholwa Lokhu Kuzakunceda Ngani.” (3) Mnike iphetshana ubusumkhuthaza ukuthi azibalele lonke eseyedwa. (4) Ungakahambi mtshengise umbuzo ongaphansi kwesihloko esingemuva esithi “Okumele Ucabange Ngakho” beselihlela ukuzoxoxa ngempendulo eseBhayibhilini ngesikhathi esizayo.
4. Ungawasebenzisa njani amaphetshana, nxa uphindela?
4 Ukuphindela lakho kulula futhi. Sebenzisa imibhalo engemuva kwephetshana ukuze uphendule umbuzo owawumbuze wona. Ungakasuki, mtshengise umfanekiso webhukwana elithi Izindaba Ezinhle, mtshengise lona kanye lesifundo esilokunengi mayelana laleyondaba, ube usumnika lona. Nxa engalamukela, hlela ukuzoxoxa laye ngalo esikhathini esizayo. Uyabe usuqalisile ukufunda laye iBhayibhili. Kwesinye isikhathi, kulokuthi umuphe ibhukwana ungamtshiyela elinye iphetshana beselihlela ukuthi ungaphenduka nini lizoxoxa ngalo.
5. Amaphetshana aqakatheke ngani enkonzweni yethu?
5 Sokuleminyaka edlula engu-130 amaphetshana esetshenziswa enkonzweni yethu. Lanxa esehlukana ngobukhulu langendlela enziwe ngayo, amaphetshana la abeyindlela ephumelelayo enkonzweni. Kasiwasebenziseni kuhle amaphetshana la ekufundiseni abantu abanengi ulwazi oluseBhayibhilini.—Zaga. 15:7a.