Lingisela Abaphrofethi—UNahume
1. Kuyini esikufunda ebhukwini likaNahume?
1 Njengoba uNahume wayephrofethile, amanxiwa aseNineve ayibufakazi bokuthi uJehova uyaphindisela ezitheni zakhe lanxa zingaze zibe lamandla angakanani njalo kazingeke zimelane laye. (Nahu. 1:2, 6) Sizathola izifundo ezizasinceda enkonzweni yethu nxa singakhangelisisa isiphrofetho sikaNahume.
2. Kuyini esingakwenza ukuze intshumayelo yethu iduduze futhi ikhuthaze abanye?
2 Nika Ithemba Futhi Ududuze: Nxa ungalikhangelisisanga kuhle ibhuku likaNahume ungacabanga ukuthi likhuluma ngokubi kuphela okwakuzakwehlela iNineve, isigodlo sase-Asiriya. (Nahu. 1:1; 3:7) Kodwa isiphrofetho lesi sasizindaba ezinhle ebantwini bakaJehova. UNahume olebizo elitsho “uMduduzi,” waqinisekisa amaJuda ukuthi izitha zawo zazizabhujiswa. UNahume waphinda wabatshela ukuthi uJehova “uyisiphephelo ezikhathini zokuhlupheka.” (Nahu. 1:7) Nxa sitshumayela sitshela abanye izindaba ezinhle futhi sibakhuthaza ukuthi baphephele kuJehova.—Nahu. 1:15.
3. Singamlingisela njani uNahume ekusebenziseni izibonelo lemizekeliso?
3 Sebenzisa Izibonelo Lemizekeliso: UNahume waphefumulelwa nguJehova ukuthi afananise ukubhujiswa kweNineve lalokho okwenzakala edolobheni leGibhithe okuthiwa yiThebesi elabhujiswa yi-Asiriya. (Nahu. 3:8-10) Njengoba sitshela abantu ngokuphela komumo wezinto lo omubi, kufanele sibatshele ngeziphrofetho zeBhayibhili ezitshengisa ukuthi uJehova uyazigcwalisa izithembiso zakhe. Ngokwesibonelo, ngesikhathi amabutho eBhabhiloni lawamaMede ehlasela iNineve ngo-632 B.C.E, izulu lana kakhulu labangela ukuthi umfula uThigrisi ugcwale uze udilize imiduli eqinileyo yedolobho leli. INineve yahlaselwa futhi yathunjwa njengoba uJehova wayetshilo.—Nahu. 1:8; 2:6.
4. Kuyini esingakwenza ukuze lokho esikutshumayelayo kucace futhi kuzwisiseke?
4 Khuluma Ngendlela Ecacileyo Futhi Ezwisisekayo: UNahume wabhala ngendlela ezwisisekayo futhi ecacileyo njalo kwakulula ukuthi abantu bayizwisise imicijo yakhe. (Nahu. 1:14; 3:1) Lathi sifuna ukusebenzisa ulimi oluzwisisekayo. (1 Khor. 14:9) Nxa sifika okokuqala emuntwini kufanele sitsho esikulandileyo. Njengoba ufunda iBhayibhili labanye abantu, bancedise babe lokholo kuJehova laseLizwini lakhe futhi babone ukuthi lokho abakufundayo kubanceda njani.—Rom. 10:14.
5. Yisiphi isiqinisekiso esisithola esiphrofethweni sikaNahume?
5 Ibhuku elabhalwa nguNahume litshengisa ngokucacileyo ukuthi wayengumuntu othemba ukuthi ilizwi likaJehova lizagcwaliseka lanxa sekutheni. Njengoba umumo wezinto kaSathane usuphela, sithola induduzo esithembisweni esithi: “Ukuhlupheka akuyikubuya kabili.”—Nahu. 1:9.