Ukuthuthukisa Indlela Esitshumayela Ngayo—Ukutshumayela Nge-Intercom
Kungani kuqakathekile? Ukutshumayela sisebenzisa i-intercom kungasesabisa sibili. Kuyini okungasinceda ukuthi sihlale sikutshisekela ukwenza okuhle lanxa sitshumayela ngalindlela? Ungakukhohlwa ukuthi ezinye izakhiwo zihlala zikhiyiwe okokuthi abantu abahlala lapho singabatshumayeza nge-intercom kuphela. (Rom. 10:14) Abanye sebezibonele ngawabo ukuthi ukutshumayela ngalindlela kuyasebenza sibili. (Khangela i-Yearbook ka-2011 amakhasi 65 lo-66, kanye le-Yearbook ka-2000 ikhasi 54 indima 3.) Nansi imicijo ongayisebenzisa.
Indlela Yokukwenza:
• Lungiselela intshumayelo emfitshane ubusuyibhala phansi ukuze wenelise ukuyibalela umninimuzi nxa usukhuluma laye nge-intercom. Lokhu kuzakunceda ukuthi ubelesibindi. Mtshele inhloso yohambo lwakho uqalisa nje ukukhuluma laye. Mbize ngebizo lakhe nxa likhona ku-directory. Phetha ngokucela ukumupha iphetshana kumbe imagazini.
• Wenze ngenjabulo umsebenzi wakho. Khuluma ubobotheka njalo usebenzise lezandla angathi ukhuluma lomuntu omkhangeleyo.
• Xoxa ukhululekile. Khuluma ngendlela ecacayo langelizwi elizwakalayo. Ungakhulumi ujahile kumbe angani uyadonda.
• Kufanele ube ngumuntu onanzelelayo. Emafulethini amakhulu kungenzakala kube lama-intercom amanengi. Ungakhetha ukukhuluma labantu abathathu ubusubhala lapho oyabe ucine khona, kuthi abanye ubavakatshele ngelinye ilanga. Nxa ungazama ukukhuluma labo bonke abantu ngosuku olulodwa, ungacina usuthatha isikhathi eside abaninimizi baze bacine besiba lensolo.
Zama Ukwenza Okulandelayo Kulinyanga:
• Ekukhonzeni kwenu kwemuli phurakithizani ukutshumayela nge-intercom, otshumayelayo abe efulathelene loyabe engumninimuzi.