Izikhumbuzo Zomhlangano Wesabelo
Izikhathi Zohlelo Lomhlangano: Umculo uzaqalisa ngo–9:20 ekuseni okwamalanga wonke womathathu. Nxa umculo usuqalisile, kumele sonke sihle siyehlala phansi ukuze uhlelo lomhlangano luqalise ngokuhleleka. NgoLwesihlanu langoMgqibelo uhlelo luzaphela ngabo 5 ntambama, ikanti ngeSonto luzaphela ngabo 4 ntambama.
‘Bongani UJehova Ngehubo’: Abantu bakaNkulunkulu bangezikhathi zasendulo babemdumisa ngokuhlabela. Lalamuhla ukuhlabela kulokhu kuqakatheke kakhulu ekukhonzeni uJehova. (Hubo. 28:7) Ihlandla ngalinye lomhlangano wesabelo liqalisa ngomculo. Umculo lo awuphongutshaywa nje kodwa ngowokuthi sifunde ngoJehova futhi simkhonze. Ngakho nxa umgcinisihlalo esithi umculo usuzaqalisa, kuyabe sekumele sihlale phansi siwulalele. Nxa singenza njalo siyabe sitshengisa ukuthi siyawuqakathekisa umsebenzi owenziwa liqembu le-Watchtower orchestra eliyilo elilungiselela umculo lo. Kabili ngomnyaka, abazalwane labodadewethu abaseqenjini leli basebenzisa izimali zabo ukugada besiya ePatterson, eNew York ukuze bayelungiselela umculo lo. Nxa umculo usuphelile, wonke umuntu kumele adumise uJehova ngokuhlabela izingoma zethu zoMbuso.
Indawo Yokupaka Izimota: Kuzo zonke izindawo ezisenkundleni yomhlangano esiphiwe imvumo yokupaka kuzo, izimota ziyabe zipakwa mahala kusiya ngokuthi ngubani ofike kuqala. Izikhathi ezinengi indawo yokupaka iyabe incane, ngakho nxa kusenza sicela lisebenzise imota eyodwa kulokuthi omunye lomunye abuye ngeyakhe. Labo abayabe bethwele abagogekileyo yibo kuphela abazavunyelwa ukupaka ezindaweni eziyabe zigcinelwe abagogekileyo labakhulileyo.
Ukugcina Indawo: Ngesikhathi lifika lapho okungenelwa khona umhlangano kakumelanga ligijimele ukuyabamba izindawo zokuhlala. Kumele sizimisele ukuba lendaba labanye size sidele lesiyabe sikufisa ukuze sijabulise abafowethu. Ukuzidela kutshengisa ukuthi singamaKhristu eqiniso futhi kwenza abasibonayo badumise uNkulunkulu. (Joh. 13:34, 35; 1 Khor. 13:5; 1 Phet. 2:12) Izindawo zokuhlala lingazigcinela elihamba labo, elihlala labo, kumbe elifunda labo iBhayibhili. Lingafaki impahla yenu phezu kwezitulo elingasoze lizisebenzise ngoba lokhu kungenza abanye abadinga indawo bacabange ukuthi kulabantu elibagcineleyo. Kulendawo egcinelwe abalupheleyo labagulayo kanti njalo izihlalo lezi zilutshwane yikho kumele lowo ogulayo kumbe olupheleyo ahlale loyedwa kumbe ababili abamncedisayo.
Ukugqoka Ngendlela Elesithunzi: Indlela esigqoka ngayo ngesikhathi somhlangano kumele ibe ngelenhlonipho futhi engafanani lezitayila zabantu balumhlaba. (1 Tim. 2:9) Kumele sigqoke kuhle ukuze kube lula ukugqoka ibheji yomhlangano lokutshumayeza abantu esihlangana labo. Indlela esigqoka futhi siziphathe ngayo ngesikhathi somhlangano izabakhanga kakhulu abantu abafuna ukufunda iqiniso njalo izathokozisa loJehova.—Zef. 3:17.
Ukusebenzisa Ezempucuko Ngendlela Engasoze Iphazamise Abanye: Siyabe sitshengisa ukuthi silendaba labanye nxa singacitsha amafoni kanye lama-tablet ethu kumbe siwafake esimeni sokuthi angaphazamisi abanye. Nxa usebenzisa ikhamera, ividiyo rekhoda, i-tablet kumbe okunye nje, akumelanga usithe abanye kumbe ubaphazamise. Siyabe sitshengisa ukuthi silendaba labanye nxa singathumeli imilayezo ngesikhathi somhlangano.
Ukudla Kwemini: Sicela libuye lokudla kwenu kwemini kulokuthi lisuke enkundleni yomhlangano selisiyadinga ukudla ngesikhathi sekhefu. Lingasebenzisa isikhwama esincane esingafakwa ngaphansi kwesitulo. Izikhwama ezinkulu kanye lamankomitsho lemiganu efayo akuvunyelwa enkundleni yomhlangano.
Iminikelo: Singatshengisa ukuthi siyabonga ukuhlelwa komhlangano lo ngokunikela imali yokusekela umsebenzi owenziwa emhlabeni wonke. Nxa sizanikela ngetshekhi kumele siyibhale ukuthi “Watchtower Society.”
Amaphilisi Lemithi: Nxa ulamaphilisi kumbe umuthi owunathayo, sicela ubuye lawo ngoba awusoze ukuthole emhlanganweni. Amajekiseni omkhuhlane wetshukela kumele alahlelwe endaweni ezifaneleyo hatshi emabhimu asenkundleni yomhlangano kumbe ewoteleni njengoba engaba yingozi.
Ukuvikeleka: Sicela linanzelele njalo livikele izingozi ezingabangelwa yikutshelela lokukhubeka. Minyaka yonke abantu bayalimala ngenxa yezicathulo ezinde. Kumele ukhethe izicathulo ezifaneleyo, futhi ezingabambiyo ezizakuvumela ukuhamba kuhle emasitepisini, lakuzozonke izindawo.
Amaphurema: Akumelanga alethwe enkundleni yomhlangano. Kodwa izitulo zabantwana ziyavunyelwa nxa kuyikuthi zizafakwa eceleni kwezabazali babo.
Ama-perfume: Kwezinye izindawo imihlangano yenzelwa ezindaweni ezivalekileyo. Ngakho kungaba kuhle ukuthi singasebenzisi ama-perfume ahitshayo angenza abanye baphefumule nzima.—1 Khor. 10:24.
Ifomu Elithi Sicela Uyebona (S-43): Nxa ungahlangana lomuntu ngamalanga omhlangano ubusumtshumayeza, kumele ugcwalise ifomu elithi Sicela Uyebona ubusulihambisa kuHlangothi lwaMabhuku kumbe ulinike unobhala webandla lakini.
Amakhefa: Dumisa ibizo likaJehova ngendlela oziphatha ngayo nxa usekhefa. Gqoka ngendlela efanele amaKhristu.
Indawo Yokuhlala:
Zama ukusebenzisa izithelo zomoya endleleni ophatha ngayo labo ohlala labo. Nxa singenza njalo lowo esifikele kuye kuzamthokozisa ukubona ukuthi silomusa, siyabekezela futhi silendaba labanye.
Nxa lifikele emzini womzalwane, kumele lihlale likhangele abantwabenu.
Uhlangothi Lwabazinikeleyo: Bonke abafisa ukuncedisa kuloba yikuphi kumele baye kuHlangothi Lwabazinikeleyo. Nxa abantwana abangaphansi kweminyaka engu-16 befuna ukuncedisa, kumele basebenze bekhangelwe ngabazali babo kumbe ngomunye umuntu omdala.