Siza Abantu Abayiziphofu Ukuthi Bafunde NgoJehova
1. UJesu watshengisa njani ukuthi ulesihawu ebantwini abayiziphofu?
1 Kwasekusele izinsuku ezingengaki ukuthi uJesu abulawe. Wathi esuka eJerikho, iziphofu ezimbili zamemeza zathi: ‘Nkosi, sihawukele!’ UJesu wazibiza iziphofu lezi wazisilisa lanxa engqondweni yakhe wayekhathazeke ngezinhlupho ezinzima ezazizamehlela. (Mat. 20:29-34) Singamlingisela njani uJesu ekutshengiseni abantu abayiziphofu isihawu?
2. Singamtshumayeza njani umuntu oyisiphofu nxa singahlangana laye endleleni?
2 Bancedise: Nxa ungahlangana lomuntu oyisiphofu, mtshele ibizo lakho futhi ucele ukumncedisa. Umuntu lo angazibuza ukuthi umusa wakho ngowani ngenxa yokuthi iziphofu zandise ukungaphathwa kuhle kanye lokuqilwa. Kodwa nxa ungamtshengisa ukuthi ufisa ukuba ngumngane wakhe lokuthi uyamkhathalela kungamenza ahlaliseke. Ukukhumbula ukuthi ubuphofu buyatshiyana yikho okuzakunceda ubone ukuthi ungamncedisa njani. Nxa usumncedisile ungamtshela ukuthi wenza umsebenzi wokufundisa abantu iBhayibhili. Cela ukumbalela umbhalo kungaba liHubo 146:8 kumbe u-Isaya 35:5, 6. Nxa esenelisa ukubala amabhuku enzelwe abantu abayiziphofu, awe-Braille, mbuze ukuthi angafuna yini ukuthola ibhuku elizamnceda ukuthi afunde okunengi ngeBhayibhili. Ungamnceda lokuthi athole amabhuku arekhodiweyo atholakala ku-jw.org. Nxa ikhompiyutha yakhe isenelisa ukubala okubhalwe ku-screen, angenelisa ukuthola lamabhuku aku-jw.org kanye lamanye amabhuku e-RTF (Rich Text Format) angawadawuniloda.—Bona ibhokisi elithi “Nxa Unceda Umuntu Oyisiphofu. . . ”
3. Singabadinga njani abayiziphofu ensimini yethu?
3 Dinga Abantu Abayiziphofu: Asandisanga ukuthola iziphofu nxa singena indlu ngendlu ngenxa yokuthi azikhululeki ukukhuluma labantu ezingabaziyo abafika ezindlini zazo. Yikho-ke, kumele sizame sibili ‘ukubadinga’ abantu abayiziphofu ukuze sibatshumayeze. (Mat. 10:11) Kulomuntu oyisiphofu ofunda laye yini esikolo loba osebenza laye? Qalisa wena ukuxoxa laye. Nxa ensimini yenu kulesikolo sabantu abayiziphofu, cela ukunika lesosikolo amabhuku awe-Braille ukuze bawafake elayibhulali yabo. Kulomuntu omaziyo olesihlobo esiyisiphofu yini? Ensimini yenu, kulezinhlanganiso ezinceda iziphofu yini kumbe izindawo lapho okuhlala khona iziphofu? Chasisela isihlobo leso, umabhalani kumbe umqondisi wenhlanganiso ukuthi oFakazi bakaJehova bayathanda ukunceda iziphofu ubusucela ukumphathela amabhuku e-Braille kumbe okuthile okurekhodiweyo. Mtshengise isithembiso esiseBhayibhilini sokuthi uNkulunkulu uzakhipha ubuphofu bungaphindi bubekhona. Ungamtshengisa levidiyo eku-jw.org ethi “Without It, I Would Feel Lost,” ekhuluma ngendoda ethile eyancedwa yikuba leBhayibhili le-Braille. Ukuchasisa isizatho sokuza kwakho kungakunceda ukuthi uthole ithuba lokukhuluma lothile oyisiphofu.
4. Okwenziwa nguJanet kusifundisani?
4 Omunye udade oyisiphofu okuthiwa nguJanet wavakatshela lapho okugcinwa khona abantu abayiziphofu. Waqalisa ukuxoxa lowesifazana osekhulakhulile. UJanet wathi kuye, “uJesu wasilisa abantu ababeyiziphofu ukuze atshengise lokho azakwenzela bonke abantu abayiziphofu.” Babala uSambulo 21:3, 4, uJanet wasechasisa ukuthi uMbuso kaNkulunkulu uzasigcwalisa njani isithembiso lesi. Owesifazana lo wathula, wasesithi: “Kangikaze ngizwe umbono lo ukhulunywa ngumuntu oyisiphofu. Abantu abanengi ababonayo bakholwa ukuthi abantu baba yiziphofu ngenxa yokubi abakwenzayo kumbe okwenziwa ngokhokho babo.” UJanet wathumela owesifazana lo i-link ye-inthanethi lapho okutholakala khona ibhuku elithi Okufundiswa LiBhayibhili futhi khathesi bafunda bonke iBhayibhili kabili ngeviki.
5. Yiziphi izibusiso esizazithola ngokuba lendaba labantu abayiziphofu lanxa singenelisi ukubasilisa njengoJesu?
5 Thina kasenelisi ukwenza njengoJesu owayesilisa abantu abayiziphofu, kodwa siyenelisa ukunceda iziphofu kanye lalabo abaphumputhekiswe izingqondo zabo ngunkulunkulu walumhlaba ukuthi balizwisise iqiniso eliseLizwini likaNkulunkulu. (2 Khor. 4:4) UJesu wasilisa amadoda amabili eduzane leJerikho ngoba “wawazwela isihawu.” (Mat. 20:34) Nxa singatshengisa ukuthi silendaba labantu abayiziphofu, sizakuba lesibusiso sokunceda abanye babo ukuthi bafunde ngoJehova, onguye ozakhipha ubuphofu kuze kube nini lanini.
[Ibhokisi elisekhasini 3]
Nxa Unceda Umuntu Oyisiphofu . . .
• Khuluma laye, kodwa ungamemezi. Abantu abayiziphofu kababoni, kodwa izikhathi ezinengi bayezwa kuhle.
• Nxa umphelekezela, gobisa ingalo yakho ukuze akubambe phezudlwana kwendololwane. Uzakwenelisa ukukulandela kuhle nxa uhamba phambidlana kwakhe. Kuqakathekile ukuthi umtshele nxa ungabona iphowulu, isitephu kumbe okunye nje okungamenza akhubeke awe.
• Khululeka ukusebenzisa amabala anjengokuthi “bona” kumbe “khangela.” Abantu abayiziphofu bayawasebenzisa amabala la. Bayenelisa ‘ukubona’ ngelihlo lengqondo lokho okuyabe kuchasiswa.
• Xoxelani endaweni ethuleyo. Abantu abayiziphofu abandisanga ukukhululeka nxa besendaweni elomsindo kakhulu, ngoba bayabe belokhu bedinga ukuthi kwenzakalani.
• Mtshele nxa usuhamba. Lokhu kuzakwenza angasali esekhuluma yedwa ecabanga ukuthi ulokhu ukhona.
• Gcwalisa ifomu elithi Sicela Uyebona (S-43), ubusulinika unobhala webandla lenu nxa kuyikuthi lowomuntu oyisiphofu kahlali ensimini yenu.