‘Imilayo Le Kumele Ibe Senhliziyweni Yakho’

Abazali bafanana labelusi. Yikho-ke kumele babakhulise kuhle abantwababo ukuze bangabi ngumhlambi kazelusile. (Zaga. 27:23, nwt) Kodwa abazali bangakwenza njani lokhu? Kumel⁠e bazinike isikhathi sokuxoxa labantwababo nsukuzonke ukuze bazi lokho abakucabangayo lokusezinhliziyweni zabo. (Zaga. 20:5) Abazali kumele bakhe ukholo lwabantwababo lube njengesakhiwo esiqine nko esingasoze sitshe kalula. (1 Khor. 3:10-15) Ividiyo ethi ‘Imilayo Le Kumele Ibe Senhliziyweni Yakho’ itshengisa ukuqakatheka kokukhonza kwemuli. Ngakho yibukeleni lindawonye beselixoxa ngemibuzo elandelayo.

(1) Kuyini okwaphambanisa imuli kaDlamini ekukhonzeni? (2) Kuyini okwenza uMfowethu uDlamini wakha phansi ngesikhathi ezama okokuqala ukuba lokukhonza kwemuli? (3) Yiphi indlela engcono kakhulu yokukhulisa abantwana etholakala emibhalweni? (Dute. 6:6, 7) (4) Kuyini okungenza kube lokukhulumisana okuhle emulini? (5) Yikuphi ukuzinikela okumele kwenziwe ngabazali ukuze bancede abantwababo? (6) UMfowethu lodade Mathe bayincedisa njani imuli kaDlamini? (Zaga. 27:17) (7) Izinhloko zezimuli zingakulungiselela njani ukukhonza kwemuli ukuze kuncede amalunga wonke? (8) Yiphi imizamo eyenziwa nguMfowethu uDlamini ukuze ancedise imuli yakhe eyayisisiwa ekukhonzeni? (9) Kuqakatheke ngani ukuba lokukhonza kwemuli iviki ngayinye? (Efe. 6:4) (10) Yikuphi okungenziwa zimuli ukuze zikhwabithe ukukhonza kwemuli? (11) UMfowethu uDlamini wamncedisa njani uMehluli ukuthi abone ukuqakatheka kokwenza okulungileyo ngaphandle kokumtshingela kumbe ukumkhekheleza? (Jer. 17:9) (12) UMfowethu lodade Dlamini bamncedisa njani uSithabile ukuthi enze isinqumo esihle ngobungane ayeselabo loJustin? (Mak. 12:30; 2 Tim. 2:22) (13) UMfowethu lodade uDlamini bakuveza njani ukuthi balokholo oluqinileyo ngesikhathi besenza untshintsho endleleni ababephila ngayo? (Mat. 6:33) (14) Ividiyo le ikugcizelela njani ukuqakatheka kokuthi izinhloko zezimuli zincede izimuli zazo ziqine ekukhonzeni? (1 Tim. 5:8) (15) Kuyini ozimisele ukukwenza njengenhloko yemuli?

OKUMELE KUNANZELELWE YIZINHLOKO ZEZIMULI: Umdlalo lo sawubukela emhlanganweni wesabelo ka-2011. Kuyini elakunanzeleyo ngaleso sikhathi okwakudinga ukulungisiswa ukuze lithuthukise ukukhonza kwemuli? Selakulungisisa yini emulini yenu? Nxa kukhona lapho imuli yakho okumele ithuthukise khona sicela uthandaze ngayo indaba le. Lokhu kuzalinceda kakhulu.—Efe. 5:15-17.