Lingisela Abaphrofethi—UHabakhukhi
1. Kuyini okungenza sizibuze imibuzo eyabuzwa nguHabakhukhi?
1 Njengoba umhlaba lo uqhubeka usiba mubi kusa kwamalanga singafikelwa yimibuzo uHabakhukhi ayibuza uJehova: “Kungani ungitshengisa okungasimfanelo na? Kungani ubekezelela okungalunganga na?” (Hab. 1:3; 2 Tim. 3:1, 13) Ukunakana ngamazwi atholakala ebhukwini likaHabakhukhi kanye lokwethembeka kwakhe kuzasinceda sibambe ziqine njengoba silindele usuku olukhulu lukaJehova.—2 Phet. 3:7.
2. Singakutshengisa njani ukuthi silokholo oluqinileyo?
2 Woba Lokholo Oluqinileyo: UHabakhukhi kazange avume ukuthi ububi obabubhahile bumthene amandla kodwa wahlala elokholo njalo ekhuthele ekukhonzeni uJehova. (Hab. 2:1) UJehova wanika umphrofethi lo isiqiniselo sokuthi iLizwi lakhe lalizagcwaliseka ngesikhathi esifaneleyo lokuthi ‘olungileyo wayezaphila ngokholo lwakhe.’ (Hab. 2:2-4) Amazwi la angasinceda njani njengoba siphila emhlabeni lo osusiya komlindi uyacina? Akufanelanga sizihluphe kakhulu ngokuthi ukuphela kuzafika nini kodwa okufanele sibe leqiniso ngakho yikuthi kuzafika kumnyama kubomvu. Ukuba lokholo kuzasinceda ukuthi sihlale silulindele usuku lukaJehova njalo sisebenze gadalala emsebenzi wokutshumayela.—Heb. 10:38, 39.
3. Kungani kumele sikhonze uJehova ngentokozo?
3 Thokoza NgoJehova: Ngesikhathi uGogi waseMagogi ebasusela amanqe abantu bakaJehova, kuzacaca ukuthi ukholo lwethu luqine kangakanani. (Hez. 38:2, 10-12) Izimpi zibangela ukuthi abantu bathwale amagabha avuzayo kubalisela lalabo abanqobayo. Zingatshiya abantu besidla inqweqwe zomlomo. Kanti njalo abantu bangalahlekelwa yikho konke abalakho futhi ukuphila kube nzima. Sizakwenza njani ngaleso sikhathi? UHabakhukhi wazimisela ukuhlala ekhonza uJehova ngentokozo kungelani lokuthi yibuphi ubunzima obabungamehlela. (Hab. 3:16-19) “Ukuthokoza kukaJehova” kuzasisiza ukuthi senelise ukulwisana laloba yibuphi ubunzima esizahlangana labo.—Neh. 8:10; Heb. 12:2.
4. Yisiphi isibusiso esizahlala silaso?
4 Labo abazavikelwa nguJehova lapho kufika usuku lwakhe olukhulu bazaqhubeka befundiswa ukuphila ngendlela emthokozisayo. (Hab. 2:14) Ngitsho labazavuswa bazafundiswa ngoJehova. Yikho kufanele sikuqalise lamuhla ukusebenzisa wonke amathuba esiwatholayo ukuze sitshele abanye ngoJehova kanye lemisebenzi yakhe emangalisayo!—Hubo. 34:1; 71:17.