Isiqephu sebhuku lika-Isaya esatholakala kuma-Dead Sea Scrolls kanye lesiqephu sebhuku lika-Isaya esesihunyutshwe ngesi-Arabic. Umlayezo oseLizwini likaNkulunkulu kawuntshintshwanga.
ILizwi LikaNkulunkulu Lantshintshwa Yini?
Abanye abantu bacabanga ukuthi kulezinto ezantshintshwayo eLizwini likaNkulunkulu. Kodwa umphrofethi u-Isaya wathi iLizwi likaNkulunkulu “limi kuze kube nininini.” (U-Isaya 40:8) Kuyini okungenza singathandabuzi ukuthi iLizwi likaNkulunkulu kalintshintshwanga?
UNkulunkulu ulamandla okulondoloza lokuvikela iLizwi lakhe. Abantu ababekopa iMibhalo Engcwele beyisusa emibhalweni yakuqala bakwenza ngokuthembeka langokunanzelela okukhulu. Babebala ibala ngebala kanye lenhlamvu zalo ukuze babe leqiniso lokuthi kabangezeleli, kabantshintshi kumbe kabatshiyi okunye. Kodwa njengoba wonke umuntu elesono, abanye benza amaphutha amancane ekukopeni.
KUYINI OKUNGENZA SINGATHANDABUZI UKUTHI IMIBHALO ENGCWELE KAYINTSHINTSHWANGA?
KuleMibhalo Engcwele eminengi eyabhalwa kudaladala. Nxa eminye yawo ilephutha ingaqathaniswa leminye ukuze kukhanye ukuthi kwaphambaniseka ngaphi. Nxa ufuna ukufunda okunengi ngendaba le, khangela isihloko esithi “IBhayibhili Lantshintshwa Yini?” ku-jw.org.
Ngokwesibonelo kulama-Dead Sea Scrolls avunjululwa ngo-1947 futhi alezingxenye zeMibhalo Engcwele eyayisileminyaka edlula 2 000 yabhalwa. Izingcitshi zaqathanisa imibhalo leyo leMibhalo Engcwele esilayo lamuhla. Zatholani?
Zathola ukuthi amazwi aseLizwini likaNkulunkulu esilalo lamuhla ayafanana lalawo atholakala emibhalweni yakudala.a Lokhu kutsho ukuthi esikufunda eMibhalweni Engcwele lamuhla ngumlayezo ovela kuNkulunkulu. Asithandabuzi ngitsho lakancane ukuthi uNkulunkulu walondoloza konke okuseLizwini lakhe ukuze kungantshintshwa.
Yikho iLizwi likaNkulunkulu singalithemba futhi silibale sikhululekile ngoba alizange lintshintshwe. Esihlokweni esilandelayo sizaxoxa ngokuthi sifundani ngoNkulunkulu kulokho okwabhalwa ngabaphrofethi bakhe.
a The Complete Dead Sea Scrolls in English, Geza Vermes, ikhasi 16.