Ukuthuthukisa Indlela Esitshumayela Ngayo​—Ukuqalisa Ingxoxo Engasinika Ithuba Lokutshumayela

UJesu wenelisa ukutshumayeza owesifazana ongumSamariya ngenxa yokuthi waqala waxoxa laye. Singathuthukisa njani indlela esitshumayela ngayo nxa sixoxa labantu esingabaziyo?

• Woba lomusa futhi uxoxe labantu. Lanxa uJesu wayediniwe waqalisa ingxoxo ngokucela amanzi okunatha nje. Lawe ungaqalisa ingxoxo lothile ngokumbingelela mhlawumbe ubusukhuluma ngesimo somkhathi kumbe ngeyinye indaba esematheni. Khumbula ukuthi inhloso yakho ngeyokuqala ingxoxo, yikho ungakhuluma ngaloba yini umuntu angafisa ukuxoxa ngayo. Nxa engafisi ukuxoxa ungazikhathazi zama ukuxoxa lomunye. Cela uJehova akunike isibindi.—Neh 2:4; ImiS 4:29.

• Nanzelela wonke amathuba angavela okuthi ukhulume ngezindaba ezinhle kodwa ungajahi. Yekela ingxoxo iziqhubekele kuhle ungalwisi ukumtshumayeza ngoba lokho kungenza lowo oxoxa laye acine engasakhululekanga futhi azithulele. Ungadani nxa ingxoxo ingaphela ungazange umtshumayeze. Nxa usesaba ukutshumayela lapho kuvela ithuba zama ukuphrakthiza ukuqalisa ingxoxo ungelanhloso yokutshumayela. [Bukelani ividiyo 1 beselixoxa ngayo.]

• Ngesikhathi lisaxoxa zama ukukhuluma ngalokho okukholwayo okungenza ukuthi oxoxa laye afise ukuthi umchasisele okhuluma ngakho. UJesu wakhuluma amazwi enza owesifazana wabuza imibuzo. Waqalisa ukukhuluma ngezindaba ezinhle esephendula imibuzo yowesifazana lo. [Bukelani ividiyo 2 beselixoxa ngayo liphinde libukele ividiyo 3 lixoxe ngayo.]